Откако анкетата на Reuters/Ipsos од минатиот петок покажа дека кандидатот на Републиканската партија за американските претседателски избори на 8-ми ноември, Доналд Трамп ја престигнува според популарноста својата противкандидатка од Демократската партија, Хилари Клинтон, и истражувањето на јавното мнение кое го објави телевизијата CNN во вторникот покажува водство на њујоршкиот претприемач пред поранешната државна секретарка.

Според резултатите од анкетата што за CNN телефонски ја спровел социолошкиот институт ORC на примерок од 1.001 полнолетен граѓанин во периодот од 1-ви до 4-ти септември, во моментов 45 отсто од испитаниците се подготвени на изборите во ноември да гласаат за републиканскиот кандидат за Белата куќа, Доналд Трамп, додека 43 отсто ја поддржуваат демократката Хилари Клинтон. Во почетокот на август, пак, во анкетата на CNN и ORC Клинтон имаше предност од 9 процентни поени, односно 52 отсто наспроти 43 за Трамп.

Анкетата од вторникот, исто така, ги покажува разликите меѓу приврзаниците на двајцата кандидати за нов претседател на САД. Така, жените повеќе ја поддржуваат Клинтон, а Трамп може да смета на поддршката на машките гласачи. Кога станува збор за старосната возраст на електоратот, помладите Американци ја фаворизираат Клинтон со 54 отсто, а повозрасните му даваат предност на Трамп. Белите гласачи со 55 отсто предност му даваат на републиканскиот кандидат, додека другите малцински заедници со 71 отсто довербата ја имаат во демократската кандидатка. И пообразованите гласачи предност ѝ даваат на Клинтон.

„Лидерството на Клинтон во анкетите е ослабено, иако последниот месец беше тежок за Трамп“, забележува во коментарот CNN. Телевизијата потсетува дека милијардерот последните неколку седмици се соочува со остри критики и дома и од странство поради стратегијата на неговиот изборен штаб, и оти поради тоа беше принуден ги смени првите луѓе на својата кампања. Покрај тоа, и редица влијателни републиканци јавно објавија дека ќе ја поддржат Клинтон на изборите во ноември.

Социолозите сметаат дека причина за слабеењето на рејтингот на Клинтон е скандалот кој не стивнува во врска со нејзината службена преписка во времето кога беше државна секретарка водена преку приватната електронска пошта и од приватен сервер, со што ги прекршила и законите за државната администрација, а противниците ја обвинуваат дека ја загрозила и националната безбедност бидејќи водејќи ја преписката на службени материјали кои се класифицирани како доверливи преку приватната пошта ги изложила на можност до нив да дојдат странски разузнавачки служби и хакери.

Покрај тоа, во последните денови се засили и скандалот во врска со активностите на фондацијата на семејството Клинтон „Clinton Foundation“. Имено, оваа добротворна организација, којашто е основана од нејзиниот сопруг поранешниот американски претседател Бил Клинтон во 2001 година, по неговото напуштање на Белата куќа, успеала да собере веќе повеќе од 2 милијарди долари, вклучително и од донации од политичките поддржувачи на семејството Клинтон. Политичките противници ја обвинуваат поранешната шефица на американската дипломатија дека пружала услуги на некои поединци и на цели држави во замена за префрлање солидни суми пари на сметката на фондацијата./крај/мф/сн

Извор: Макфакс