Култура
Голем антички град се наѕира кај Старо Бонче
Онлајн магазинот Архиологика повикувајќи се на професорот Виктор Лилчиќ, пишува во средата дека на локалитетот Старо Бонче, во прилепско се наоѓал антички македонски град чии наоди упатуваат дека бил главен град на античките Mакедонци – пелагонци
Новите факти, пред сѐ за кралската гробница, досега истражувана но и неколкупати ограбувана, се резултатите на новите археолошки истражувања на археолошкиот локалитет Павла Чука кај прилепско Старо Бонче. Истражувањата веќе еден месец ги вршат археолозите од Институтот за историја на уметноста и археологија од Скопје и од прилепскиот Завод и музеј.
Според Антонио Јакимовски од Институтот за историја на уметноста и археологија од Скопје, тоа е уникатна гробница во светски рамки.
„Уникатноста на гробницата е поради кружниот ѕид. Таква не се среќава не само на Балканот туку и во светот. Во неа бил погребен, а потоа и кремиран, со сите почести и материјални добра, моќен македонски крал од 3 и 4 век пред нашата ера. Околу гробницата се најдени неколку гробови зашто тоа станало свето место. За жал, материјалните добра се однесени во ограбувањата низ вековите“, изјави Јакимовски за македонскиот специјализиран интернет магазин Археологика.
Професорот Виктор Лилчиќ смета дека тоа е локалитет од врвно значење. Тука бил антички македонски град, чии наоди упатуваат дека е таинствениот главен град на античките Македонци – пелагонци.
„Единственото место каде што можел да се наоѓа тој град, според сите сознанија, е најверојатно овде, кај Старо Бонче. Бил на неколку нивоа. Горе, на над 1.400 метри, е месноста Висока. Тоа било стратегиско место за контрола на Пелагонија, а во долниот дел кај гробницата биле живеалиштата на населението. Овој град бил со над 20.000 жители“, нагласи проф. Лилчиќ.
Археолозите од овие истражувања првпат претставуваат наоди: копје – препознатливоста на македонската фаланга, сребрен и бронзен накит и чинија. Оттука потекуваат и трите штита, најдени пред шест години, што се конзервираат во Охрид, и монетите со Александар, Филип, Касандар Деметриј.
Според Виктор Лилчиќ, Македонија е големо археолошко наоѓалиште, со најмалку 50 илјади локалитети, од кои само 10 отсто се истражувани./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.