Македонија
Опремата од Израел, Пуч, изборите, први предмети кои ги побара Јанева
Опремата во Управата за безбедност и контраразузнавање (УБК) набавена од Израел, случајот „Пуч“, изборите, коруптивните зделки, како што тврди опозицискиот СДСМ, на битолскиот градоначалник Владимир Талески со превозниците, како и уште еден случај во Куманово, се првите пет предмети кои ги побара Специјалното обвинителство од надлежните јавни обвинителства.
При одлучување околу фактот кои предмети првично ќе бидат побарани од обвинителствата, земена била предвид итноста на предметите, фазата во којашто се наоѓаат и нивната обемност.Јанева го побарала предметот за набавката на опремата од Израел, предмет во кој СДСМ поднесе кривична пријава против поранешниот директор УБК, Сашо Мијалков, Светлана Костова, судијка во Вишиот управен суд и Хаим Хакијни, странски државјанин за злоупотреба на службената положба и примање поткуп.Според, СДСМ, во 2011 година, Мијалков преку НН фирма примил провизија од 840.000 евра, 540.000 евра и 200.000 евра како награда за склучување договор за набавка на опрема, по значително повисока цена од реалната.Јанева го побарала и предметот „Пуч“, во којшто обвинет е лидерот на СДСМ, Зоран Заев. Судењето за овој случај веќе почна во Основниот суд Скопје 1, но Заев не се појавуваше на рочиштата со образложение дека предметот треба да премине во надлежност на Јанева.Неизвесен е исходот на следното судско рочиште на „Пуч“, кое е закажано за на 2 декември, а судијката се закани дека Заев ќе биде стражарно приведен во судница. Јанева, пак, има рок од 16 дена од упатеното барање за предметите да донесе одлука дали предметот е во надлежност на ова Обвинителство.Исто така, изборните манипулации за кои обвинуваше опозицијата најверојатно ќе ги решава Јанева со својот тим. За овој предмет поднесена е кривична пријава против премиерот Никола Груевски, поранешната министерка за внатрешни работи, Гордана Јанкулоска и поранешниот министер за транспорт и врски, Миле Јанакиески, за фалсификување исправа и повреда на избирачкото право.Меѓу првите предмети коишто ги побара Јанева е и оној во кој е поднесена кривична пријава против битолскиот градоначалник, Владимир Талески.Според снимките што ги објави СДСМ, министерот за финансии, Зоран Ставрески го обвинува градоначалникот на Битола, Владимир Талески за коруптивни зделки со превозници. На снимката, што ја објави опозицијата, Ставрески го нарекува Талески „тежок криминалец“ кој за превоз на ученици потпишал „коруптивен до даска договор“.Јанева го побара и предметот во којшто генералниот секретар на ГРОМ, Виктoр Цветковски на денешната прес конференција во Куманово поднесе кривична пријава против СДСМ за „неовластено прислушување и тонско снимање“. „По добивање на предметите од обвинителствата, очекуваме првите одлуки за надлежноста на ова Обвинителство да бидат донесени во законски предвидените рокови, кои не надминуваат 16 дена од упатеното барање за доставување на предметите. Имено обвинителствата од кои се побарани предметите имаат рок од 8 дена да ги достават истите, а потоа ова Обвинителство во рок од 8 дена треба да донесе одлука за надлежноста“, соопштуваат од Специјалното обвинителство.Специјалното обвинителство закупи простории кои ќе ги користи како работни простории се до целосно функционално уредување на просториите каде претходно се наоѓаше Агенцијата за млади и спорт.Привремените простории се наоѓаат во центарот на Скопје, во близина на студентскиот дом „Кузман Јосифовски – Питу“. „Новите работни простории можат да се користат и за сослушување на сведоци и осомничени лица, а воедно организацијата и пристапот до истите овозможува и зачувување на идентитетот на лицата кои ќе бидат повикани на разговор во обвинителството, како и лицата кои поседуваат релевантни информации, а инсистираат на зачувување на нивниот идентитет. Тука би сакале да укажеме дека целта на обвинителството е спроведување на независни истраги во рамки на кои ќе бидат заштитени и гарантирани правата на сите учесници во постапката, како од аспект на нивна безбедност, така и од аспект на обезбедување на сите процесни права“, велат од Обвинителството.Обвинителството назначи и лице за односи со јавност, една од обвинителките од тимот, Ленче Ристова.„Согласно Законот за кривична постапка предистражната постапка е тајна и сите информации кои би биле од значење за успешно водење на постапката нема да бидат соопштувани. Ова може да подразбира и несоопштување на фактот против кого се отворени предистражни постапки и под кои сомненија, а врз основа на анализата на незаконски прислушкуваните материјали. Секако, првичниот момент кога ќе бидат обезбедени доказите и кога ќе се создадат услови за информирање на јавноста, доследно почитувајќи го начелото на транспарентност јавноста ќе биде благовремено известена. Во оваа насока појаснуваме дека воопшто нема да бидат соопштувани податоци дали одредени лица побарале статус на заштитени сведоци, од причина што, имајќи ја предвид јавната покриеност на настаните кои ова Јавно обвинителство ги разгледува, постои опасност од обесхрабрување на ваквите лица да пристапат кон ова Јавно обвинителство и да помогнат во истрагите“, додаваат од Обвинителството./крај/мф/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Општина Бутел обезбеди еднократна финансиска помош за ранливи категории граѓани
Општина Бутел и оваа година обезбеди средства за исплата на еднократна финансиска помош за најранливите категории на граѓани.
