Словенија не побарала од Македонија да ја затвори границата со Грција за мигранти и демантира дека имало било каков дефект на железничкиот сообраќај во Словенија, како што соопштија во средата од македонското Министерство за внатрешни работи кое извести дека Македонија ќе го редуцира бројот на мигранти на границата со Грција.

Амбасадата на Словенија во Македонија испрати демант до медиумите во кое се вели дека железничкиот сообраќај се одвива непрекинато и сега и во претходните денови. „Република Словенија не побарала од Република Македонија да ја затвори границата со Грција. Индикациите дека тоа сме го направиле, поради тешкотии во словенечката железничка мрежа се погрешни. Железничкиот сообраќај во Словенија се одвива непрекинато, така беше и во претходните денови. На пругите нема, ниту имаше непланирани прекини во изминатите денови, кои би оневозможиле транспорт на возовите, а „Словенске железнице“ и понатаму обезбедуваат непречен транспорт на возовите со мигранти, како што е договорено со Министерството за внатрешни работи на Република Словенија“, се вели во демантот. Од Министерството за внатрешни работи пак велат дека тие добиле известување дека на меѓународната пруга во Словенија има дефект и дека има потреба Македонија да го редуцира пропуштањето на мигранти. Во четврток, до Министерството за внатрешни работи стигнало известување од Србија во кое се бара освен досегашните документи кои би требало да ги поседуваат мигранттие, од нив да се бара и документ во којшто ќе биде прецизирано во која држава бараат азил. Македонија според дописот, ќе треба да ги пропушта само мигрантите кои бараат азил во Австрија или во Германија. Ова известување било испратено последователно од Австрија на Словенија, од Словенија, на Хрватска, од Хрватска на Србија, и од Србија на Македонија.Во дописот пак којшто го испрати Словенечката амбасада во Македонија се вели дека Словенија веќе една година повикува кон создавање на заедничко европско решение, бидејќи отсуството на истото на северот и на југот на Европа, предизвикува донесување на еднострани мерки, кои не го решаваат изворниот проблем, ограничување на миграциите. „Имено, миграцискиот тек e сè уште силен – во Словенија секој ден влегуваат и до неколку илјади мигранти – на работ на Европа на влез чекаат повеќе милиони различни мигранти, напролет па се очекува овој миграциски тек да се интензивира. Грција е еден од клучните играчи при справувањето со миграцискиот тек, затоа мораме да ѝ помагаме, според зборовите на словенечкиот премиер, да ги спроведе сите договорени мерки за справување со околностите“, се додава во соопштението.  Пред неколку дена словенечкиот премиер, Миро Церар испратил писмо со иницијатива до лидерите на Европската унија, дека треба на македонско-грчката граница да се воведе дополнителна контрола врз миграцискиот тек, при што земјите од ЕУ би ѝ ја нуделе на Македонија сета неопходна помош во спроведувањето на граничната контрола.Оттаму појаснуваат дека Словенија бара државите од Европската унија да реагираат заедно за проблемот со мигрантите како и усогласено делување на сите држави на миграцискиот пат.„Прашањето за враќање на мигрантите во државите од западнобалканскиот пат, може да ги засили билатералните проблеми и конфликти помеѓу овие држави, затоа е значајно ЕУ државите на предизвиците поврзани со миграциите да реагираат заедно. Таквото решение би овозможило нормален прием на оние, кои ги исполнуваат условите за влез во Унијата, а на останатите мигранти би можеле да им помогнеме поблиску до нивните земји на потекло“, истакнал во писмото словенечкиот премиерот Церар.И министерката за внатрешни работи на Република Словенија, Весна Гјоркос Жнидар вчера ја нагласила потребата за усогласено делување во сите држави на миграцискиот пат. Ако една држава ја затвори границата, предупреди дека другата држава ќе има џеб. При ограничувањето на прифаќањето мигранти во Германија и Австрија, за Словенија е  значајна соработката со Хрватска. Не можеме да примиме било какви обврски кон Австрија, без за тоа да се усогласиме со Хрватска“, изјавила Министерката./крај/ффс