Македонија
Чаушот: Ме тепаа за да кажам дека УСБ-то ми го дале Заев и Верушевски

Захир Бекири – Чаушот кој е обвинет за аферата фалсификувани лични карти пред да почне судењето за овој случај побара збор од судијата и обелодени дека бил повикан во Основното јавно обвинителство каде бил психички малтретиран, а потоа и физички нападнат.
На 26 февруари во 10 часот од затворот „Идризово“ каде Бекири одлежува затворска казна го однеле во Обвинителството за случајот со фалсификуваните лични карти.„Таму беа три лица, директорот на УБК, (Љупчо) Андоновски кој се претстави со лажно име, Александар, јавниот обвинител Јован Цветановски и уште едно друго лице. Обвинителот Цветановски со висок тон ми се закани дека доколку не кажам дека УСБ-то (со снимени разговори) ми го дале Зоран Заев и Зоран Верушевски ќе ми ја затворат целата фамилија“, тврди Бекири. Бекири не прифатил да потпише такво нешто и тврди дека бил малтретиран се до 16 часот во обвинителството. „Андоновски ми рече „Господ нека ти е на помош““, раскажа Бекири. После тоа тој бил однесен во канцеларијата на обвинителката, Наташа Гоџовска која го води случајот и кај неа телефонски се слушнал со својот адвокат Мирослав Вуиќ, кој не бил во земјава, и во договор со него потпишал дека е приведен во обвинителството и дека бара присуство на својот адвокат при давањето исказ.„Потоа бев вратен во другата соба кај трите лица. И јас малку претерав, ги опцув, можеби ги провоцирав. Тројцата се нафрлија и бев тепан“, рече Бекири.Првото судско рочиште за овој случај се одложи бидејќи адвокатот Вуиќ побара увид во доказите бидејќи ниту тој ниту обвинетиот не ги виделе доказите за овој случај којшто се води по скратена постапка. Обвинителката Гоџовска објасни дека Обвинителството не е обврзано да му ги достави доказите до одбраната, но се согласи одбраната и обвинетиот да направат увид и препис на доказите коишто се наоѓаат во Основниот суд Скопје 1. Бекири при барањето на збор од судијката побара изземање на јавната обвинителка, но подоцна во консултација со својот адвокат го повлече предлогот, бидејќи судијката ќе требаше да одлучува најпрвин за тоа и одбраната немаше да има можност да ги види доказите. Бекири не се најде на списокот на помилувани лица од страна на претседателот, Ѓорге Иванов кој ги запре кривичните постапки за сите политичари и нивни соработници. Според адвокатот Вуиќ со тоа се демантираат шпекулациите во јавноста дека Бекири изработувал фалсификувани лични карти.„Захир Бекири во јавноста е познат како фабрикант на лаги, документи и пасоши, близок соработник на претседателот на СДСМ, Зоран Заев, член на СДСМ, меѓутоа и покрај тоа јас не го прочитав во одлуката на Ѓорге Иванов. Иванов го заборавил или тоа е демант на сите шпекулации кои се ширеа во јавноста дека фабриката на лаги е на сосема друго место?“ праша Вуиќ.Захир заедно со својот брат Имер се сомничат дека стојат директно зад аферата со фалсификуваните лични карти.Судењето се одложи за на 25 април, а одбраната ќе ги разгледува доказите на 18 април. Бекири се наоѓа во притвор за ова дело иако претходно одлежувал затворска казна за друго дело. Оваа затворска казна е прекината и е префрлен во притвор за овој случај./крај/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити губи со 10 проценти разлика, тоа ги тера да фабрикуваат афери за самитот на ОБСЕ, каде што е сѐ чисто, вели Османи