Како што информираат од Општината, финансиската поддршка е дел од програмата за социјална заштита за 2026 година и произлегува од изборната програма на градоначалникот Дарко Костовски, која континуирано се спроведува веќе пет години.
Поддршката е наменета за граѓани со здравствени проблеми, како и за сите други ранливи категории граѓани. Од Општина Бутел истакнуваат дека оваа мерка претставува подадена рака и исполнување на дадените обврски кон граѓаните.
Во соопштението се наведува дека градоначалникот останува посветен на креирање политики кои обезбедуваат заштита на најранливите категории, како и создавање средина со еднакви можности за сите граѓани, при што се нагласува дека предизборните ветувања се реализираат во практика.
Македонија
(Видео) Фрчкоски од СДСМ обвинува: 51 тендер добила иста фирма по локалните избори
Антикорупцискиот тим на СДСМ денеска изнесе обвинувања за сомнителни тендери, посочувајќи дека фирма блиска до ВМРО-ДПМНЕ добила 51 тендер во вредност од околу 16 милиони евра.
На прес-конференција, членот на Извршниот одбор на СДСМ, Јон Фрчкоски, изјави дека станува збор за фирмата „Пирамид билдинг солушнс“, која, според тврдењата на СДСМ, од 2022 година, односно од периодот по локалните избори до денеска, добивала тендери во општини под контрола на ВМРО-ДПМНЕ.
Фрчкоски наведе дека само во општина Аеродром фирмата добила 22 тендери, во Гази Баба 10, како и во општините Ѓорче Петров, Прилеп, Битола и Гевгелија. Според СДСМ, дел од тендерите биле финансирани и со средства од унгарскиот кредит.
Како последен пример, од СДСМ го посочија тендерот од декември 2025 година со Град Скопје, во вредност од 320.000 евра, кој, според нив, бил доделен веднаш по преземањето на функцијата градоначалник од страна на Орце Ѓорѓиевски.
Македонија
Непознати глутници се појавија преку ноќ – пронајдени улични кучиња од Албанија во Скопје, се бара истрага и проверка на безбедносните камери
Здружението за заштита на животните Анима Мунди алармира и јавно бара итна, темелна и независна истрага поради сериозни индиции за организирано внесување и дислоцирање на кучиња во град Скопје, појава која, како што наведуваат, директно ја загрозува јавната безбедност, благосостојбата на животните и владеењето на правото.
Од здружението информираат дека во изминатите денови, на територијата на општина Карпош се појавила нова глутница кучиња кои се целосно непознати за локалното население и не се дел од постоечката улична популација. Според Анима Мунди, станува збор за нестерилизирани и необележани кучиња, што, како што наведуваат, исклучува можност за природен прираст и укажува на насилна дислокација.
Во соопштението се наведува дека јавното претпријатие ЈП Лајка нема оставено, ниту испуштено ваква бројка нестерилизирани и необележани животни на ниту една локација во Скопје, при што се посочува дека граѓаните со години ги познаваат уличните кучиња во своите маала, а овие животни не се дел од таа популација.
Анима Мунди информира дека на терен биле пронајдени и кучиња со ушни маркици од Република Албанија, што, како што наведуваат, отвора сериозни сомнежи за нелегален и можен прекуграничен транспорт и напуштање на животни.
Здружението бара целосна проверка на сите јавни и приватни безбедносни камери на локациите каде што кучињата се појавиле, како и на сите влезно-излезни правци кон Скопје. Се бара од Министерство за внатрешни работи и Јавно обвинителство да утврдат кој, како и од каде ги транспортира и истовара животните, наведувајќи дека, според нив, не станува збор за изолиран случај, туку за логистички организирана активност.
Во соопштението се наведува дека масовното напуштање и дислоцирање кучиња претставува суровост и сериозна општа опасност, поради што Анима Мунди поднела конкретни предлози за измени на Законот за заштита и благосостојба на животните, како и предлог-измени на Кривичниот законик, со кои напуштањето миленик, суровоста и предизвикувањето општа опасност би се третирале како кривични дела, по примерот на Република Хрватска.
Истовремено, од здружението упатуваат итен јавен повик до ЗЕЛС ова прашање да се отвори и дискутира на ниво на сите градоначалници, нагласувајќи дека секоја општина мора хумано и законски да ја третира проблематиката со уличните кучиња, преку масовна стерилизација, јасна евиденција и најстроги санкции каде што ќе се утврди масовно дислоцирање.
„Ова не е проблем на една општина. Ова е системска злоупотреба и мора да биде санкционирана“, се наведува во соопштението, со барање за итна истрага, одговорност и преземање мерки за сторителите да бидат најстрого санкционирани согласно закон.
Фото: илустрација (pexels)

