Македонија
Тодоров: Договор може да се постигне ако има желба

Ако има отстапки од двете страни, и ако има желба за договор, до него може да се дојде, изрази надеж Никола Тодоров, претставникот на владејачката партија на преговорите за излез од политичката криза, што и во среда се водат меѓу претставниците на партиите потписнички на Договоро т од пржино, во Клубот на пратеници.
„Се надевам дека е можно да се приближат ставовите. ВМРО-ДПМНЕ оди на тие преговори со цел да се договори, да се најде решение и да се заврши целата оваа криза“, изјави вицепремиерот и министер за здравство Никола Тодоров кој ја претставува ВМРО-ДПМНЕ на меѓупартиските преговори за надминување на политичката криза.„Досега направивме огромен број отстапки и сите тие отстапки се само во функција на решавање на кризата. Ајде да видиме и денеска дали од другата страна ќе имаме поместувања. Ако има желба за договор очекувам да има договор“, рече Тодоров одговарајќи на новинарско прашање по посетата на Универзитетската клиника за државна кардиохирургија.На прашање дали до сега немало отстапки од другата страна, рече дека ќе биде неискрен ако каже дека немало воопшто.„Имало определени отстапки од едната и од другата страна. Во вакви преговори секоја страна смета дека таа најмногу отстапува и тоа мора да се преброди. Нормално, ние викаме дека ВМРО-ДПМНЕ направила повеќе отстапки, а СДСМ ќе каже дека тие направиле повеќе отстапки, но сепак таква е ситуацијата да треба да се собере храброст и да најдеме едно заедничко решение. Ние направивме доста отстапки во тој правец. Очекуваме една отстапка сега во финалето на овие преговори и од страна на СДСМ. Не би коментирал повеќе. Сепак, сакам овој процес да успее, не сакам да се доведе во прашање или да се уништи поради некоја лоша изјава или нешто друго“, рече Тодоров пред денешното продолжение на меѓупартиските преговори./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипчe: ВМРО-ДПМНЕ се гушка со ДУИ, ние ја научивме лекцијата

Претседателот на СДСМ, Венко Филипче, во интервју за телевизија Сител категорично ја отфрли тезата дека неговата партија ја рехабилитира Демократската унија за интеграција (ДУИ), нагласувајќи дека политичкиот процес не функционира на таков начин.
„Не ја рехабилитирам ДУИ ниту јас, ниту СДСМ. Партија се рехабилитира со работа на своите членови, а на крај довербата ја враќаат или не ја враќаат граѓаните“, изјави Филипче.
Тој потенцираше дека социјалдемократите ги научиле лекциите од претходната коалиција со ДУИ и дека денес принципите на коалицирање се поставени на сосема поинакви основи: „Се темелат на вредности, на политики, на луѓе и на програми.“
Филипче истовремено ја насочи критиката кон ВМРО-ДПМНЕ, за која рече дека е токму таа партија која во моментов гради нова блискост со ДУИ, и тоа спротивно на ветувањата дадени во кампањата.
„Ние слушаме дека има некаква нова релација, дека ВМРО-ДПМНЕ е таа што иницирала приближување и затоплување на односите со ДУИ. Да потсетам – што ветуваа премиерот и ВМРО-ДПМНЕ? Дека ќе ги апсат ДУИ, беа криминалци, Соравија, Лотарија… Што видовме од тоа? Ништо. На Артан Груби му ја дигнаа рампата за Косово, а Максим Димитријевски со ДУИ си гласаа ДУП-ови во Куманово“, истакна лидерот на СДСМ.
Повикувајќи на политичка сериозност, тој повтори дека социјалдемократите во овој момент немаат никаква соработка со ДУИ и дека таа епизода за нив е затворена: „Ја научивме лекцијата, и таа добра лекција ќе ја користиме во градењето на идните коалиции“.
Македонија
Пожарите еден по еден се гаснат, но опасноста останува кај Тиквешко езеро

Утрово до 08:30 часот во Македонија евидентирани се вкупно шест пожари, од кои еден сè уште е активен, а пет се ставени под контрола, соопшти Центарот за управување со кризи (ЦУК).
Активниот пожар е во Општина Кавадарци, во близина на Тиквешкото Езеро, каде огнот зафатил нискостеблеста шума и сува трева. Екипите на терен работат на негово локализирање, но поради сувата вегетација и повремениот ветер гаснењето е отежнато.
Покрај овој пожар, властите потврдуваат дека пет други пожари кои вчера предизвикаа сериозни проблеми се веќе под контрола. Во Македонски Брод, во повеќенаменското подрачје „Јасен“, огнот зафати мешана шума, но со интервенција на пожарникарите и шумската полиција е спречено негово ширење.
На планината Кожуф, во Општина Гевгелија, вчерашниот приземен пожар е стабилизиран, а надлежните дежураат за да не дојде до повторно разгорување.
Во Општина Желино се случија два пожара – во селото Мерово, каде изгоре дел од мешана шума, и во селото Церово, каде пламените јазици зафатија ниска вегетација и делови од мешана шума. Двете жаришта се ставени под контрола, но остануваат ризични поради топлото време.
Пожар се случи и во селото Долгаец, во Општина Долнени, каде исто така беше зафатена мешана шума. И таму состојбата е стабилизирана.
Надлежните апелираат на максимална внимателност, бидејќи сувата вегетација и високите температури овозможуваат брзо ширење на пожарите, а најмал невнимателен потег може да предизвика сериозни последици.
Македонија
Перински пред гласањето на 12 септември: Ако не се донесе законот, градоначалниците ќе останат без контрола

Министерот за локална самоуправа, Златко Перински, потврди дека институциите прават максимални напори новите измени на Законот за локална самоуправа да бидат изгласани до 12 септември, кога е закажана последната парламентарна седница пред изборите.
Тој посочи дека предлог-законот е подготвуван повеќе од половина година, со широки консултации и дебати со сите засегнати страни, вклучително и со координаторите на опозициските групи во Собранието.
„Жал ми е што ниту ДУИ, ниту СДСМ не успеаја да се надминат и да ги поддржат измените, иако тие директно се однесуваат на јакнење на демократијата и подобрување на услугите на локално ниво“, изјави Перински.
Според него, клучните новини се: воведување можност за референдумски отповик на градоначалник, задолжителна комунална полиција, транспарентно пренесување на седниците на општинските совети и нови градски архитекти.
Министерот предупреди дека доколку измените не се изгласаат на следната седница, тие нема да важат за идните градоначалници.
„Тоа би значело дека тие ќе останат единствените јавни функционери без можност за отповик, а локалната власт нема да има механизми како комунална полиција, што ќе влијае врз квалитетот на работењето“, нагласи Перински.
Тој се осврна и на бројот на советници по општините, објаснувајќи дека Владата веќе интервенирала согласно промените во бројот на жители.
„Во 17 општини имаше корекции, во 14 бројот на советници се намали, а во три се зголеми“, рече тој.
Министерот додаде дека барањата на опозицијата за вклучување на целото население од пописот не се оправдани, бидејќи според законот, советниците се избираат врз основа на реалниот број на жители во општината.
„Нема пример во светот каде нерезиденти се земаат како параметар за советници. Владата уште на старт ги расчисти овие дилеми“, потенцира Перински.