Култура
Борис Трајанов ќе прослави 25 години светска кариера
Македонскиот баритон Борис Трајанов ќе прослави 25 години светска кариера со сценски настап во делови од оперите „Набуко“ и „Риголето“ на сцената на МОБ на 16 февруари
Специјални гости на гала прославата ќе бидат Франческо Роза диригент од Италија и нашите познати оперски уметници Ана Дурловска и Александар Стефаноски заедно со хорот и оркестарот на Македонската опера и балет.„Голема чест за МОБ е што македонскиот светски познат баритон, својот јубилеј ќе го прослави токму на оваа сцена. Јубилејот нема да биде гала, туку сценски концерт на кој ќе се изведат два чина од оперите „Набуко“ и „Риголето“. Специјални гости се Ана Дурловски која ќе настапи во улогата на Џилда, Александар Стефановски кој е млад бас кој ќе настапи во улогата на Захарие. Останати солисти во „Набуко“ ќе бидат Павлина Новакова-Ѓоргиев, Ирена Кафкалевска, Марјан Николовски, Бранислав Поп-Ѓоргиевски. Во „Риголето“ покрај Ана Дурловски и Борис Трајанов ќе настапат Дејан Стоев, Бранисав Поп-Ѓоргиевски и хорот и оркестарот на МОБ. “ изјави Дејан Прошев, директор на МОБ.„Среќен сум што ќе имам прилика и чест да настапам на сцената на МОБ. Пред точно 25 години на истиот датум настапив, поточно влетав во оперската „Циганскиот барон“ како замена за еден мој колега, кој се откажа поради болест. Морав за кратко време да соберам сили и за првпат да настапам во една комплицирана оперета. Со Франческо Роза имам настапувано на повеќе продукции во Италија и никогаш нема да ја заборавам нашата прва средба со него во Трст и уште тогаш знаев дека се работи за еден голем диригент.Морам да кажам дека на моја иницијатива и имав огромна желба на овој настап, на мојот јубилеј да настапат Ана Дурловски и Александар Стефановски. Тие двајца заедно со Благој Нацоски се наши достојни претставувачи на македонската оперска музика во светот. Пред 15 години посакав да не бидам единствениот кој пее надвор, и полека тој сон се остварува,“изјави Борис Трајанов.Маестро Борис Трјанов имал повеќе од 750 настапи во 50-на улоги на околу сто светски оперски сцени како Берлин, Виена, рим, Фиренца, Болоа, Хамбург, Франкфурт и др. Како амбасадор на мирот на УНЕСКО настапувал на гала концерти во Њујорк, Париз, Венеција.За оваа година планира да сними цеде со македонски народни песни придружуван од симфонискиот оркестар и македонски народни инструменти
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Приказната за Силјан“ ја освои наградата од публиката на Cinema Eye Honors
Документарниот филм „Приказната за Силјан“, во режија на Тамара Котевска, е добитник на Audience Choice Prize на Cinema Eye Honors, една од најзначајните и највлијателни меѓународни награди за документарен филм.
Наградата, која се доделува исклучиво врз основа на гласовите на публиката, доаѓа по силна меѓународна конкуренција. „Приказната за Силјан“ победи во конкуренција со документарни филмови од Бразил, Канада, Палестина, Гана, САД, Данска и Нов Зеланд, потврдувајќи дека македонската приказна има моќ да одекне на светската сцена.
Audience Choice Prize е награда што произлегува директно од изборот на публиката и ја одразува нејзината поврзаност со филмот, поради што се смета за едно од најрелевантните признанија во современиот документарен филм, често препознаено како силен показател за меѓународен одек и понатамошен успех.
Ова признание е резултат на масовна поддршка од Македонија и светот, кои се вклучија во гласањето и ја претворија оваа награда во заедничка победа, надминувајќи национални и географски граници.
„Ова е можеби најважната награда што ја освои „Силјан“, затоа што доаѓа од публиката. Таа не е само признание за филмот, туку и за луѓето кои гласаа за него. Гласањето за оваа награда ја сплоти македонската јавност и безусловно го даде својот глас за оваа фолклорна бајка. Во силна меѓународна конкуренција, победи гласот на публиката и искрената емоција“, изјави режисерката и продуцентка на „Силјан“, Тамара Котевска.
