Култура
КИЦ на Република Македонија во Софија со богата програма и во наредниот период
Во Културно-информативниот центар на Република Македонија во Софија во периодот што следува, со поддршка од Министерството за култура, ќе се реализираат повеќе културни настани преку кои македонската култура ќе биде претставена во бугарската престолнина.
На 29 април, во организација на Националната галерија на Македонија, ќе се реализира изложбата „Акварели” на македонскиот ликовен уметник Илија Кавкалески.
По успешното прво учество на Република Македонија на големата поетска манифестација на европските литератури, и годинава на 14 мај македонската литература ќе биде претставена на манифестацијата „Литературна ноќ” на која ќе учествуваат сите странски културни центри и институти што имаат свое седиште во Софија.
На овој настан, кој е во организација на Европската асоцијација на културни институции и кој по третпат се одржува во Софија и во десетина поголеми градови во Бугарија, годинава ќе биде презентирана стихозбирката „Раѓање на зборот” од Ацо Шопов, преведена на бугарски јазик. Исто така, на 15 мај во ова македонско културно катче во Софија е планирано да биде претставена ликовната изложба „Орнаментите на Атанас Атанасоски и Марина Лешкова” во организација на Музејот на современата уметност од Скопје.
Според информациите од Културно-информативниот центар, годинашната програма, која е содржински богата и квалитетна, ја проследиле голем број посетители, меѓу кои и претставници на странски амбасади во Софија, претставници на други културни центри во оваа метропола, но и странци кои живеат и работат во Софија.
Културно-информативниот центар во Република Бугарија е основан на 27 април 2005 г. со одлука на Владата на Република Македонија, во согласност со Законот за надворешни работи и Спогодбата меѓу Владата на Република Македонија и Владата на Република Бугарија.
КИЦ на Република Македонија во Софија располага и со богат библиотечен фонд со над 4000 наслови и има редовни посетители кои изнајмуваат книги, користат бесплатен интернет или добиваат рекламен туристички материјал со кој располага Центарот. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.