Македонија
Груевски: Соработката со ОАЕ ќе придонесе за подобра трговска размена и нови инвестиции
Премиерот Никола Груевски и владината делегација во рамки на посетата на Обединетите Арапски Емирати, во понеделникот оствари посета на Стопанско-индустриската комора на Дубаи, каде што се сретна со претседателот на Комората, Маџид Саиф Ал Гураир.
Комората на Дубаи е најголема стопанска групација во Емиратот во која членуваат над 170 илјади стопански субјекти чиј што вкупен годишен обрт на средства надминува 100 милијарди американски долари. Членовите на владината делегација ги претставија можностите за инвестирање кои ги нуди Македонија.
Груевски истакна дека е од исклучително значење градењето и унапредувањето на добрите политички односи да биде проследено со интензивирање на економските односи помеѓу Македонија и Обединетите Арапски Емирати.
„Целта на нашата посета е да ги унапредиме економските и политичките односи меѓу нашите земји. Всушност, ние немаме некое отворено политичко прашање, но преку повеќе контакти можеме да ги подобриме нашите врски, нашата политичка соработка и има многу простор да се подобри економската соработка. Сето тоа ќе придонесе да се подобри најпрво трговската размена, па потоа инвестициската активност и другите форми на економска соработка“, изјави премиерот Груевски.
Претседателот на македонската Влада Груевски истакна дека Република Македонија нуди најниски трошоци за правење бизнис во Европа, кои се карактеризираат со најнискиот даночен пакет во Европа, и со најниска ефективна даночна стапка во светот во износ од 7,4 отсто.
Додаде дека хендикепот со малиот национален пазар е надминат со потпишувањето на договори за слободна трговија со сите земји од континентот Европа, со кои се овозможува пласирање на производите кои се произведени во Македонија на пазар од над 660 милиони потрошувачи, без плаќање на царини и останати надворешно трговски такси.
Вицепремиерот Владимир Пешевски се задржа на презентација на квалитетот на едуцираната работна сила и на отвореноста на Владата за поддршка на приватните бизниси, како и на намалувањето на административните бариери за водење бизнис што се реализираше преку проектот Регулаторна гилотина.
Претседателот на Стопанско-индустриската комора на Дубаи, Ал Гураир, позитивно ги оцени поволностите кои нашата земја ги овозможува за странските инвеститори, истакнувајќи дека посетата на Груевски на Емиратите доаѓа во позитивен момент и е од исклучително значење за унапредување на меѓусебната соработка.
„Активно работиме на меѓународната експанзија и на идентификување на нови пазари за нашите бизнис членки и оваа посета не можеше да дојде во подобро време затоа што ние секогаш бараме нови можности и релации. Инвестициските можности кои Македонија ги нуди во сферата на агробизнисот, производството на храна, информатичко-комуникациските технологии, текстилната индустрија и во индустријата за автокомпоненти имаат синергија со Дубаи. Веруваме дека има мноштво можности за понатамошна билатерална соработка. Во ситуација кога трговијата помеѓу двете земји е недоволно развиена, треба да работиме на нејзино интензивирање и да капитализираме заедничка корист за двете земји, базирани на средината и политиките кои ги правиме“, истакна Маџид Саиф Ал Гураир.
Директорот на Дирекцијата за технолошко индустриски развојни зони Виктор Мизо, ги истакна поволностите кои се овозможуваат за реализација на инвестиции во нив, како што се даночните ослободувања.
„Емиратот Дубаи располага со економска моќ од околу 100 милијарди долари годишен бруто домашен производ, што значи дека тука не само што е развиен процесот на привлекување на инвестиции од целиот свет, туку уште повеќе луѓето и компаниите од Дубаи разгледуваат на кој начин подобро да го пласираат нивниот капитал во странство. Затоа денес остваривме средба и со Стопанската комора на Дубаи и она што Македонија го претставува пред оваа комора е многу значајно за да компаниите членки најдат соодветен интерес, зависно од сферата на работа, за да ја искористат Македонија за пласирање на своите производи или преку нашата држава да стигнат до европскиот пазар“, изјави директорот на Дирекцијата за технолошко индустриски развојни зони Виктор Мизо./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ковачевски: Поддршката за домашните компании продолжува, СДСМ нема да се откаже од подобра и европска иднина за државата
Претседателот на Социјалдемократскиот сојуз на Македонија, Димитар Ковачевски, денеска оствари средба со претседателот на Стопанската комора на Северозападна Македонија, Менди Ќура, и со членовите на комората, на која што се разговараше за ефектите од досегашните економски мерки, за идните мерки на СДСМ, како и за нивните предлози, за тоа што е потребно да се направи во следниот период за развој на приватниот сектор и економијата.
Ковачевски по средбата, во изјава за медиуми, речедека со сите стопански комори досега имало успешна соработка, потенцирајќи дека и во време на најтешки кризи се Владата предводена од СДСМ, носеше правилни мерки за заштита на економијата, ликвидноста на компаниите и стандардот на граѓаните.
„Во тоа време направивме девет пакети антикризни мерки, во кои што учествуваа секогаш и претставниците на Стопанските комори, вклучително и Стопанската комората на Северозападна Мкаедонија. На тој начин успеавме да спасиме 80.000 работни места во 20.000 компании. Подоцна продолживме со зголемување на минималната плата, за која што секогаш имаше поддршка од оваа комора меѓутоа и од другите, и до зголемување дојде и на просечната плата“, рече Ковачевски.
