Македонија
Повторно одложено судењето за „Ровер“, еден од обвинетите имал здравствени проблеми

Судењето за случајот „Ровер“ кое требаше да почне во петокот, по третпат повторно беше одложено, бидејќи еден од обвинетите, Сашо Јовановски, не беше присутен поради здравствени проблеми.
Неговиот адвокат, Димитар Савовски, достави медицинска документација до судот и појасни дека му била шината ногата и оти морал да оди на физикална терапија. Обвинителката во овој случај, Лидија Ракичевиќ, рече дека физикалната терапија не е причина обвинетиот да не дојде, но судењето беше одложено поради отсуството на Јовановски. Во случајот „Ровер“, меѓу обвинетите е поранешниот министер за внатрешни работи и лидер на партијата Обединети за Македонија, Љубе Бошкоски, кој се товари дека е вмешан во убиството на Марјан Тушевски и Киро Јанев од 2001 година. Тој беше осуден на затворска казна од 12 години, но пресудата беше укината и неговата казна беше намалена на 10 години. И оваа пресуда ја укина Апелациониот суд и судењето за овој случај треба да почне по третпат, но постојано се одложува. Апелациониот суд го укина притворот и за сите обвинет и сите се бранат од слобода. Бошкоски, пак, сé уште е во затворот „Идризово“ крај Скопје, каде ја издржува петгодишната затворска казна за случајот „Кампања“, и треба набрзо да излезе и неговите адвокати тврдат дека тој има право да го напушти затворот три месеца порано како и сите затвореници.На минатото одложување на рочиштето, судијата на „Ровер“ Илија Трпков рече дека случајот „Ровер“ не е пречка Бошкоски да излезе од затвор и дека тоа е одлука на затворот.Директорот на затворот „Идризово“, Живко Пејковски, на ова возврати со изјавата дека судијата излегол од своите надлежности и директно се меша во работењето на затворската управа./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Со 16 минути молк почна собирот во Скопје за настраданите во пожарот во Кочани

Со 16 минути молк, солзи во очите, наведнати глави и огромна тага почна собирот во Скопје, по трагедијата со настраданите во пожарот во Кочани.
Молкот од 16 минути, симболично го означи 16 март – датум кој со црни букви ќе остане врежан во колективната меморија, кога се случи пожарот кој однесе 59 животи, а со поврди се здобија 190 луѓе од кои 20 деца.
Собраните носеа транспаренти на кои пишуваше „Не сте сами“, „Лесно запалива држава“, „Немаше да има крв ако се е по закон“.
Повик за собирот вчера упатија од здружението „Кој е следен?“, апелирајќи собраните да носат црни ленти, а протестот да не се одржува по улиците каде поминуваат возила кои ги пренесуваат повредените пациенти.
Македонија
Беќаровски за пациентите на Токсикологија: Млади страдалници раскажуваат како мирисот на изгорено човечко месо им ги парал ноздрите, а нам солзи ни навираат

Докторот Нико Беќаровски на неговиот „Фејсбук“ посочи дека на Универзитетската клиника за токсикологија хоспитализирани се дваесетина млади лица повредени од пожарот во дискотеката во Кочани кои раскажуваат низ солзи како преку нив газеле други деца, бегајќи од пламените.
„На Универзитетската клиника за токсикологија хоспитализирани се дваесетина млади страдалници од хоророт кој го доживеаа во таканаречениот кабаре бар. Од една страна среќни што сепак извлекле жива глава, задоволни што поминале со некоја полесна изгореница, сѐ уште со гареж во нивните гради“, но секој од нив има своја траорна приказна за ужасот кој го доживеале тие 10-30 минути“, посочи докторот Нико Беќаровски и додаде:
„Раскажуваат низ солзи, како преку нив газеле други деца бегајќи од пламените, како изнесувале на своите раце изгорени и јагленисени свои другари, како мирисот на изгорено човечко месо им ги парал ноздрите, како топлината им го горела ждрелото, како чучнати во вецето го чекале судниот момент и уште многу други лични трауми кои ги погодија овие прекрасни млади личности. Тие раскажуваат, нас солзите нѝ навираат“.
Истакна дека ова се дваесетина индивидуални драми, но секој од тие петстотини невини фиданки, има своја приказна своја лична траума.
„Драми кои не може да ги креира ниту Холивуд. Физичките трауми ќе зараснат или ќе остават трајни физички дефекти, но душевните трауми уште долго или доживотно ќе бидат нивен следбеник. Ноќните кошмари уште долги години ќе бидат нивен несакан ноќен придружник. ЗОШТО ??? За туѓи бели дворови, копај си црни гробови”, завршува Беќаровски.
Директорот на Клиниката за токсикологија, Андон Чибишев, утрово извести дека првично кај нив биле хоспитализирани 18 повредени во пожарот во Кочани. Поради влошување на состојбата, четворица се префрлени во Клиниката за анестезија, реанимација и интензивно лекување (КАРИЛ). Директорот Чибишев не е до крај задоволен од состојбата на четворица пациенти кои се уште се на Токсикологија, оти не е целосно стабилизирана, а останатите рече дека се стабилни.
Македонија
Митева: Ќе се обезбедат 30 милиони денари за транспорт и сместување во странство на семејствата на повредените

На територија на државата извршени се околу 50 контроли во текот на 16 и 17.03. 2025 година во угостителски објекти коишто имаат лиценца за работа која се однесува на кабаре, ноќен клуб, диско-клуб и диско-клуб на отворен простор. Согласно овие контроли на увид се приложени лиценци за вршење на угостителска дејност коишто се со важност и тие се 22 на број на цела територија на државата, но има и 15 лиценци коишто се со истечена важност. Државниот пазарен инспекторат е на терен и се проверуваат сите 22 објекти коишто имаат важечка лиценца дали ги исполнуваат минимум технички услови коишто се потребни за да ја добијат таа лиценца. Заедно со останати надлежни институции за тоа ќе излеземе со дополнителни информации откако ќе заврши целиот надзор којшто тие го прават, рече владината портпаролка Марија Митева на прес-конференција
„За сите други објекти, коишто се со истечена важност на лиценцата или немаат воопшто лиценца, Државниот пазарен инспекторат донесе забрана за вршење на нивната дејност сè додека не се утврдат сите потребни документи, додека не се провери дали воопшто поседуваат услови, минимално технички услови за вршење на дејност за истите да можат да обезбедат дополнителна лиценца. Во Министерството за економија, пак сакам да информирам дека се прави и проверка на лиценците дали повторно има некој случај со злоупотреба на архивското работење, односно за некоја лиценца да е заведена по друга основа. Сакам да ја информирам јавноста за она што го најавивме вчера, дека ќе се донесе и официјализира одлуката во однос на помошта на семејствата за транспорт и сместување. Денеска Владата ја официјализираше таа одлука и го задолжи Министерството за финансии да обезбеди средства во висина од 30 милиони денари коишто треба да ги пренесе на Службата за општи и заеднички работи“, додаде Митева.
Посочи дека се обезбедени 58 лица, односно за истите се обезбедени транспорт и сместување.
„И дека оваа одлука ќе се однесува и на оние лица коишто заминале и пред донесување на оваа одлука, ќе може ретроактивно да им се изврши дополнителна исплата. Ова се актуелните случувања коишто на денешната седница на Владата, беа соопштени како информации и ова се заклучоците коишто беа донесени. Остануваме посветени, ќе ја информираме јавноста транспарентно за сите преземени чекори“, заврши Митева.