Македонија
Груевски: Тодоров нема лична одговорност за смртта на родилките
Подготвено барање за отповикување на министерот за здравство Никола Тодоров, по неколкуте смртни случаи за само неколку дена на трудници и неродени деца, достави во четврток на седницата на Собранието за пратенички прашања, пратеничката на СДСМ, Рената Дескоска до премиерот Никола Груевски, кој требаше само да го потпише.
Сепак тоа не се случи, а Груевски во одбрана на министерот за здравство наброја што се ВМРО-ДПМНЕ направила за здравството од како се на власт, дека се вложиле 100 милиони евра за нова апаратура, дека се праќаат по 1.000 медицински лица на обуки во најдобрите универзитети, дека се реконструираат и се градат нови болници, дека неколкупати се зголемувала платата на лекарите и друго.
„Примерот на починатите мајка и неродено дете во Гевгелија и неколкуте други деца за кои животот штотуку требаше да почне, го вперува прстот во врвот на здравството. Тодоров како лаик за здравство не требаше да прифати да биде министер. Ги потценивте сите лекари во ВМРО-ДПМНЕ кога за министер им ставивте правник “, рече Дескоска, поставувајќи го пратеничкото прашање.
Таа појасни дека во болницата во Гевгелија постојат одделенија за гинекологија и за педијатрија без вработен специјалист гинеколог или педијатар, а се носат заменски лекари од други градови и дека тоа е во надлежност на министерот кој треба да обезбеди персонал и да прати лекари на специјализација.
„Ја разбирам нејзината потреба како пратеник на СДСМ да бара разрешување на министри, да бара нивна вина, меѓутоа покрај тоа што е демократски и легитимно, секое барање треба да има смисла, да има агрументи, а не само да се впери прст за некоја лична вина. Што остави СДСМ во 2006, остави хаос, никакво инвестирање во здравството. Сега имаме 11 пати поголем буџет за здравство. Тоа покажува колку во тоа време партијата која ја претставува пратеничката сакала да вложува во здравството. Системот хаос, никакви обуки за лекари, никаков систем за подобра организација во овој ресор. Денеска, имаме голем пресврт и силно подобрување. Тоа не значи дека сè е добро и не може ништо да се поправи, но факт е дека ова се години во кои во здравството се направија инвестиции и системски зајакнувања. 100 милиони евра за набавка на нови апарати, ставени во употреба на задоволство на граѓаните. Целосно реконструирање и обнова на болници и клиники. Наследивме болници и клиники во распад. Што паднало, не станало. Што се уништило никој не го поправил’, рече Груевски.
Наброја дека вовеле системски мерки за стимулација на лекарите и персоналот, го вовеле ДРГ системот, се зголемиле платите во здравството, се прават крупни работи кои никогаш во таков краток период не се направени. Во здравството се имплементираат нови методи на операции, дијагностицирање, медицински персонал оди на обуки во многу напредни болници, се даваат голем број стипендии.
„Детали за ова ќе слушнете на денот на интерпелацијата. Што сè е направено во здравството ќе слушнете во интерпелацијата“, рече Груевски.
„Здравството е нешто каде најмногу може да се критикува. Ќе се случи некоја несреќа и најлесно е да се впери прстот во министерот без разлика дали има лична вина. Постојат институции кои ќе видат зошто некој починал и кој треба да носи одговорност ако имало некоја грешка. Како што ќе испаднат тие истажувања за несреќните случаи, така ќе се постапи“, додаде Груевски.
Дескоска не беше задоволна од одговорот и рече дека „за жал очигледно за вас човечкиот живот нема значење“.
„Ова покажува дека секојдневните смртни случаи во здравството не се случајни, туку е од негрижа. Затоа вашите сопруги се пораѓаат во приватните болници, а не во јавните. Вие ги туркате граѓаните да плаќаат здравство, а да се лечат во приватни установи каде вашиот ортак во купување парцели е главен инвеститор“, рече Дескоска, која додаде дека бегање од одговорност не е одговор./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајка на патот Радовиш – Штип, сообраќајот во прекин
Од 18:05 ч. сообраќајот на магистралниот пат Радовиш – Штип, во близина на „Алкопласт“, е во прекин поради сообраќајна незгода, соопшти АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Владата ќе ја одбележи 121 годишнината од смртта на Гоце Делчев
Владата на Република Северна Македонија, на 04.05.2024 година (сабота), ќе ја одбележи 121 годишнината од смртта на Гоце Делчев со положување свежо цвеќе на неговото вечно почивалиште, во црквата „Св.Спас“,Скопје.
По тој повод, во 10:30 часот, свежо цвеќе ќе положи претседателот на Република Северна Македонија, Стево Пендаровски, владина делегација предводена од Славјанка Петровска, министерка за одбрана во Владата на Република Северна Македонија, Каја Шукова, министерка за животна средина и просторно планирање во Владата на Република Северна Македонија.
Македонија
Димитриевски во Тетово: Ја бараме поддршката на граѓаните на претстојните избори за работите во Македонија да не бидат како досега
Претседателот на Движењето ЗНАМ – За наша Македонија, Максим Димитриевски денеска беше во Тетово, каде што со носителот на листата на кандидати за пратеници во ИЕ 6, Небојша Захариески и останатите кандидати, ја промовираа програмата на Движењето за претстојните парламентарни избори „Проглас за достоинствена Македонија“.
Димитриевски во изјавата за медиумите рече дека Движењето ЗНАМ – За наша Македонија се етаблираше како нова политичка сила на македонскиот политички простор токму со поддршката на граѓаните.
„Ја претставуваме програмата и ја бараме поддршката за нашите кандидати за пратеници предводени од господин Небојша Захариески во ИЕ 6. Јас знам дека никогаш повеќе ЗНАМ нема да дозволи нештата во државата да бидат исти. Ќе бидеме коректив на идната власт, но и на идната опозиција. Нашиот број секојдневно се зголемува, а и поддршката од граѓаните е се поголема и верувам дека заедно ќе успееме да ја вратиме државата таму каде што припаѓа, во рацете на граѓаните“.
Тој ги повика граѓаните масовно да ја дадат својата поддршка на Движењето ЗНАМ – За наша Македонија, на носителот на листата во ИЕ 6, Захариески, како и на сите кандидати за пратеници.
Со тоа, рече Димитриевски, граѓаните го даваат својот глас од граѓанин за граѓанин. Ние сме политички субјект кој расте токму со граѓанската поддршка. Продолжуваме понатаму со позитивни промени во државата, со позитивни промени во Македонија.
Носителот на листата во ИЕ 6, Небојша Захариески, рече дека со она што го нудат во програмата „Проглас за достоинствена Македонија“ сакаат да ги вратат илинденските и асномските темели на државата.
„Сакаме да ја направиме државата самоодржлива, со што ќе биде и самостојна. Сакаме да градиме стабилни меѓуетнички односи, а Тетово е симбол за добар соживот“, рече Захариески.
Тој додаде дека нивна цел е добро владеење, правна држава, како и запирање на клиентелизмот, непотизмот и корупцијата, со што, како што рече, ќе го дадат својот максимум за Македонија.