Специјалното јавно обвинителство во текот на утрешниот ден, во вторник, ќе поднесе извештај за првите шест месеци од својата работа до Собранието и до Советот на јавните обвинители и овој извештај ќе биде јавно објавен, соопштуваат од СЈО.

Оттаму не прецизираат точно кога ќе биде поднесен извештајот, но Специјалната јавна обвинителка, Катица Јанева нема  јавно да го презентира и да го образложува.„Законот е јасен и вели дека извештајот треба да биде поднесен до институциите“, велат од Обвинителството.Специјалното обвинителство досега има отворено три истражни постапки, за предметот „Титаник“, против членови на општинската изборна комисија во Чаир и против судии во Управниот суд. Според последното соопштение во јавноста, СЈО има отворено 15 нови предистражни постапки, но најавуваат дека во вторник ќе го соопштат официјално вкупниот број на овие постапки. Новите предистражни постапки се однесуваат на проверки во врска со финансирањето на медиумите, злоупотреби на постапки за јавни набавки, даночно затајување, перење пари, разни коруптивни дејствија и злоупотреби на службена положба и овластувања, финансиски истраги, злоупотреби на постапките што се однесуваат на градежни работи.Во предметот „Титаник“ Обвинителството бараше притвор за девет лица за изборни измами, меѓу кои и против поранешната Министерка за внатрешни работи, Гордана Јанкулоска, поранешниот Министер за транспорт и врски, Миле Јанакиески, генералниот секретар на Влада, Кирил Божиновски, градоначалникот на Пустец, Едмонд Темелко и други лица. На ниеден од нив не им беше одреден притвор. Специјалното обвинителство во последното соопштение се пожали дека голем број институции не соработуваат со нив и ја опструираат нивната работа. „Од институциите што одбиваат соработка со ова јавно обвинителство првенствено би ги споменале Агенцијата за катастар на недвижности, Управата за безбедност и контраразузнавање, односно Одделот за оперативно техничка поддршка (познат како Петта управа), Единицата за заштита на сведоци при МВР, Општина Битола, одредени министерства, а на оваа листа се надоврзуваат и Управниот суд, Основното јавно обвинителство Скопје и Основното јавно обвинителство за гонење на организиран криминал и корупција“, стоеше во соопштението на СЈО.Републичкото обвинителство одби да им предаде пет предмети на СЈО со образложение дека не произлегуваат од прислушуваните разговори./крај/мф/ффс

Извор: Макфакс