Култура
Фестивалот Mariovo OFF-Road Experience по четврти пат во прилепско
И оваа година во последниот викенд од мај, по четврти пат ќе се одржи фестивалот Mariovo OFF-Road Experience, во селото Манастир, Општина Прилеп. Организаторите од Здружението за унапредување на велосипедизмот „Велоевропа“ од Скопје очекуваат повеќе од 800 посетители.
Целата програма ќе биде изведена во трите дена од викендот. Во петокот ќе се случи отворањето на фестивалот, ќе бидат прикажувани кратки филмови со спортска содржина, ќе има изложба на фотографии од претходните години и мала забава на отворено. Саботата е резервирана за целодневна забава со диџеи и бенд, курс по самоодбрана, аеробик вежби, кратко предавање за готвење. Сите спортски активности ќе се одржат во неделата. Предвидено е да се изведат две МТБ тури, една тура за друмски велосипеди, спортско трчање, планинарење и аеробик.„Оваа година за прв пат ќе се вози нова МТБ рута којашто ќе почнува од селото Манастир, и ќе ги посети селата Чаниште, Рапеш и Зовиќ. Малата МТБ тура и спортското трчање ќе се изведат по стандардната рута, а планинарењето ќе оди од селото Манастир до Зовиќ и назад.“, изјави Слободан Трајковски од Велоевропа.Пријавувањето е веќе во тек и картите можат да се купат во продажната мрежа на Купи карти за сè. Заинтересираните можат тековно да се информираат на настанот на Фејсбук MARIOVO OFF-ROAD EXPERIENCE: ENTER THE WILDERNESS.„За прв пат оваа година се направи и промоција на настанот надвор од Македонија и очекуваме голем број гости од балканските држави. Сè е подготвено за да го примиме големиот број на учесници кои ќе треба да се појават на стартот во 10 часот во неделата. Недопрената природа на Мариово заслужува да биде споделена со што е можно повеќе луѓе.“, изјави Слободан Трајковски.Настанот е во организација на здружението „Велоевропа“, со поддршка на Општина Прилеп и програмата на УСАИД за поддршка на мали бизниси./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.