Надзорната расправа за поплавите во Скопско што се одржува во Собранието во петок, почна  со тензичната атмосфера помеѓу членовите на различни политички партии, по што дојде до кавга за начинот на кој се води расправата, па е прекината со паузи.
 

Расправата е по барање на пратениците на СДСМ во Комисијата за земјоделство, шумарство и водостопанство.

Првата пауза од еден час ја побараа пратениците на владејачката  ВМРО-ДПМНЕ, за втората од половина час да ја побара исто така, владејачката ДУИ. Поради тоа, пратениците од СДСМ сметаат дека владејачките партии ја опструираат расправата, со цел никој да не понесе одговорност за жртвите и штетите од поплавите на 6 август годинава што зафатија повеќе скопски села.

Двете различни политички страни ги судрија ставовите околу тоа како треба да се распределат 15-те минути во кои треба да сведочат повиканите.

Според планираното, треба ќе бидат сослушани 30 сегашни и поранешни функционери, меѓу кои и четворица поранешни премиери во чии мандати беше градена обиколницата од 2002 до 2006 година.

Во Собранието се дојдени вицепремиерот Никола Тодоров, како шеф на Кризниот штаб на Владата, Оливер Ромевски, директорот на УХМР, Михаил Цветков, министерот за земјоделство, Тони Мартиновски, директорот на „Скопско Поле“, Жарко Караџоски, директорот на „Македонски шуми“, Коце Трајановски и Тони Трајковски, градоначалниците на Скопје и на општина Гази Баба, кои треба да бидат сослушани денеска.

По барање на пратениците на СДСМ покана е испратена до лидерот на ВМРО-ДПМНЕ и поранешен премиер Никола Груевски, додека пратениците на ВМРО-ДПМНЕ како сведоци ги повикаа поранешните премиери од СДСМ Бранко Црвенковски, Хари Костов и Владо Бучковски.

Поранешните премиери најверојатно ќе бидат сослушани следната недела./крај/мф