Култура
Можен е и нов конкурс за директор на Охридско лето
Доколку заинтересираните кандидати за прв човек на манифестацијата “Охридско лето” не понудат квалитетна програма за развој и работа на установата, може да се случи да се распише нов конкурс
Како што пишува OhridNews повикувајќи се на извори од фестивалот. Солидно изработената програма ќе биде пресудна за одлуката која наскоро треба да ја донесе министерот за култура Елизабета Канческа- Милеска. Притоа, ќе се гледа и на способноста за комуникација на кандидатот, како и неговото познавање на странски јазици. „ Доколку не се наиде на кандидат кој ќе ги исполнува потребните услови постои можност министерството да распише нов конкурс, а сегашниот вршител на должноста, Васил Зороски да остане на оваа функција заклучно месец декември,кога и му истекува шестмесечниот мандат како в.д. директор“, велат извори за OhridNews. Конкурсот за избор на директор на Националната установа – фестивал “ Охридско лето” беше распишан на 6- ти октомври и трае 15 дена. Како што пренесува OhridNews, Наташа Спасеска – сопственичка на агенција за недвижности, и екс-портпарол на општинскиот комитет на ВМРО-ДПМНЕ – Охрид, Јован Секулоски – вработен на царина и исто така екс портпарол на ОК на ВМРО- ДПМНЕ, Васил Ложанкоски – вработен во локалната самоуправа во одделот за односи со јавност и поранешен портпарол на екс градоначалникот Никола Наумов, се дел од заинтересираните кандидати за директорската функција на фестивалот Охридско лето. Но, како што потенцираат извори од фестивалот, на конкурсот се очекува да се пријават и десеттина кандидати од Скопје, но и останатите градови низ земјава. Дел од македонската уметничка фела смета дека на директорското место на овој реномиран фестивал треба да застане човек со добар стаж во менаџирањето на културата кој добро ќе го познава и минатото на Охридско лето. Дел од македонските уметници предлагаат и распишување меѓународен конкурс по примерот на светските фестивали
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.