Вчера во периодот од 17.00 до 01.00 часот полицијата спроведе засилена акција, со посебен акцент за преземање мерки за прекршоци што ги прават возачите на мотоцикл, при што се преземени вкупно 51 мерка.

Од нив седум санкции за возење без возачка дозвола, 25 мерки за управување мотоцикл без заштитна кацига, три мерки за управување мопед без положен испит за познавање на сообраќајните правила и прописи, осум санкции за управување мотоцикл со несоодветна категорија, две мерки за минување со моторцикл на црвено светло, три мерки за незастанување на даден знак Стоп од униформиран полициски службеник.

Одземени се два мотоцикли поради измината важност на сообраќајната дозвола од над шест месеци.

За време на сообраќајната контрола санкциинирани се и 104 други видови на сообраќајни прекршоци.Исто така во текот на изминатата вечер контролирани се осум угостителски објекти во координација со Државен пазарен инспекторат при што констатиран е еден прекршок, легитимирани се 66 лица, а извршени се прегледи на лица 23 лица и осум патнички возила.

Пратеникот од ВМРО-ДПМНЕ, Бране Петрушевски, денеска го критикуваше кандидатот на СДСМ за градоначалник на Куманово, Мартин Костовски, обвинувајќи го за низа спорни постапки и поврзаност со, како што рече, старата матрица на владеење.

Петрушевски потсети дека Костовски, како директор на Службен весник, го објавил Законот за двојазичност без потпис на претседателот на државата, што претставува директно кршење на Уставот. Тој додаде и дека за таа постапка постои кривична пријава.

На прес-конференцијата беа спомнати и наводни сомненија за политички пазар околу францускиот предлог, со вработување на сопругата на Костовски во МНР. Петрушевски го обвини кандидатот и за насилен инцидент од 2017 година кога во алкохолизирана состојба нападнал учесник на протест, и праша како со државна плата започнал изградба на зграда во центарот на Куманово, која потоа била стопирана поради неправилности.

„Куманово не смее да падне во рацете на човек со вакво минато. Куманово заслужува чесност, отчетност и визија – работи кои Мартин Костовски не може да ги понуди“, изјави Петрушевски.

Животниот стандард никогаш не бил полош, граѓаните имаат се’ помалку за живот. За 20 отсто е намаена куповната моќ на граѓаните- односно за 20 проценти помалку работи можат да купат сега отколку пред да дојде ВМРО-ДПМНЕ на власт, истакна на прес-конференција потпретседателката на СДСМ, Каја Шукова.

Шукова нагласи дека платите не растат, а цените секојдневно одат нагоре.

„Македонија е претпоследна во Европа по минимална плата, само Албанија има пониска минимална плата од Македонија. 70 проценти од вработените во Македонија живеат со плата под 500 евра“,рече Шукова, додавајќи дека средната класа исчезнува, а младите заминуваат бидејќи нема перспектива.

„Ова е реалноста што ВМРО ДПМНЕ сака да ја сокрие – релност во која граѓаните се борат за еден оброк, додека власта се луксузира, си ги покачуваат платите и продаваат приказни дека сме четврти во Европа“, нагласи Шукова.

Притоа, потпретседателката Шукова порача дека СДСМ ќе продолжи да се бори за стабилна економија, за вистински економски мерки и реформи, за држава атрактивна за инвестирање, за економија што носи нови работни места и подобар живот за сите граѓани.