Извршниот комитет на Фудбалскиот сојуз на Чешка (ФAЧР) објави дека репрезентативците нема да добијат бонус за победата против Гибралтар поради нивното однесување кон домашните навивачи по завршувањето на последниот натпревар од квалификациите за Светското првенство 2026 година. Исто така Извршниот комитет донесе одлука да му ја одземе капитенската лента на Томаш Соучек.

Пред два дена, фудбалерите на Чешка го победија Гибралтар со 6:0 во Оломоуц во последното коло од квалификациите за Групата Л за Светското првенство.

Чешка го освои второто место во групата со 16 бода и ќе игра во баражот за пласман на СП 2026 година.

Локалните медиуми објавија дека чешките фудбалери одбиле да одржат традиционален говор на благодарност до домашните навивачи по натпреварот против Гибралтар.

Навивачите на домашната репрезентација не беа задоволни од игрите на репрезентацијата во квалификациите за Светското првенство.

„За жал, ставот на играчите целосно ги засени перформансите на теренот и фактот дека репрезентацијата се квалификуваше за баражот за Светското првенство во 2026 година.

Ниту еден од играчите не е над земјата, која имаат чест да ја претставуваат, а ниту еден од играчите не е над навивачите, кои ги издвојуваат своите ресурси, време и енергија за да ја поддржат чешката репрезентација“, се вели во соопштението на ФАЧР.

Навивачите имаат право да го изразат своето несогласување со незадоволителните настапи на репрезентацијата во последните натпревари, се додава во соопштението на ФАЧР.

„Реакцијата на играчите требаше да биде спротивна. Требаше да им се заблагодарат на навивачите. Не само за нивната поддршка на натпреварот со Гибралтар, туку и за нивната поддршка во текот на целиот квалификациски циклус за СП 2026. ФАЧР одлучи дека Томаш Соучек нема да биде капитен на следниот натпревар, а на играчите нема да им се исплаќаат бонуси за победата против Гибралтар. Овие средства ќе бидат донирани на оние на кои им е потребна помош. Им се заблагодаруваме на сите навивачи кои ја поддржуваат репрезентацијата“, се заклучува во соопштението на ФАЧР.

Едер Милитао, 27-годишен бразилски фудбалер и одбранбен играч на Реал Мадрид, повторно се повреди, овој пат на пријателскиот натпревар против Тунис.

На натпреварот одигран во Франција, кој заврши без победник 1:1, Едер Милитао заработи повреда на аддукторскиот мускул и беше принуден да го напушти теренот по еден час игра.

Засега нема официјални информации од Реал за тоа колкава пауза го чека Бразилецот, а шпанските медиуми наведуваат дека, во најдобар случај, ќе биде надвор од теренот две, а во најлош случај, шест недели.

Самата повреда не треба премногу да ги загрижува челниците на Реал, туку фактот дека Милитао ја продолжи серијата повреди со кои се соочува во последните две години.

Едер Милитао пристигна во Реал од Порто во 2019 година, но во последните сезони почесто е на листата на повредени отколку на теренот.

Во последните две години, Едер Милитао двапати заработи сериозна повреда на коленото, а од август 2023 година, поради повреди пропушти повеќе од 200 дена. Милитао е многу важен во играта на Реал бидејќи уште еден искусен дефанзивец, Антонио Ридигер, е повреден и надвор од игра, а проблеми има и Дин Хаусен.

Foto/ EPA

Во НБА лигата, од почетокот на сезоната многу се зборува за бројни повреди на најголемите ѕвезди.

Џејсон Тејтум (Бостон), Тајрис Халибартон (Индијана) и Кајри Ирвинг (Далас) претрпеа сериозни повреди од минатата сезона. Во моментов повредени се Јанис Адетокумбо (Милвоки) и Виктор Вембањама (Сан Антонио), а на таа листа им се приклучи Стеф Кари од Голден стејт Вориорс.

Претходно, Џејлен Брансон од Њујорк, Треј Јанг од Атланта и Паоло Банкеро од Орландо имаа помали или малку посериозни повреди оваа сезона. Ова се главните играчи на нивните тимови.

Сето ова го загрижува Стив Кер, тренер на Голден Стејт Вориорс, кој верува дека постои решение за проблемот.

„Секогаш ќе се залагам за помал број натпревари. На играчите би им значело многу да се намалат од 82 на 72 во текот на главниот дел од сезоната. Не е само пренатрупаниот распоред виновен за бројните и чести повреди. Никогаш толку не се трчало во кошарката. Сите играат транзициска кошарка. Ако го комбинираме тоа со играње секоја втора вечер, завршуваме со полни листи на повреди“, рече Кер.

„Понекогаш сме на гостински турнеи повеќе од една недела. Во тие моменти, воопшто немате време за тренинг. Сè се одвива во ритамот од натпревар на натпревар. Ваков систем неводи никаде“, додаде 60-годишниот тренер кој, играјќи за Чикаго и Сан Антонио, беше петкратен шампион во НБА, додека го водеше Голден Стејт до четири титули во НБА како тренер.