Италијанските медиуми, се занимаваат со идноната на Шарл Леклер во Ферари. Шпекулираат дека тој би можел да го напушти тимот од Маранело.

Возачот од Монте Карло е привлечен од идејата да бара нов почеток во болидот на Астон Мартин, по шест години поминати во Скудерија Ферари. Раководството на британскиот тим разговарало со неговиот менаџер во неколку наврати, дознава експертот за Ф1, Лео Турини.

Неговиот сонародник Џорџо Теруци дознал дека победникот на осум трки во Ф1 е се поблиску до одлуката да го смени тимот.

„Леклер ќе почека, сака да види како ќе поминат првите три или четири трки во 2026 година. Ако резултатите повторно се разочарувачки, тој ќе стане возач на Астон Мартин во 2027 година“, изјави новинарот на весникот „Кориере дела Сера“.

28-годишникот од Монте Карло учествувал на 171 трка во својата кариера, со 50 подиуми, 27 пол позиции и 10 најбрзи кругови. Тој моментално ја зазема петтата позиција во шампионатот, зад водечките Ландо Норис, Оскар Пјастри, Макс Ферстапен и Џорџ Расел.

До крајот на борбата за трофејот, остануваат уште две Гран При трки, во Катар и Обединетите Арапски Емирати.

Глазгов Ренџерс, под притисок на навивачите, ги отпушти извршниот директор Патрик Стјуарт и спортскиот директор Кевин Телвел.

Одлуката стапи на сила веднаш, а клубот им објасни на Стјуарт и Телвел дека „не се вклопуваат во визијата за следното поглавје“.

Цената на лошиот почеток на сезоната прв ја плати тренерот Расел Мартин, кој беше отпуштен во октомври, по само 17 натпревари на клупата.

Но, навивачите продолжија да вршат притисок врз клубот радикално да ги промени работите.

Стјуарт и Телвел се во клубот околу една година, а оттогаш клубот го презеде американски конзорциум предводен од Ендрју Кавана, кој сега го назначи менаџерот Фрејзер Торнтон за вршител на должноста извршен директор додека не се најде замена.

Во периодот кога претходниот тренер беше отпуштен, Ренџерс беа на осмото место на табелата, 11 бода зад Хартс. Од доаѓањето на Дени Рол, разликата се намали и Ренџерс се четврти на табелата.

Тренерот на Интер, Кристијан Киву, изјави дека е задоволен од пристапот и ангажманот на неговиот тим во натпреварот против Милан, но додаде дека „нероаѕурите“ мора да ја подобрат својата игра во остатокот од сезоната, пренесоа италијанските медиуми.

Во неделата, играчите на Интер беа поразени од градскиот ривал Милан со 1:0 во натпреварот од 12-то коло од Серија А. Единствениот гол на натпреварот го постигна Кристијан Пулишиќ во 54-та минута, а 20 минути подцна Хакан Чалханоглу не реализира пенал за Интер.

„Играта и концентрацијата беа таму, не реагиравме добро на контранападите. Единствениот пат кога игравме со долга топка, Милан постигна гол. Но, заслугата за добрата игра им припаѓа на момците кои се обидоа на секој начин. Тоа е духот што сакам да го видам“, рече Киву.

Тренерот на Интер одби да го обвини голманот Јан Зомер за поразот на неговиот тим.

„Не зборувам за поединци, тоа не е фер. За мене, моите играчи се најдобри и никогаш не би покажал прст кон никого бидејќи кога го правиш тоа, мириса на неуспех. Сите сме во оваа ситуација, можевме да играме подобро, но статистиката е таква каква што е. Наша обврска е да се издигнеме“, додаде тренерот на Интер.