Македонија
Ќе се испитува дали некој од тимот што ја пораѓал жената во Гевгелија бил пијан
Комисија за стручен надзор го испитува породувањето на триесет и двегодишната жена од Дојран која во четвртокот вечерта почина заедно со нејзиното новороденче во гевгелиската болница.
Министерството било известено дека синоќа во тек на изведување царски рез настапила смрт кај родилка и нејзиниот плод. За жал реанимацијата на мајката и плодот биле неуспешни. Во текот на породувањето, покрај гинеколози биле присутни и анестезиолози, неонатолози и интернисти.
Од страна на директорот на болницата била повикана полиција и е известено јавно обвинителство. Телата се предадени на обдукција во Судска медицина. Земени се изјави од сите лекари согласно законските прописи, а од двајцата гинеколози и анестезиолози е земена и крв за утврдување присуство на алкохол и недозволени супстанци.
„Министерството за здравство ги презема сите потребни мерки за испитување на причините кои во текот на вчерашниот ден довеле до смртен исход на родилка и нејзиниот плод во Општа болница Гевгелија. По добивање на резултатите од обдукцијата,како и стручниот надзор ќе бидат преземени соодветни мерки, во согласност со законската регулатива. Воедно, Министерството изразува сочувство до семејството за трагичниот настан и за загубата на два живота“, соопштуваат од Министерството.
Порталот „Здравство24“ пишува дека анестезиологот кој бил во операционата сала наводно бил во под дејство на алкохол./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бугарски државјанин протеран од земјава, кај него се пронајдени боксирач и транспарент со навредлива содржина
Полицијата уапси бугарски државјанин на Граничен премин Деве Баир, кај него се пронајдени боксирач и транспарент со навредлива содржина.
Според информациите на МВР, вчера во 13:30 часот на Граничен премин Деве Баир, на влез во државата, полициски службеници го приведоа Н.И.Л.(47) од Република Бугарија затоа што при гранични проверки и извршен преглед во содејство со царински службеници на патничко возило „хонда џез“ со бугарски национални ознаки, со кое допатувал, биле пронајдени и одземени метален боксирач и транспарент со навредлива содржина.
Од Основен суд Крива Паланка му била изречена парична глоба и санкција „протерување на странец од земјата“ во траење од една година.
На 13.01.2026 во 02:10 часот Н.И.Л. е спроведен во Граничниот премин Деве Баир и е предаден на бугарските погранични полициски служби.
Македонија
МНР апелира македонските државјани да го напуштат Иран во прва можна прилика
Министерството за надворешни работи апелира сите македонски државјани што се наоѓаат во Иран да ја напуштат земјата поради влошената состојба.
„Поради влошената безбедносна состојба во Исламска Република Иран, Министерството за надворешни работи на Република Северна Македонија апелира до македонските граѓани кои се наоѓаат на територијата на оваа држава, истата да ја напуштат во прва можна и безбедна прилика. Истовремено, се апелира да се одложат сите патувања кон Иран кои не се неопходни“, велат од МНР.
Министерството за надворешни работи ги има ставено на располагање сите свои капацитети за асистенција на државјаните на Република Северна Македонија, преку 24-часовниот СОС дежурен телефон +389 75 268 736, електронската адреса [email protected], како и преку дежурниот телефонски број на Дипломатско-конзуларното претставништво на Република Северна Македонија во Анкара: +90 539 456 97 10.
фото/епа
Македонија
Обвинителството бара притвор за лицето што ја искрши влезната врата на бугарската Амбасада
Основното јавно обвинителство Скопје поведе постапка против 55-годишник осомничен за кривично дело – Оштетување туѓи предмети од член 243 став 2 од Кривичен законик.
Јавниот обвинител предложи судијата на претходна постапка да определи мерка притвор спрема осомничениот бидејќи постојат околности што укажуваат на опасност од бегство и околности го оправдуваат стравувањето дека осомничениот ќе го повтори кривичното дело.

