Пионерски домови, работнички универзитети и јавни претпријатија кои се ликвидирани и во кои нема вработени се избришани од листата на институции, реагираат од Министерството за информатичко општество и јавна администрација, по обвинувањата од дополнителниот заменик министер дека за шест месеци „исчезнале“ 88 институции.

„Со оглед на фактот што дополнителниот заменик на министерот веќе располага со податоци во однос на институциите и бројот на вработени во истите, ќе беше добро, заради целосна претстава на јавноста, да каже дека од листата на институции се избришани пионерските домови, работничките универзитети и јавните претпријатија кои се ликвидирани и во кои нема вработени. Ќе беше доследно ако кажеше дека за прв пат во последните 70 години, Министерството за информатичко општество и администрација ја утврди листата на сите институции на јавниот сектор, работа која траеше со месеци и за која огромен труд вложија вработените во министерството“, велат од таму. Тие појаснуваат и дека согласно Изборниот законик, никаде не се бара Министерството за информатичко општество и администрација да доставува податоци од Регистарот на вработените во јавниот сектор. Податоците кои се бараат, министерството веќе ги има обезбедено, а доколку Кирацовски смета дека истите не се точни, тоа ќе мора да го поткрепи со докази, а не со паушално дадени изјави. „Кога сме кај Регистарот на вработените во јавниот сектор, Министерството за информатичко општество и администрација ги презема сите законски надлежности за истиот да биде пополнет во најкус можен рок, а најголем бенифит од тој Регистар, ќе има токму Министерството, затоа што податоците од истиот ни се неопходна алатка за понатамошно водење на процесот на реформа на јавната администрација“, велат од министерството/Го повикуваа Кирацовски на следната прес-конференција, да и соопшти на јавноста, дали и кога Општина Струмица има донесено акти за внатрешна организација и за систематизација, како и дали податоците за оваа Општина се внесени во Регистарот, затоа што оваа општина „не е партизирана“ и е „професионална“, обвинувајќи го при тоа дека прес-конференциите кои ги држи како дополнителен заменик министер му се партиски. Впрочем, најголем доказ за транспарентното и отчетно работење на Министерството e алатката https://proverkaregistar.hrm.gov.mk/ која беше промовирана на 18.02.2016 година за проверка на записи во базата на вработени во јавниот сектор, до кои податоци слободно може да се пристапи и чија точност не може да се оспори, додаваат од министерството.Кирацовски на позицијата дојде пред неколку месеци од редовите на опозициската СДСМ, како дел од политичкиот договор од Пржино, со што треба да се обезбедат услови за организирање фер, демократски и слободни предвремени парламентарни избори./крај/мф/бб