Култура
Убаво отворање на Манаки, а за ,,Мајки“… подоцна
Како што доликува на фестивал со традиција и докажани вредности, 31-то издание на Браќа Манаки беше отворен со содржајна и одмерена церемонија, сношти во домот на културата во Битола
Кусата сценска анимација на приказната за Лабин и Дојрана се чини им се допадна на сите присутни (а беше преполно) а особено на странските гости кои ги имаше во поприличен број. Ботл-рециталот на Зоран Маџиров и во функција на музичка илустрација на спомнатата приказна, но и како солистички настап беше впечатлив и изнуди спонтан аплауз во салата. Директорката на фестивалот Лабина Митевска (која патем речено изгледаше исклучително елегантно), со соопштувањето на имињата на годинашниве лаурети беше наградена со долготрајно ракоплескање упатено лично до неа затоа што во Битола годинава ги донесе мега ѕвездите од филмската уметност, Вилмош Жигмонд, кинематограферот кој е потпишан на наслови како што се Блиски средби од трет вид, Небеска порта, Ловец на елени, Црната Далија, Ослободување… и Дерил Хана, харизматичната актерка која оствари исклучителни улоги во филмовите Вол Стрит, Фурија, Блејд Ранер, Роксана, Челични Магнолии, Кил Бил…Убаво е кога на сцената ќе се појават вакви фигури кои со својата работа ја задолжиле филмската уметност. Колку и да е формално-куртоазен чинот на доделувањето на признанијата на Жигмонд и Хана, сепак, тоа што наградите им ги доделија лично претседателот на републиката и министерката за култура, му дава вистинска вредносна димензија на фестивалот. Кусото обраќање на Вилмош Зигмунд кон присутните само ги дополни сознанијата за каков калибар од уметник се работи. Дерил Хана, со својата појава и духовитост на сметка на своите високи потпетици со кои тешко се снаоѓа, буквално ја освои битолската публика. Инаку, вчера таа прошета и на Широк сокак (во малку пониско издание) и битолчани веројатно ќе треба сериозно да размислуваат за поставување на ѕвездени плочи на својата главна улица.Обраќањето на градоначалникот Владимир Талевски пред своите сограѓани оваа година ќе остане запаметено по тоа што на отворена сцена ,,изнуди“, од претседателот Ѓорге Иванов и од министерката Елизабета Канчевка-Милевска согласност за обнова на киното ,,Манаки“, во центарот на Битола.Најавувањето на премиерната проекција на „Мајки“ на Манчевски повторно изнуди аплауз, кој пак на крајот од филмот беше далеку повоздржан. Актерската екипа во полн состав сепак, би рекле повеќе куртоазно, беше прифатаена и наградена со ракоплескање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.