Култура
Новата ѕвезда на британскиот стрип има 11 години
Британецот Зум Рокман има само 11 години а веќе стана реномиран автор, илустратор и издавач на сопствениот досега многупати награден стрип „The Zoom!“, чии први изданија веќе станаа колекционерски примероци.
Младиот лондончанец, кој во светот на стрипот навлегол на осумгодишна возраст кога почнал да се занимава со колекционерство на винтаж изданија на неговиот најомилен стрип „The Beano“, на пишување на сопствен стрип го вдахновиле стрип јунаците на коишто и самиот најмногу им се восхитува – Лошкото Денис и Роџер д’ Доџер, пишува лондонскиот весник The Independent.
Првиот лик што го осмислил бил Крашер, злобно момче кое стреми кон вандализам. „Тој е темелен на лошкото Денис,. Го направив навистина глуп и сакав со секое ново издание да станува сѐ позол и позол. Така во петтото издание на стрипот ‘The Zoom!’ тргнува во пљачка во време на познатите лондонски улични протест, кога краде пелени“, појасниува 11-годишниот Зум Рокман.
Кусо време откако го креирал ликот на Крашер сфатил дека веќе има повеќе отколку што е доволно материјал за целосно издание на сопствен стрип. Првото изание на „The Zoom!“ е објавено во ноември 2009 година, кога имал само девет години. Денес на своите приказни работи секој ден по училишните обврски, а ги црта во сабота и недела, создавајќи еден стрип седмично. Детален, духовит и забавен стрип, преполн со извонредно живи ликови, „The Zoom!“ излегува полугодишно, а наскоро ќе го доживее своето седмо издание.
Стрипот „The Zoom!“ засега може да се најде на неколку продажни места во британската престолнина Лондон, како и во култната лондонска стрип-продавница „Gosh! Comics“ во квартот Сохо, а може да се набави и директно од Зум, кој го продава во училиштето.
Самиот Зум, кој кога ќе порасне сака да биде филмски режисер, веќе го привлекува вниманието на медиумите, па така веќе даде интервју за британскиот државен радиодифузер BBC, го фотографираа за многу написи во локалните магазини и е добитник на многу награди.
Секое издание на неговиот стрип излегува во 250 примероци, што ги финансира таткото на Зум, кој добива 40 отсто од остварената добивка. Цената Зум неодамна ја зголемил од 99 пени на 1,99 фунти. „Ставив повеќе боја на кориците и го зголемив форматот од А5 на А4“, го појаснува авторот овој потег. Секое издание содржи и многу реклами и огласи, коишто самиот ги илустрира.
Инспирацијата за ликовите ја пронаоѓа меѓу луѓето од неговата околина. Дедото на пријателката на неговата мајка, на пример, го инспирирал за ликот на мрзоволниот пензионер Грамп Груч, а одделението полн со лоши ученици „The Nutters“ се всушност неговите другарчиња од училиштето. Еден од ликовите е и неговиот помлад брат Ејс, а дури и неговиот јоркширски териер Роки Рокман послужил како урнек за серијата кучешки ликови кои се појавуваат во стрипот./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Лена и Владимир“ награден на Julien Dubuque International Film Festival
13. издание на Меѓународниот филмски фестивал Julien Dubuque (JDIFF) ги објави своите победници, a „Лена и Владимир“, во режија на Игор Алексов, ја однесе дома главната награда за најдобар долгометражен игран филм.
На фестивалот, кој се одржа од 24-28 април во Дубјук, Ајова, беа прикажани преку 150 филмови од целиот свет, вклучително и 31 долгометражен филм во конкуренција, а филмот „Лена и Владимир“ на фестивалот го промовираа актерот Тони Наумовски и режисерот Игор Алексов.
„Лена и Владимир“ е приказна за двајца бегалци од општеството кои доживеале огромна трагедија, а чии патишта случајно се вкрстуваат. Тие наоѓаат утеха и поврзаност, формирајќи врска што им носи исцелување. Филмот е финансиски поддржан од Агенцијата за филм на Македонија и Филмскиот центар на Србија (Терирем продукција).
Главните улоги ги толкуваат: Сара Климоска и Тони Наумовски, а во филмот се појавуваат и Дениз Абдула, Луран Ахмети, Петар Мирчевски, Петре Арсовски, Благоја Чоревски, Kирил Коруновски. Сценариото е на Александар Русјаков. Продуценти се Дејан Илиев (ДМФ Филм) и Илија Циривири (МИНД Продукција). Кинематографер е Душан Кардалевски, сценографијата е на Влатко Зафирковски, а монтажер е Мартин Иванов, Музиката е на Дарко Спасовски и Горан Керкез, костимограф е Раде Василев, дизајнер на маска е Горан Игњатовски, а кастинг директор е Катерина Грубач.
Култура
Отворање на прославата за 50-годишнината на Францускиот институт и затворање на 20. „Танц-фест“ со танчарската претстава „Мозаик“ на светски познатиот кореограф Мурад Мерзуки
Францускиот институт во Скопје и „Танц-фест“, по повод отворањето на прославата на 50 години постоење на Францускиот институт во Скопје и затворањето на јубилејното 20. издание на „Танц-фест“, го најавуваат ексклузивното гостување на француската театарска група „Кафиг“ со танцовиот перформанс „Мозаик“, в петок, 17 мај 2024, со почеток во 20 часот, во Македонскиот народен театар.
Кореограф на претставата е Мурад Мерзуки, еден од најзначајните кореографи со светско реноме денес, кому француската влада му ја довери кореографијата на официјалната церемонија на отворање на Олимписките игри 2024, со наслов „Танцот на игрите“.
Всушност, по огромниот успех на танцовиот перформанс „Пиксел“ во 2017 година во рамките на „Танц-фест“, Мурад Мерзуки и групата „Кафиг“/Käfig се враќаат во Скопје со најновиот танцов спектакл „Мозаик“.
На настанот збор ќе земат: Иго Бештел, директор на Францускиот институт во Скопје, и Рисима Рисимкин, директорка на „Танц-фест“.
Билетите за претставата се достапни на веб-страницата на Македонскиот народен театар.
Во фоајето на МНТ исто така ќе биде поставена ретроспективната изложба „50 години Француски институт во Скопје“, која го прикажува дејствувањето на Францускиот институт во текот на изминатите педесет години.
Култура
Награда за „Бизнисот на задоволството“ на фестивалот во САД што ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.