Ознаката којашто американските астронаути ја носеле во историската мисија на летот до Месечината во 1969 година и контролниот список со податоците за тричлениот екипаж, постигнаа највисоки цени на аукцијата на „вселенските” предмети во Њујорк на која биле заработени милион американски долари.

Речиси 300 колекционери и разни други ентузијасти од 17 земји телефонски, преку интернет или лично во вторникот навечер во Њујорк наддавале за предметите. Биле продадени 80 отсто од понудените 300 предмети, соопшти организаторот на наддавањето аукциската куќа Bonhams.

„Предметите со коишто се служеле астронаутите се многу атрактивни , бидејќи се нештата за коишто луѓето сонувале како деца. Многу деца сакаа да бидат астронаути. Летот на Apollo 11 за многумина е прашање на носталгија, бидејќи тоа беше првиот лет на човекот на Месечината, а сé што правиме првпат претставува голема работа”, изјавила Касандра Хатон, експерт за вселенска програма во аукциската куќа, пренесува Reuters.

Контролната листа од леталото „Apollo 11″ со податоците коишто ги снимил членот на екипажот Баз Олдрин додека престојувал на Месечината е продадена 68.750 долари, иако првично беше проценета на 45 илјади долари.

Друг предмет кој предизвикал големо внимание била ознаката со орел и маслинова гранка на месечевата површина, идентична на логото што го носел екипажот на вселенските костуми. Таа е продадена за 62.500 долари, а ги носи потписите на тројцата астронаути, Баз Олдрин, Нил Армстронг и Мајкл Колинс.

Американското знаме коешто Олдрин го носел на Месечината постигнало цена од 47.500 долари, двојно повеќе од процената.

Вселенскиот костум за проектот „Меркур”, коешто било користено на самиот почеток од американската вселенска програма со човечки екипажи, е продадено за 43.750 долари, што, пак, пет пати помалку од првично проценетата вредност.

Реткиот руски вселенски костум „Стриж”, едно од само 27-те такви костуми, било нудено за 20 илјади долари, но таа цена не била постигната. Меѓутоа, контролната плоча од Вселенската станица Мир којашто беше проценета на шест илјади долари, е продадена за 9.375 долари. /крај/мф/сн