Во однос на поддршката за домашните компании, Ковачевски посочи дека тоа е еден од приоритети на СДСМ и дека преку Законот за финансиска поддршка на инвестиции, домашните компании за прв пат добија поддршка од држвата, која со новата четиригодишна програма на СДСМ и Коалицијата за европска иднина, ќе се зголеми.
„Во текот на изминатите години, како Влада имаме обезбедено 100 милиони евра финансиска поддршка за домашните компании. За наредниот четиригодишен мандат, планираме над 180 милиони евра, што ќе отвори нов циклус на инвестиции кај домашните компании“, рече Ковачевски.
На средбата, како што кажа Ковачевски, се разговарало и за клучните реформи во државата кои што се поврзани со евроатлантските интеграции на Северна Македонија, при што Ковачевски потенцираше дека СДСМ како партија не се откажува од интегрирањето на државата во ЕУ, согласно со преговарачката рамка која што е усвоена.
„Веќе оваа недела ќе биде усвоена реформската агенда која што е дел од Планот за раст на Западен Балкан, во кој што точно ќе бидат наведени реформите кои што ќе треба да се прават со цел да се повлекуваат траншите за Македонија. Тоа ќе бидат реформи во сите области од економијата, јавната администрација до правосудството и добрососедските односи“, истакна Ковачевски.
При тоа, Ковачевски потенцираше дека најголем дел од предлозите на Стопанската комора на Северо-западна Македонија, кои што беа дадени уште пред изборите, се веќе имплементирани во четиригодишната програма на СДСМ и Коалицијата за европска иднина.
„Значи тоа зголемување понатамошно на минималната плата, зголемување на просечната плата и секако поддршка нова на индустријата, особено на компании кои што се извозно ориентирани и определување на доволна сума на финансиски средства за капитални инвестиции во државата. Ние имаме предвидено 3,5 милијарди од кои што 2,7 милијарди се за инфраструктурни проекти во државата во наредниот четиригодишен период.Тука би го додал и земјоделството, предвидуваме поддршка во земјоделството во четиригодишниот период од 1,3 милијарди евра, што секако ќе значи зголемено производство на храна, зголемен извоз на храна и зголемен извоз на земјоделски производи“, исткана претседателот на СДСМ, Димитар Ковачевски.
Економија
АСО: Владата преку измени на тарифникот да ги намали цените на полисите за задолжително осигурување од автомобилска одговорност
Агенцијата за супервизија на осигурување (АСО) ја охрабрува Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.
АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност.
Клучните аргументи против зголемување на цената се наведени во анализата што е доставена до надлежната комисија при Министерството за финансии.
Зголемувањето на цената на осигурувањето не е во функција на јакнење на заштитата на осигурениците. Напротив, како што се додава, ова зголемување на цените е само и исклучиво во функција на покривање на трошоците за оперативно работење на компаниите за осигурување.
Економија
Финансии побара до крајот на денов да се стави во мирување поскапувањето на осигурувањето на автомобилите при регистрација
Комисијата за осигурување од автомобилска одговорност на денешната седница го разгледа доставениот извештај од Националното биро за осигурување поврзано со зголемените цени по основ на премија за вршење на дејноста на осигурување.
На состанокот Комисијата му укажа на Националното биро за осигурување и на регулаторот Агенцијата за супервизија на осигурувањето во текот на денешниот ден да им предложи на друштвата за осигурување до крајот на денешниот ден да ги стават во мирување одлуките за зголемување на трошоците и да ги вратат на ниво од пред 25 април 2024 година и да ја известат Комисијата во текот на денешниот ден. Ваквото укажување е со цел обезбедување транспарентност и предвидливост на процесите, имајќи предвид дека компаниите ниту поединечно, ниту преку Националното биро за осигурување го немаат известено регулаторот, односно Агенцијата за супервизија на осигурувањето ниту Комисијата дека планираат да ги зголемат трошоците по основ на премијата за вршење на дејноста на осигурување, и на тој начин не е обезбеден инклузивен пристап и кооперативност со сите засегнатите страни при донесување на одлуките.
Комисијата за осигурување од автомобилска одговорност на денешната седница побара од регулаторот, односно Агенцијата за супервизија на осигурувањето, да изготви анализа за оправданоста и исправноста на донесените одлуки од страна на друштвата за осигурување, во насока на заштита на крајните корисници, а со цел обезбедување сеопфатна информација за донесување објективна и транспарентна одлука. Во правец на ова е укажувањето кон регулаторот за ставање во мирување на одлуката за зголемување на цената на трошоците од страна на друштвата за осигурување. Истовремено, побара од друштвата за осигурување преку Националното биро да дадат свој придонес во изготвување на анализата и предлог-заклучоци за промена на Тарифата на премии за осигурување на сопствениците на моторни возила од одговорност за штети предизвикани на трети лица.
На состанокот, Комисијата одлучи во најскоро време по доставување на анализата од регулаторот, односно Агенцијата за супервизија на осигурувањето, да свика седница и да ја разгледа доставената Информација и да донесе соодветни заклучоци.