Џанлука Престијани е суспендиран за реваншот од плејофот на Лигата на шампионите против Реал Мадрид.

Денес, УЕФА потврди во официјално соопштение дека фудбалерот на Бенфика е суспендиран поради истрагата што е започната против него.

Познато е дека Винисиус Жуниор го обвини Аргентинецот дека го навредувал на расна основа, УЕФА веднаш започна истрага, и иако таа не е завршена, има право да го суспендира, што го искористи.

УЕФА се повика на правилото од својот правилник дека може да суспендира играч против кого се води истрага, а Престијани нема да може да му помогне на својот тим, во реваншот во Мадрид.

Натпреварот Реал – Бенфика е закажан за среда во 21:00 часот.

Foto/ EPA

Од денеска, и официјално, шпанскиот стручњак, Жозеп Мариа Берокал е селектор на машката сениорска репрезентација на Македонија.

Новиот македонски селектор веќе почна со работа, одржа два тренинга и ги изнесе своите први импресии пред претставниците на медиумите:

„Ви благодарам за можноста да бидам тука, привилегија е да бидам селектор на Македонија. Знам дека е краток периодот за подготовки, но во овие само два тренинга со репрезентацијата, видов дека има голем простор за напредок.

Мислам дека треба да размислуваме на долги патеки, да го унапредуваме тимот и важно е за иднината, кои млади играчи ќе доаѓаат во националниот тим“.

Берокал ги објасни „конекциите“ преку кои дојде до стартот на оваа, сите се надеваат, долгорочна соработка:

„Што се однесува до македонската кошарка, поврзан сум со неа преку Владо Илиевски, му бев тренер пред 23 години. Некои од играчите во репрезентацијата ги познавам, му бев тренер на Војдан Стојановски во Украина, некои ги знам од Шпанија.

Среќен сум, знам дека на почетокот нема да биде лесно, ќе биде долг процес, но ќе се обидеме да направиме максимум од овие играчи.

Кое ќе биде нивото што ќе го достигнеме, не знам, но верувам во сите. На кошаркарите им реков дека треба да се натпреваруваат сами со себе, да бидат подобри, да имаат шампионски менталитет. Да не гледаме премногу далеку во иднината, да се фокусираме на она што ни претстои“ – рече Берокал на денешната промоција.

Извор и Фото/ mkd.basketball

Претседателот на Барселона, Џоан Лапорта, реагираше на кривичната пријава поднесена против него од член на клубот пред Националниот суд, во која поранешниот челник е обвинет за наводно перење пари и нелегално собирање провизии.

Во интервју за Радио Каталуња, Лапорта ги отфрли сите обвинувања, нарекувајќи ги обид да се дискредитира пред претседателските избори на клубот.

Според тужбата, која прв ја објави весникот „Ел Периодико“, наводно постоела мрежа на компании со седиште во Шпанија, Кипар, Дубаи, Хрватска и Естонија, преку кои, како што се тврди, биле исплаќани нелегални провизии во рамките на неколку зделки склучени за време на мандатот на Лапорта.

Меѓу спорните операции се продолжувањето на договорот за спонзорство со компанијата „Најки“, како и работите за реновирање на стадионот „Камп Ноу“.

Се очекува Националниот суд наскоро да го додели случајот на еден од судиите, кој ќе одлучи дали барањето ќе биде прифатено и дали ќе биде покрената официјална истрага.

Лапорта тврди дека станува збор за организирана кампања насочена кон поткопување на неговата кандидатура.

„Долго време се обидуваат да предизвикаат штета и да го оцрнат изборниот процес и Барселона. Тие создаваат конструкција и шират приказна што не е вистинита“, рече тој.

Зборувајќи за транспарентноста на работењето на клубот, Лапорта нагласи дека постојат ограничувања кога станува збор за објавување на одредени договори. Лапорта негираше дека извршил какви било трансфери на пари во Дубаи или Кипар, но најави можност за судска постапка против оние кои, како што вели тој, клеветат.

Покрај Лапорт,а во извештајот се споменуваат и поранешни членови на неговата администрација, вклучувајќи ги Рафаел Јусте, Марија Елена Форте, Едуардо Ромеу и Феран Оливео.

Фудбалскиот клуб Барселона објави дека информациите за извештајот поднесен против претседателот Џоан Лапорта пред Националниот суд се „радикално лажни и неосновани“.

Реагирајќи на обвинувањата објавени од весникот „Ел Периодико“, клубот изјави дека на 19 јануари ги информирал новинарите и организацијата „Проект за известување за организиран криминал и корупција“ (OCCRP) дека информациите се неточни и, очигледно, се засновани на фалсификувани или сериозно манипулирани документи.

Барселона соопшти дека не исклучува покренување судска постапка против подносителот на барањето за лажно пријавување и клевета, како и против медиумите што ја објавија веста.

Клубот нагласи дека сè се случува во екот на изборниот процес и оцени дека објавувањето на вакви информации би можело да претставува обид за влијание врз регуларноста на изборите и волјата на членовите.

Foto/ depositphotos