Шеснаесет лица беа отруени денес, од кои 12 беа деца поради истекување на јаглерод моноксид во градинка во Милано.

Истекувањето се случи утрово, а 12 деца, двајца родители и двајца наставници беа отруени, објави противпожарната служба, додавајќи дека никој не е сериозно повреден, пренесува „Анса“.

Полицијата и пожарникарите интервенираа на лице место, заедно со експерти од единицата за биолошка и хемиска заштита (NBC) кои моментално работат на утврдување на причината за истекувањето, најверојатно предизвикано од дефект на бојлер.

Порталот „Милано тудеј“ објавува дека инцидентот се случил непосредно пред 9:20 часот наутро.

Зградата со површина од околу 150 квадратни метри беше веднаш евакуирана, а децата и наставниците се во тријажната зона каде што здравствените работници ја проценуваат можноста за хоспитализација поради нивните симптоми, пренесува Танјуг.

Претседателот на САД, Доналд Трамп, денес изјави дека неговата администрација наскоро може да има добри вести во врска со нејзините напори за ставање крај на речиси четиригодишната војна во Украина.

„Мислам дека се справуваме многу добро со Украина и Русија. Ова е прв пат да го кажам тоа.

Мислам дека може да имаме добри вести“, изјави Трамп пред новинарите во Овалната соба на Белата куќа, објави Ројтерс. Специјалниот американски претставник Стив Виткоф ќе присуствува на преговорите со делегациите на Русија и Украина во Абу Даби, објави денес Белата куќа.

Претходно, Зеленски објави дека следната рунда трилатерални преговори меѓу Украина, Соединетите Американски Држави и Русија за крајот на војната во Украина ќе се одржи на 4 и 5 февруари во Абу Даби, во Обединетите Арапски Емирати.

Портпаролот на Кремљ, Дмитриј Песков, денес изјави дека одложувањето на втората рунда мировни преговори за Украина во Абу Даби е резултат на несогласувања во распоредот на делегациите и дека нови разговори ќе се одржат на 4 и 5 февруари, пренесува Танјуг. На претходната средба во Абу Даби од 23 до 24 јануари, фокусот на преговорите беше ставен на крајот на војната и понатамошниот процес на мировни договори.

Норвешкиот премиер Јонас Гар Сторе го отфрли неодамнешното тврдење на американскиот претседател Доналд Трамп дека САД „никогаш не добиле ништо“ од НАТО. Зборувајќи на Безбедносната конференција во Осло во понеделник, Сторе рече дека колективната безбедност се заснова на личен интерес, а не на добротворност, објави агенцијата Анадолија.

„Звучи сосема погрешно кога американскиот претседател во Давос вели дека ние сме дале сè на НАТО, а Алијансата не дава ништо за возврат. Тоа е неточно. Едноставно неточно“, рече Сторе, додавајќи дека колективната безбедност „не е добротворна организација“, туку нешто што е „создадено од личен интерес“.

Сторе ги наведе американските закани со царини кон сојузниците и обидот за преземање на Гренланд како примери за промени во светот, опишувајќи ги како алатки за политички притисок. Затоа, тој ја нагласи потребата од продлабочување на европската соработка во областите на безбедноста, одбраната и трговијата, како и од преиспитување на улогата на САД во европската безбедност.

„Нашата цел е мудро да трошиме за одбрана, така што таа навистина ќе се вклопи во регионалните планови. Но, ќе направиме повеќе. Стратешки ќе ја продлабочиме нашата соработка со нашите водечки европски партнери, со Обединетото Кралство“, рече тој.

„Не заборавајте, пријатели, ЕУ е клучна за нашата безбедност. Но, земјите-членки на ЕУ претставуваат 20 проценти од воениот капацитет на НАТО. Околу 80 проценти доаѓаат надвор од ЕУ: САД, Канада, Турција, Велика Британија, Норвешка“, додаде тој.