Филмот, кој беше откупен од National Geographic Documentary Films и прикажан на низа престижни меѓународни фестивали, уште еднаш потврди дека локалните, автентични приказни имаат моќ да зборуваат универзален јазик и да обединат публика ширум светот.
Со освојувањето на Audience Choice Prize, „Приказната за Силјан“ го заокружува својот исклучителен меѓународен пат и јасно ја позиционира Македонија како простор од кој доаѓаат приказни со силен, препознатлив и човечки глас на светската документарна сцена.
Култура
Кинотеката на Македонија – Половина век филмска меморија
Програмата на Кинотеката на Македонија за јануари 2026 претставува внимателно осмислена и содржински богата целина што уште еднаш ја потврдува улогата на оваа институција како темел на филмската култура, едукацијата и критичката мисла во земјава. Во година во која Кинотеката одбележува значајни педесет години од своето формирање, јануарската програма функционира и како симболичен преглед на нејзината мисија — да го чува, прикажува и контекстуализира филмското наследство, истовремено отворајќи простор за современи авторски гласови и нови генерации гледачи.
Посебно место во програмата заземаат тематските целини КИНО УТРО, со проекции на анимирани филмови наменети за младата публика, чија цел е да ѝ се приближи киното како уметност и искуство уште од најрана возраст. Преку овие проекции, Кинотеката активно ја гради идната публика и ја зацврстува врската помеѓу младите и филмскиот медиум. Во јануарската селекција се вклучени и избрани содржини од фестивалот КИНЕНОВА, кои носат свежи авторски перспективи и современи филмски практики, како и проекции на значајни документарни остварувања, меѓу кои „Југо Флорида“ и „Фанк Ју“, филмови што со ангажиран и аналитичен пристап ги отвораат културните и општествените прашања на регионот.
Особено внимание привлекува и долгоочекуваниот музички документарец „Трет свет“, посветен на култниот хрватски бенд Хаустор, кој преку архивски материјали и сведоштва нуди длабински поглед кон една од највлијателните музички појави на екс-југословенскиот културен простор. Домашната продукција е застапена со проекции на најновите македонски филмови „Утре наутро“, во режија на Јани Бојаџи, и „Сите го викаат Реџо“, копродукција со Косово и Албанија, што сведочи за отвореноста на македонската кинематографија кон регионалната соработка и актуелните тематски предизвици.
Програмата се заокружува со проекцијата на антологиското ремек-дело „Небото над Берлин“ на Вим Вендерс — филм што и по децении останува непресушен извор на инспирација, поетски запис за човечката осаменост, љубовта и духовната потрага по смисла. Неговото прикажување во рамките на јубилејната година на Кинотеката има и дополнителна симболичка тежина, потсетувајќи на континуитетот на филмската уметност и нејзината моќ да опстои над времето.
Половина век по своето основање, Кинотеката на Македонија не е само простор за проекции, туку жив културен организам што активно ја обликува филмската свест, го чува колективното паметење и создава простор за дијалог меѓу минатото, сегашноста и иднината на киното. Јануари 2026 е уште една потврда дека оваа институција останува незаменлив столб на културниот живот и еден од најважните чувари на филмската уметност во земјава, се наведува во соопштението на Кинотеката.
Целосна ПРОГРАМА
Култура
Денеска ќе биде погребана Брижит Бардо
Француската филмска актерка Брижит Бардо, која почина минатиот месец на 91-годишна возраст, денеска ќе биде погребана во летувалиштето Сен Тропе на француската ривиера, објави Ројтерс, повикувајќи се на локалните власти.
Погребната церемонија ќе се одржи во 10 часот во црквата „Нотр Дам де л’Асумпсион“, по што Бардо ќе биде погребана во строга приватност на градските гробишта. Комеморација отворена за граѓаните и обожавателите ќе се одржи во старата градска четврт Ла Понш.
Бардо светската слава ја стекна со филмот „И Бог ја создаде жената“ и стана една од најголемите икони на француската поп-култура. По повлекувањето од филмот во 1973 година, се посвети на заштита на животните, но подоцна беше контроверзна фигура поради своите политички ставови.