Кандидатот за градоначалник на Чаир, Бујар Османи, вели дека коалицијата „Вреди“ ги има добиено анкетите, во кои, како што нагласува, јасно се гледа дека разликата меѓу него и нивниот кандидат изнесува 10 %.
„И сега се во паника. Затоа се обидуваат да отвораат прашања за кои граѓаните вообичаено нив ги обвинуваат дека се корумпирани и дека 20 години на најкоруптивен начин ја воделе општината“, изјави Османи.
Османи потсети дека уште пред да заврши самитот на ОБСЕ лично ја доставил целата документација до релевантните институции.
„Јас лично ја доставив целата документација во Државната комисија за спречување на корупцијата и во Обвинителството. ДКСК, по неколку недели, излезе со констатација дека нема никакви неправилности. И Јавното обвинителство потврди дека нема неправилности. Ниту имало ревизија на ОБСЕ, туку на ‘Борис Трајковски’, и тоа во врска со тоа како тие ја прифатиле опремата“, појасни Османи.
Истакна дека неговиот најголем политички капитал останува неговиот кредибилитет: „Ако има нешто по што јас се разликувам, тоа е фактот дека никој, во целата моја политичка кариера, не може да ме обвини за корупција. Тоа е мојот најголем капитал во политиката, политичкиот интегритет и човечкиот кредибилитет“, истакнува Османи.
Македонија
(Видео) Лефков: СДС преку „Еразмус+“ ја финансирале и сопругата на Апасиев – пред камери противници, зад камери соработници

СДС преку Еразмус + ја финансирале и сопругата на Апасиев, пред камери противници, зад камери соработници. Додека јавно глуми противник на СДС, Димитар Апасив немал проблем со тоа што неговата сопруга барала пари од европските фондови и владата на Ковачевски преку Националната агенција за Еразмус+, истакна на прес-конференција Миле Лефков, пратеник и член на ИК на ВМРО-ДПМНЕ.
„Имено токму од Националната агенција за Еразмус+, кога со неа управува Марко Ѓорѓиевски од СДС, сопругата на Апасиев, Тамара Јованов Апасиева, добива европски пари.
Додека Апасиев пред камерите глуми противник на СДС, зад затворени врати неговиот семеен круг бил дел од системот кој го водела власта на СДС, добивал финансии и уживал привилегии“.
Лефков прашува, како токму Тамара Јованов Апасиева, покрај илјадници млади, универзитетски кадри и активисти од цела Македонија е изберена да добие поддршка од СДС.
„Дали ова е класичен пример на политички договори меѓу СДС и Левица?
Дали во јавноста играат улога на „жестоки противници“, а во позадина функционираат заедно, делат фондови и позиции?
Дали оваа соработка СДС – Левица ќе ја гледаме и на овие избори, и купен ли е Апасиев со парите од Еразмус + да одработува за СДС“, додава пратеникот на ВМРО-ДПМНЕ.
Македонија
(Видео) СДСМ: Орце молчи за дивоградбите, гледаме нова Арсовска под диктат на Мицкоски

Додека Скопје се гуши во урбанистички хаос, Орце Ѓорѓиевски, кандидатот на ВМРО-ДПМНЕ, молчи за дивоградбите во Чаир, обвини Јовица Јанковиќ од СДСМ.
„Над 150 незаконски дивоградби, криминал тежок над 220 милиони евра, узурпиран простор, маала претворени во бетонски џунгли и загрозена безбедност. Тоа е резултатот на политиките на коалициските партнери на ВМРО-ДПМНЕ што денес Орце ги одобрува. Зошто Орце воопшто не нуди решение за проблемот со дивоградбите? Дали поради бизнис интересите на власта? Таа ли улога Мицкоски му ја додели на Орце овој пат?“, праша тој.
Според Јанковиќ, дивоградбите не се само локална приказна туку со ВМРО-ДПМНЕ урбаното дивеење стана тажно скопско секојдневие.
„Секогаш кога ВМРО-ДПМНЕ владее со градот ова се случува, го претвораат во свој партиски вилает за да ги спроведуваат бизнис агендите. Со Орце скопјани можат да очекуваат само нови разочарувања, уште поголем хаос, нови бизнис-договори на грбот на граѓаните. Наместо решенија дивоградбите ќе продолжат, никој нема да одговара и наместо развој на Скопје ќе гледаме партиски диктат за богатење на поединци. На скопјани им треба вистински градоначалник кој ќе се бори со урбаната мафија, а не кој ќе ја штити. На Скопје не му треба нова Арсовска, под диктат на Мицкоски“, рече Јанковиќ.