Македонската министерка за култура, Елизабета Канческа-Милевска во рамките на својата првата официјална посета на Народна Република Кина денеска во Пекинг оствари билатерална средба со министерот за култура и спорт на Народна Република Кина, Чаи Ву

Македонската министерка за култура, Елизабета Канческа-Милевска во рамките на својата првата официјална посета на Народна Република Кина денеска во Пекинг оствари билатерална средба со министерот за култура и спорт на Народна Република Кина, Чаи Ву, при што двајцата министри, во присуство на македонскиот амбасадор во Кина, Оливер Шамбевски, ја потпишаа Програмата за културна соработка за периодот 2012-2017 година.Канческа-Милевска и нејзиниот домаќин Чаи Ву на средбата ги реафирмираа добрите културни врски меѓу двете земји и ги истакнаа заедничките заложби за интензивирање на истите. Како што информираат од министерството за култура, по средбата, за медиумите кинескиот министер за култура, Чаи Ву изјавил дека потпишувањето на оваа извршна програма претставува силна иницијатива за  создавање на уште поинтензивни културни врски меѓу двете земји. Тој изразил задоволство од тоа што голем број кинески уметници се претставуваат на фестивалите во Македонија, дополнувајќи дека преку оваа програма ќе се интензивира и бројот на македонските уметници кои ќе се претстават во Кина.Во рамките на посетата на Пекинг, која е прва официјална посета на еден министер за култура од нашата земја, Елизабета Канческа-Милевска денеска посетила повеќе културни институции, меѓу кои и Националниот центар за сценски уметности, кинескиот Национален музеј, а се сретнала и со директорот на Државната администрација за радио, филм и телевизија, Џанг Пи Минг. На средбата било побарано во рамките на Кинеското интернационално радио да биде отворена редакција на македонски јазик, договорена е размена на македонски и кинески филмови од двете земји, а биле истакнати и заедничките заложби за поголемо учество на кинески филмови на македонските фестивали, но и презентација на македонски филмови во рамките на Филмските фестивали во Пекинг и Шангај. На средбата меѓу министерката за култура и директорот на Државната администрација за радио, филм и телевизија беше иницирана и рамена на искуства, знаење и персонал помеѓу Кинеската национална телевизија и Македонската радио телевизија.Потпишувањето на Програмата за културна соработка со Кина е проследено со реализацијата на манифестацијата „Македонскиот фолклор во Кина“ која првпат се организира во оваа земја. Во рамките на овој настан, денеска во реномираниот музеј „Џинтаи“ во Пекинг, манифестацијата е отворена со изложбата „Македонски фолклор“ на Гордана Вренцоска. На отворањето на изложбата на која присуствува многу гости и претставници на дипломатски кор, министерката за култура Елизабета Канческа-Милевска истакнала дека културните настани со кои се претставуваме се израз на длабока благодарност  за големите залагања на кинеската Влада за продлабочување и промовирање на односите со Република Македонија.Утре во еминентната концертна сала „Century“, каде што во моментов се прикажува најскапата кинеска продукција со мјузиклот „Мама миа“, концерт ќе одржи Ансамблот за народни игри и песни „Танец“. Ансамблот „Танец“ за кинеската публика ќе одржи уште еден концерт, и тоа во крајбрежниот и туристички град Далиан. /крај/мф/сн