Култура
Промовиран романот „Полиња со диви нарциси“ на Винка Саздова
„Полиња со диви нарциси“, е новиот роман на Винка Саздова којшто беше промовиран во четвртокот навечер во книжарницата „Три“
На промоцијата на „Полиња со диви нарциси“ присуствуваа голем број пријатели на авторката Винка Саздова и почитувачи на нејзиниот пишан збор. За романот зборуваше Елизабета Шелева, а настанот го збогати и музичката група „Љубојна.“ „Љубовтa, смртта, самотијата имаат суштинска потреба од нарација, од озборување. Тие трагаат по збор што ќе ги овековечи оти се толку кревки, ранливи и недобродојдени, неблагопријатни за овој егзекутивен свет во кој сега сите ние постоиме и кој од нас очекува дела, а не емоции. Се чини дека во тој и таков свет само како зборот да останува единствениот паметник и достоен споменик и свидетел, на таквите драматични состојби. Зборот не е само орудие, не е само шифра за влез во една душа туку е зборот и болка, а во уметноста и украс,“ рече меѓу другото Елизабета Шелева. „Со оваа книга посакав сите ние да зачекориме на своето поле и на својата ливада со диви нарциси во своите спомени, во своите сеќавања, онаму каде што е семејството, љубовта, каде што сум најчистиот јас, онаму каде што секогаш посакувам да бидам. Тоа мое поле е диво и питомо во исто време. И нарцисот воопшто не е кревок, таму дуваат ветришта, таму има студови, а тој зрачи и свети како сонцето. Тоа и го посакувам, колку и да дуваат ветришта ние опстојуваме и му се радуваме и на денот и на сонцето и даваме светлина,“ рече Винка Саздова Полиња со диви нарциси е необична приказна за љубовта и неверството. Писмото што останува непрочитано во џебот од едно палто е причина за едно долго патување кон секој изминат и иден миг од животот. Сто и осум жолти ливчиња со непроменливата порака: Разбуди ме. Страниците од дневникот, испишани во потрагата по себе, се единствената нишка во лавиринтот на љубовта. Митови што еманираат од нашето најсекојдневно постоење. Доброволни прогонства и разделби ни ги отвораат портите кон вечноживите детства. Мириси што можат да ги разбудат најскриените агонии на животот, секогаш еден чекор пред нас. Како можеме да го пронајдеме она што не сме ни занеле дека воопшто ни припаѓа. Противречноста на исчекувањето. Да се проникне во човекот е исто како тој повторно да се роди. Дали тоа, што еднаш суштински се скинало, може совршено да зацели? Центарот за грижа на деца на улица изработи прекрасни хартиени нарциси наменети за присутните, а со симболичната донација средствата беа наменети во хуманитарни цели. „Полиња со диви нарциси“ е втор роман на Саздова. Нејзиниот прв роман „Последниот чај“ за година и пол доживеа пет изданија и преведен е на српски, хрватски и бугарски јазик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.