Македонија
Нов состанок на работната група за конечно решение
Работната група за спроведување на Договорот од Пржино, за излез од политичката криза, ќе се состане во четврток во 11 часот, а за каков било договор мора да се согласат сите четири партии, најави посредникот Питер Ванхауте за Алсат М телевизија.
„Работната група ќе се состане во 11 часот и за каков било договор мора согласност од сите четири партии. Во спротивно ќе нема договор“, изјавил посредникот Ванхауте за Алсат телевизија.Политичките партии се блиску до договор, а во четврток закажаната средба на работната група е за да се допрецизираат некои отворени прашања. По изборот на уште петмина јавни обвинители во тимот на специјалното обвинителство, со што Катица Јанева доби тим од 12 мина, постигнат е напредок и околу другите прашања, како за Законот за Влада, односно министерските овластувања, Анкетната комисија за прислушувањето, но се очекува и дефинирање на законите за дојавувачите и за објавувањето на „бомбите“.Во 11 часот е закажана и заклетва на назначените помошници јавни обвинители на специјалната обвинителка Катица Јанева, која во среда, по изборот на нејзините помошници рече дека може да се очекуваат првите обвиненија околу Нова година. За претседателот на судот Петар Аневски, дозволувањето на уште петмина помошници на Јанева е поради нејзините објаснувања во кои вели дека овие лица и се потребни затоа што имале искуство со работа на некои познати случаи од ОЈО, а доколку се појави конфликт на интереси, тие ќе бидат сменети. „Има наведено повеќе точки и тие за Советот беа прифатливи“, вели Аневски.Јанева, за некои медиуми во среда потврди дека веќе работи на триесетина случаи, за кои постојано добивала нови материјали./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Постапката за екстрадиција на Палчо ќе биде спроведена преку МВР, на осомничениот веќе му е определен притвор
Јавното обвинителство на Република Северна Македонија е известено дека Министерството за правда добило официјална информација од Република Турција дека се одобрува екстрадицијата на лице осомничено за две кривични дела грабнување, како и за две убиства на свиреп начин.
Постапката за екстрадиција ќе биде спроведена преку Министерството за внатрешни работи.
По предлог на Основното јавно обвинителство Скопје на осомничениот веќе му е определена мерка притвор која треба да започне да се применува веднаш по неговото испорачување, се додава во соопштението на Јавното обвинителство на Република Северна Македонија.
Македонија
Дозволена екстрадицијата на Љупчо Палевски Палчо
Министерството за правда преку писмено соопштение информираше дека е добиено официјално известување дека екстрадицијата на Љупчо Палевски е дозволена.
Претходно министерот за правда Кренар Лога на социјалните мрежи потврди дека е дозволена екстрадиција на Палевски.
„Ве информирам дека денес со официјална информација од Република Турција добивме одобрение за екстрадиција на лицето Љупчо Палевски. Позитивниот исход на постапката произлегува после сите максимално преземени мерки и активности од делокругот на надлежности на Министерството за правда.“
Љупчо Палевски е осомничен за убиствата на 14-годишната Вања Ѓорчевска и велешанецот Панчо Жежовски.
Македонија
Битиќи: Патриотски ќе одиме кон повисоки плати и пензии, кон „Едно општество за сите“
„Ова зад мене е Спомен-костурницата, симбол на прогресивното и мултикултурно Куманово, темелот на АСНОМ-ска Македонија. Градот кој во 2015 година го потресе трагедија која беше одраз на еден режим кој сакаше да ја скрши Македонија. Сеќавањата сè уште остро нè потсетуваат и опоменуваат на тие мрачни времиња кога ВМРО-ДПМНЕ ја држеше заробена државата во мрак исполнет со стравови“, вели во видео обраќање од Куманово, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој нагласува дека СДСМ седум години градеше општество на соживот, меѓусебно разбирање и почитување на различностите, притоа предупредувајќи дека „наследниците на режимот бараат повторно да се издигнат од пепелта, нивната шовинистичка политика повторно надвиснува над Македонија“.
Битиќи предупредува дека со ВМРО-ДПМНЕ и неговиот национализам постои опасност државата да се врати во периодот кога имаше поделби на етничка и религиозна основа.
„Со ВМРО-ДПМНЕ и нивниот национализам може само да се вратиме во времето кога вештачки се обидуваа да креираат поделби и раздори на етничка и религиозна основа. На овие парламентарни избори, секој глас за нив, е глас за времињата налик на тие од 11 години режим. Но наспроти нив, стоиме ние, СДСМ и Коалицијата за европска Македонија, со кои, патриотски, а не националистички, ќе одиме кон повисоки плати, повисоки пензии и пред сè, кон Едно општество за сите“, вели Битиќи.