Московскиот ансамбл за современа музика ќе настапи на затворањето на 34-тите Денови на македонска музика.

Московскиот ансамбл за современа музика ќе настапи на затворањето на 34-тите Денови на македонска музика.Ансамблот е формиран во 1990 година по иницијатива и силна поддршка на Едисон Денисов, руски композитор кој во времето на Советска Русија бил познат како припадник на андерграундот, односно алтернативната, антиколективистичката и антиконформистичката струја во руската музика. Основач на ансамблот е композиторот Јури Каспаров.Во Скопје пристигнаа пет музичари од Московскиот ансамбл за современа музика предводени од менаџерката Викторија Коршунова.Програмата на концертот, што ќе се одржи вечерва во Музејот на град Скопје, содржи дела на македонските композитори Гоце Коларовски, Михаило Трендафиловски, Јана Андреевска и Сони Петровски, и руските композитори Олег Пајбердин, Алексеј Сјумак, Сергеј Невски и Дмитриј Курљандски.Пред концертот ќе бидат промовирани два компакт-диска во издание СОКОМ со музика од современи македонски композитори изведена на ДММ 2009 и ДММ 2010.Пред синоќешниот Камерен концерт на ДММ беше промовиран компакт-дискот на македонската пијанистка Марија Вршкова.„Марија Вршкова е еден од ретките македонски музичари коишто уште од најрани денови јасно го изрази својот интерес за современата музика, а особено кон македонската музика напишана за пијано. Објавувањето на компакт-дискот на Вршкова ми причинува големо задоволство, бидејќи се појавува во период кога секој уметник веќе треба да има свое цеде. Тоа е периодот кога уметникот е во своите најубави и најплодни години и возраст кога е во полна сила. Огромно задоволство ми причинува фактот што Вршкова избра да се претстави како врвен уметник само со дела од македонски автори. Мислам дека тоа е голем комплимент за сите композитори чии дела се објавени на компакт-дискот на Марија Вршкова“ – изјави композиторката Јана Андреевска во својство промотер на изданието.Компакт-дискот е издание на СОКОМ во соработка со Македонската радиотелевизија. На цедето се застапени композиции од македонските автори Томислав Зографски, Гоце Коларовски, Драган Стојковски, Властимир Николовски, Сони Петровски и Јана Андреевска.„Пијанистката Марија Вршкова искажува особен творечки интерес кон новосоздадената музика, вклучувајќи ги делата од македонските композитори. Тоа е професионален ангажман за кој е потребно големо љубопитство, творечки инстинкт, истражувачка храброст и фантазија, и пред сè, врвен пијанизам. Такво пијанистичко умеење кое го оживотворува изведеното дело, зашто сепак, станува збор за дела кои во најголем број случаи сè уште ја бараат својата афирмација и пат“ – нагласи музикологот Снежана Анастасова-Чадиковска во текстот „Музичар со сопствена ѕвезда“ подготвен за промоцијата на дискот на Марија Вршкова.„На компакт-дискот Вршкова ни открива сопствена лиричност и обоеност во често изведуваната Суита на Томислав Зографски, доминантно ја гради кулминацијата на Тешкото за виолончело и пијано на Властимир Николовски, ги обојува со специфичен хумор не лесните виртуозни дела на Јана Андреевска, покажува извонреден усет за заедништво и динамичност во делото за пијано и оркестар на Сони Петровски, со  особена страст и посветеност им приоѓа на делата на Гоце Коларовски, наоѓа љубов и внимание за делото на младиот композитор Драган Стојковски“ – нагласи Снежана Анастасова-Чадиковска со прецизно нијансирање на делата објавени на компакт-дискот.На синоќешниот Камерен концерт во рамките на 34-тите Денови на македонска музика беа изведени дека од македонските композитори Драган Стојковски, Теа Богатинова, Борис Светиев, Ана Пандевска, Фатос Љумани, Валентина Велковска-Трајановска, Михаило Трендафиловски и Елизабета Илиевска-Бете./крај/т.д.