Култура
Благој Нацоски по петти пат во Јапонија
Најпознатиот македонски тенор се наоѓа на двонеделна турнеја во Јапонија, каде вечерва ќе дебитира во улогата на Неморино во операта “Љубовен напиток” од Гаетано Доницети.
Претставата во полуконцертна изведба ќе се одржи во Рјутопија Центар во Ниигата каде Нацоски веќе има настапено на концертот “Три тенори” во 2008 година. Партнерка во улогата на Адина ќе му биде Јапонката Нобуко Такахаши, Дулкамара ќе го толкува Матео Пеироне од Италија, а во останатите улоги ќе настапат јапонски уметници. Рјутопија Центарот е најпрестижната концертна сала во градот Ниигата и оваа година слави јубилеј од 15 години.
Во изминатата седмица, во организација на Рјутопија Центарот, Нацоски одржа и Мастерклас за студентите по оперско пеење од различни универзитети на Јапонија.
По “Љубовниот напиток” следува Гала Оперски концерт во Токио во салата Нипори Сани Хол, во организација на “Токио Опера” заедно со јапонски и италијански уметници, како и женски хор од Токио. По негова иницијатива концертот ќе биде завршен со обработка на две македонски народни песни во изведба на јапонскиот хор, а во едната ќе настапи заедно со нив.
„Прекрасно искуство беше да се работи со студентите, односно студентките по пеење од Јапонија, со оглед на фактот дека на мастерот учествуваа само припаднички на понежниот пол. Нивната дисциплина и “послушност” се навистина на завидно ниво, во смисол што максимално се трудеа да го направат она што го барав од нив во изведбата на различните дела. Што се однесува до Неморино, одамна имам желба да ја пеам оваа улога од која уште од студентските денови често ја пеам познатата арија “Una furtiva lagrima”, но ете по некоја случајност целата улога досега ја немав отпеано. Се радувам и што повторно сум во Ниигата и во прекрасниот Рјутопиа Центар“ вели Нацоски.
По настапите во Јапонија, на 12-ти април Нацоски ќе настапи во Театарот „Томазо Траета“ во Бари, и тоа со концерт посветен на македонските современи композитори. По успешниот таков концерт во Рим минатата година, ова е втор негов рецитал од овој вид. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.