Македонија
(Видео) Мицкоски: Ќе се повлечам од политиката ако Филипче најде и еден мигрант, во спротивно да се извини јавно
„Граѓаните треба да знаат каква е состојбата, СДСМ нема тема, притисокот е голем за Венко Филипче однатре и однадвор да си замине и сега наеднаш пиар-тимот му вели – сега темата ќе бидат мигрантите, еве два таблоида во Велика Британија објавија и сега ајде на оваа тема да се закачиме и да ја туркаме мислејќи дека на тој начин политички ќе преживее и ќе собере луѓе околу себе“, вели претседателот на Владата на Република Северна Македонија, Христијан Мицкоски, одговарајќи на новинарско прашање.
Мицкоски им порача на Венко Филипче, на Фрчкоски и на Жерновски дека е спремен да се повлече од политиката доколку најдат и еден мигрант во Македонија, во спротивно, како што рече, тој да се извини јавно.
„Две тези имаше денешната прес-конференција. Првата се мигрантите, а втората е недостигот во буџетот од 1 милијарда евра, околу 60 милијарди денари, и дека договорот со Велика Британија бил тие да ни ја покријат оваа дупка, а ние да прифатиме илегални мигранти. Приближно ова беше вака. Но ајде сега да видиме какви се суштината и вистината. Првин политички да му одговорам на раководството на СДСМ бидејќи спомна пролет, оставам простор до пролет Венко Филипче, заедно со професорот Фрчкоски, со Андреј Жерновски, да бара во Македонија и да најаде мигрант што е дел од овој договор со Велика Британија или каков било договор и ако најде еден, јас трајно ја напуштам политиката. Во спротивно тие да ми се извинат мене, но и на граѓаните, што шират паника без потреба. Мислам дека е фер, еве ова јас го давам како понуда. И ова ќе важи бесконечно, додека сум јас претседател на Владата“, рече Мицкоски и додаде.
„Додека тие зборуваат за милијарди што недостигаат, веќе 10 милијарди во првите пет дена од декември влегоа во буџетот. И сега не се веќе 300 милијарди, туку се 310 милијарди денари приходи. Но, никој од нив не ја коментира расходната страна бидејќи и приходната и расходната страна на буџетот одат паралелно. Оние што следат економија, како и економистите, знаат за што зборувам. За да ви недостигаат во буџетот и да треба вие тој буџетски дефицит да го покриете, потребно е и расходите да бидат во согласност со планирањата. Нам расходите ни се помали, односно штедевме и во име на тоа се случува сето ова што јас денес го зборувам. И приходите и расходите се следат едни со други и на крајот, кога ќе ги споредите капиталните инвестиции и буџетскиот дефицит, тие горе-долу ќе бидат исти, што значи дека ние нема да се задолжиме за да го зголемиме долгот. Напротив, до крајот на годината тој долг ќе биде помал од оној што сме го имале. И еве втора работа ќе кажам, в година треба да вратиме нешто повеќе од 2,2 милијарди евра. Ќе ги вратиме сите пари што тие претходно ги украдоа, и за ‘Стабри“, и за марихуаните, и за ред други скандали што ги имаа во минатото. Се надевам дека сега новиот обвинител и ослободеното Обвинителство многу поефикасно и многу послободно ќе работат отколку овој октроираниот, кој, конечно, заминува, односно ќе замине од таму каде што е сега“.
Мицкоски посочи граѓаните да не се грижат бидејќи нема да има мигранти.
„На крајот да заклучам да не се грижат граѓаните, нема мигранти, буџетот е во одлична кондиција. Македонија е зад Данска, која има 3,9, заедно со Кипар со 3,8 проценти раст на БДП, инфлацијата е за 0,5 проценти помала на годишно ниво во споредба со минатата година и очекувам таа консолидација, односно смирување, да продолжи и во периодот што следува“, истакна Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дрога чувана под шанк во кафеана: четири лица под истрага за илегална препродажба на марихуана и хашиш во Валандовско
Основното јавно обвинителство Гевгелија донесе Наредба за спроведување истражна постапка против осомничен кој во временскиот период од октомври 2025 година до 23.01.2026 година, во угостителски објект во валандовското село Јосифово, неовластено заради продажба држел 121,40 грама марихуана, 751,99 грама хашиш и 37,44 грама мешавина од хашиш и марихуана.
