Култура
Башески: Ги повикувам сите релевантни институции да извршат увид
Директорот на Филмски фонд, Дарко Башески денеска ги повика сите надлежни институции да извршат контрола на неговата работа во Филмскиот фонд.
Директорот на Филмски фонд, Дарко Башески денеска ги повика сите надлежни институции да извршат контрола на неговата работа во Филмскиот фонд.
Од моја страна ќе направам се да се расчисти состојбата, посебно затоа што бев обвинуван дека стојам зад проневера на пари. Функцијата во Еуроимаж е волонтерска. Моја грешка е што не сум следел. Барам да се расчисти се и да се направи евиденција. Во моментов замрзнати се сите исплати“, истакна Башески.
Башески беше обвинет за проневера на европски пари за филмови. Претставникот во „Еуроимаж“ со чиј потпис се добиваат парите за прикажување на филмови, вели дека потпишувал верувајќи им на дистрибутерите дека ќе ги прикажат филмовите со носење на плакати.
Повикувајќи се на Законот за Филмски фонд тој вели дека фондот ја следи состојбата со дистрибуцијата и киноприкажувачката мрежа во Македонија, но дека ја нема надлежноста над киносалите и над дистрибутерите.
„Следењето на состојбата со дистрибуцијата и киноприкажувачката мрежа во Македонија до октомври 2010 година воопшто не постоеше никаде, а во Филмскиот фонд беше практично неизводливо, бидејќи имаше само тројца невработени. Кога филмскиот фонд се доекипира со уште три нови вработувања, од октомври 2010 една од вработените во фондот започна комуникација и прибирање на извештаи за прикажување на филмовите од дистрибутерите и киноприкажувачите со цел следење на состојбата со дистрибуцијата и киноприкажувачката мрежа“, образложи Башески.
Од зачленувањето во Еуроимаж за поддршка за дистрибуција се јавиле 13 дистрибутери, меѓу кои С.В РСА, МКЦ, Манаки Филм, Цинестар, КТ филм и Медија, Висат Медија, Фидалго Филм, Симплисити, Катавеј. Спорни се Медија фактори кој во 2008 и 2009 година добил поддршка за дистрибуција на седум филма, а само два се прикажани, Еуро филм од 2007 добил поддршка за дистрибуција на 13 филма од кои пет се прикажани, за осум нема потврда, а за два филма е изгубена добиената поддршка, Арена филм од 2008 добил поддршка за дистрибуција на 23 филма- 11 се прикажани, за 12 нема потврда и за два фима е изгубена добиената поддршка, Балкан филм од 2008 добил поддршка за дистрибуција на 33 филма, 14 се прикажани, а за 19 нема потврда.
Од изнесените податоци станува збор за проневерени околу 200 илјади евра.
Башески информираше дека во координација со Еуроимаж ќе размисли за покренување на кривични пријави против дистрибутерите./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.