Култура
Промоција на книгата „Apocalypse”
Во среда (27 април), во Клуб Менада (Стара скопска чаршија), со почеток во 21.30 часот, ќе биде промовирана најновата книга на Џабир Дерала – „Apocalypse”
Книгата „Apocalypse” од Џабир Мемеди Дерала е книга поезија и фотографии, во издание на Shortcut Production во соработка со Културна установа Блесок, во април 2011 г. Книгата содржи 45 песни на англиски јазик и 19 илустрации. Уредничка на книгата е Венди Хаслер-Форест, проект менаџер при Musicians without Borders (Музичари без граници). Книгата е поделена во неколку поглавја, при што сите ја прикажуваат мрачната реалност на сегашноста и уште помрачната иднина. Политичките песни ги прикажуваат авторовите погледи на состојбите на човековите права во земјата и во светот. Некои песни го опишуваат порочниот живот во градот, водејќи го читателот низ светот на баровите, сексот, алкохолот и потребата за самоуништување. Повеќе песни ја раскажуваат приказната за вечните прашања на постоењето и смислата на животот. „Мрачни и заводливи, понекогаш песимистички, но, пред сè, бунтовни“, вака уредничката Хаслер-Форест ги опишува песните.„Нивната реалност е болна на моменти, но нужна. Како доктор кој на пациентот мора да му ја соопшти дијагнозата, се редат речениците една по друга, секогаш лични – никогаш општи или неутрални, реченици што го носат знамето на вистината во револуцијата на духот“, ќе забележи Мирослав Стојановиќ – Шуки, сликар и мултимедијален уметник. Промоцијат ана книгат ана Дерала ќе биде проследена и со ексклузивен сценски перформанс на познатиот рок бенд Mooger Fooger и на авторот. Повеќето од стиховите на новиот албум на Mooger Fooger (наскоро) се преземени од „Apocalypse” на Дерала.Фотографиите и илустрациите на Џабир М. Дерала, како и делата на Мирослав Стојановиќ – Шуки ќе бидат презентирани на големо платно. Најавено е дека На промоцијата ќе говорат Венди Хаслер-Форест, Игор Исаковски, писател и сопственик на Блесок и Мирослав Стојановиќ – Шуки. Делара е автор на поезија, проза, мултимедија, фотографија а досега ги има издадено книгите „Мажот со коси на дете“ (1999) и „Apocalypse“ (2011).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.