По вчерашната одлука на претседателот Ѓорге Иванов за прекинување на кривичните постапки против сите политичари од власта и од опозицијата, Основниот суд Скопје 1 доставило одлука до затворската институција за потполно ослободување единствениот осуден за делата кои произлегуваат од „прислушуваните разговори“, Звонко Костовски.

„До Основниот суд Скопје 1 – Скопје, во текот на вчерашниот ден, од кабинетот на Претседателот на Македонија беше доставена одлука за помилување на осудено лице, при што Судија за извршување санкции веднаш ја достави одлуката на надлежно постапување на затворската институција, за потполно ослободување од натамошно издржување на казна затвор на осудениот З.К.,  кој со предлог спогодба КОК ПП бр. 131/15 од  25 март 2015 година е осуден на единствена казна затвор во траење од 3 години за кривичните дела Шпионажа од член 316 ст. 4 вв со член 24 од КЗ и Неовластено прислушување од член 151 ст. 4 в.в со ст.1, а во врска со член 45 од КЗ“, соопштуваат од Основниот суд Скопје 1.Костовски е еден од осомничените во случајот „Пуч”, во којшто осомничен е и лидерот на опозицијата, Зоран Заев. Костовски со спогодба на обвинителството беше осуден на затворска казна од три години за кривичните дела шпионажа и неовластено прислушување.Тој е единствениот амнестиран со одлуката на Иванов, додека другите политичари се аболицирани.По одлуката на Иванов којашто предизвика револт и протести во Скопје, неофицијално ослободен е и Горан Грујовски, началникот на Петтата управа на УБК, кој беше во домашен притвор. Засега нема потврда од Судот за оваа информација./крај/мф/