Дрогата била спакувана во најлонски и книжни омоти ставени во пластична кофа со капак под работната иноксна маса во објектот. Полициски службеници пронашле и една пластична вага со остатоци од наркотична дрога.
Од тие причини постои основано сомнение дека осомничениот сторил кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.
За истото кривично дело се осомничени уште 3 лица, кои меѓусебно препродавале наркотична дрога марихуана во непосредна близина на плантажи со лозје во Јосифово. На 21 јануари едниот осомничен продал 679,97 грама марихуана на вториот осомничен, а тој потоа неовластено ја држел во штала.
Следниот ден дрогата ја однел кај третото лице во селото Пирава, кое требало да ја препакува и да посредува во купопродажбата на марихуаната на крајни корисници – зависници. При претресите полициски службеници ја пронашле дрогата, како и уште дополнителни 65,13 грама марихуана, 110 семки кои потекнуваат од растението канабис и вага со остатоци од наркотична дрога.
Јавниот обвинител до судијата на претходна постапка од Основниот суд во Гевгелија достави предлог за определување мерка притвор за сите четворица осомничени дилери.
Македонија
Комисијата за одбрана и безбедност со претставници на Израел: нагласена важноста на соработката за зајакнување на националната и регионалната безбедност
Комисијата за одбрана и безбедност денеска одржа работна средба со претставник на Министерството за одбрана, Елај Калиф, и амбасадорката Вивиен Аисен на Државата Израел, на која се дискутираше за соработката во областа на одбраната и безбедноста. Посебен акцент беше ставен на соработката во рамките на НАТО, како и на размената на искуства и добри практики од областа на одбраната.
Претставникот на Министерството за одбрана на Државата Израел ги презентираше глобалните безбедносни тенденции кои влијаат врз Израел, како и можностите за соработка со земјите од Балканот и Балтикот. Во тој контекст, беше истакната потребата од започнување структуриран дијалог во областа на одбраната и безбедносната поддршка.
Претседателот на Комисијата, Павле Арсоски, ја нагласи претходната соработка со Центарот за обука на пилоти, посочувајќи ги придобивките и значењето на оваа соработка за унапредување на одбранбените капацитети.
Пратениците, во своите излагања, ја потенцираа суштинската важност на соработката со Државата Израел во областа на одбраната, како значаен елемент за зајакнување на националната и регионалната безбедност и стабилноста на Балканот.
Македонија
Појава на магла на Стража, државните патишта проодни и безбедни за сообраќај
Сообраќајот на државните патишта се одвива непречено, по влажни коловози.
Намалена видливост поради појава на магла до 100 метри има на планинскиот премин Стража.
Сите државни патишта се проодни и безбедни за сообраќај, соопшти АМСМ.
Сообраќајот се одвива непречено, но поради врнежите од снег се препорачува внимателно возење.
Екипите на ЈП Македонија пат се целосно екипирани, ставена е на располагање потребната механизација и работна сила и во континуитет на терен се врши расчистување на снегот. Во соработка со ЈП за државни патишта и Министерство за транспорт се вршат координирани активности со цел да се обезбеди непречено и безбедно одвивање на сообраќајот.
Покрај внимателно и совесно управување со возилата, се препорачува задолжително употреба на зимска опрема, почитување на поставената сообраќајна сигнализација и прилагодена брзина согласно условите на патните правци.
Исто така се препорачува навремено информирање од страна на сите информативни центри за условите и сообраќајот на државните патишта.
Кооридинираните активности на надлежните институции продолжуваат и во текот на наредниот перидод, со цел да се обезбеди непречено и безбедно одвивање на сообраќајот.
Од 15.11.2025 година започна законската обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2026 година.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

