Култура
Априлски балетски вечери ќе започнат на 13 април
Априлските балетски вечери кои за првпат ќе се случуваат од годинава, ќе започнат на 13 април со премиерите на современите балетски претстави „Изгубена верба“ на кореографот Саша Евтимова и „Болеро“ во кореографија на Искра Шукарова
Ќе се одиграат седум балетски претстави од кои шест на големата и една на малата сцена на МОБ. Ќе гостуваат балетски ансамбли од САД, Португалија, Романија, Италија, а ќе настапи и балетскиот ансамбл од Македонска опера и балет.„Априлските балетски вечери би сакал да бидат пандан на Мајските оперски вечери. Наредните години сакаме да направиме балетски фестивал со повеќе претстави и да има гостување на повеќе странски гости, солисти, кореографи,“ изјави уметничкиот директор на Балетот, Горан Божинов.„Болеро“ од Морис Равел е култно музичко дело, кое го работеле и други кореографи, но она што за мене беше инспирација е креацијата за нашата првенка Александра Мијалкова. Размислував за нешто ново и современо кое би одговарало на телесните предиспозиции на Мијалкова и Дмитри Чеботар. Се работи за спој на машко и женско во еден простор кој е платформа во облик на триаголник. Основата на триаголникот е симбол на оган, односно страст која е отелотворена преку нивните движења. Концептот се базира на геометријата на триаголникот и на двете тела во тој простор, “ изјави Искра Шукарова, кореограф на „Болеро“.„Интересно е што во една вечер се судираат двајца познати кореографи кои достојно ја претставуваат државата надвор. Со Искра освен што имаме различни стилови во едно се поклопуваме, а тоа е што работам со квадрат, а таа со триаголник и претставува еден интересен момент кога овие две претстави можат да се сврзат заедно. „Изгубена верба“ беше премиерно изведена минатата година во рамките на Скопско лето, но сепак 13 април е официјална премиера за МОБ. Направени се некои измени, и овојпат малку подобро ќе биде искорегирана претставата,“ изјави Саша Евтимова, кореограф на „Изгубена верба“Априлските балетски вечери ќе завршат со светската премиера на балетската претстава „Дракула“ на 29 април кога е и Светскиот ден на танцот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.