Култура
Изложба на „Арт И.Н.С.Т.И.Т.У.Т“ во Мала станица
Во Националната галерија на Македонија, објект Мала станица, во 20 часот ќе биде отворена изложбата со наслов „Тактика институционалис“ на уметничкиот колектив „Арт И.Н.С.Т.И.Т.У.Т.“
Создавањето на овој колектив е инициран од идејата „да се подигне свеста на пошироката јавност во однос на современата уметност и интеркултурниот дијалог со помош на огромната моќ на уметноста преку нејзините средства и ненасилно да ги менува нештата во нашето општество во позитивна насока“, што, всушност, може и да се нарече нивни манифест.Токму во таа смисла е креирано и името на колективот „Арт И.Н.С.Т.И.Т.У.Т. (Иновативна, Научна, Студија на Трудот, Идеализмот и Трансценденталноста на Уметноста и Творештвото)“.Од досегашните нивни изложби, перформанси, инсталации, интерактивни театарчиња…, воочлива е побуната и интересот да се создаде ликовен јазик на меѓусебно поврзување во заеднички проекти, кои ја деконструираат конвенционалноста и апсолутноста на уметничкото дело.Работата во група или колектив подразбира и меѓусебно поврзување и „воспоставување врска“ и креирање на една таканаречена матрица која од „колективен индивидуализам“ преминува во „индивидуален колективизам“, сè со цел да се постигне енергија на нова, повисока и неограничена свест во уметничкиот израз.Изложбата „Тактика институционалис“ е продолжение на заедничките цели во уметноста на колективот „Арт И.Н.С.Т.И.Т.У.Т.“, каде се практикува оплодување на нивните идеи, пристапи и уметнички пракси, се зголемува колективната интелигенција овозможена од вкрстување и комбинирање на повеќе креативни умови и дисциплини, со што се збогатува нивната (и нашата) социјална активност и перцепција преку вмрежување на капацитетите кои се вклучени.Уметничкиот колектив постои повеќе од две години. Во неговата активност учествуваат петнаесетина млади уметници, а своите досегашни настапи пред културната јавност ги реализираа во просториите на Геолошкиот институт во Скопје.Изложбата „Тактика институционалис“ е нивното прво заедничко уметничко претставување во институциите на системот
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.