Култура
Награди на ДПМ за Благој Самоников и Ефтим Клетников
Друштвото на писателите на Македонија објави двајца добитници на годишните награди на оваа, најстара писателска асоцијација. Наградата „Ацо Шопов“ за најдобра поетска книга издадена во текот на 2010 година ја доби штипскиот поет Благој Самоников за стихозбирката „Неизносена ведрина“
Во образложението на Комисијата на ДПМ за доделување на наградата „Ацо Шопов“, која беше во состав Георги Сталев – претседател, Трајче Кацаров и Иван Василевски – членови, се нагласени најбитните карактеристики на награденото дело.„Книгата на Самоников се карактеризира со оформени и зрели поетски резултати, стилски мошне кохерентни, кои песната ја објавуваат во автохтон поетски тоталитет релевантен за афирмација на современата македонска поезија и квалитативно збогатување на нејзината развојна традиција.Над егзистенцијалната тескобност, што се чувствува во стиховите на поезијата на Самоников, авторот ја издигнува песната и нејзината вонвременска димензија како коректив на сеопштата несигурна вистина и низ луцидна иронично-апсурдна поетска разврска поентира со поетови согледби што секогаш се некаде помеѓу реалното и иреалното.Впрочем, човековиот восхит, но и трепет пред убавината треба да го бараме во тие релации, а поезијата е токму вистинскиот израз за тоа“ – стои во образложението на Комисијата за доделување на наградата „Ацо Шопов“.Добитникот на наградата, поетот Благој Самоников, потенцираше две работи кои многу му значат, а се во директна релација со личноста на поетот чие име го носи наградата – Ацо Шопов.„Првата работа е што ми е драго што таа е највисоката награда на писателите за книга со поезија во Македонија и што сите ние пишуваме надевајќи се, не да добиеме награда, туку дека ќе се најде некој што ќе кореспондира со нашите поетски мисли и согледби, и драго ни е кога ќе наидеме на читател кој ќе допре до нашите стихови, а особено ми е драго што во овој случај, кога читателите се професионалци на пишаниот збор.Втората и неизбежна работа во мојот случај е тоа што сум Штипјанец и доаѓам од Домот на културата ‘Ацо Шопов’, каде го поминав целиот работен век. Мило ми е што од 1982 година домот го носи името на големиот поет“ – изјави поетот Благој Самоников.Наградата за „Ванчо Николески“ за најдобра книга за деца и младинци за 2010 година ја додели Комисијата на ДПМ во состав: Вера Чејковска – претседател, Љубинка Донева и Петре Димовски – членови. Наградата ја доби Ефтим Клетников за книгата „Цар Салтан“ со следното образложение на Комисијата:„Создадена по мотивите на истоимената бајка на Александар Сергеевич Пушкин, ‘Царот Салтан’ на Ефтим Клетников е стихувана драма во шест чина, со наратор кој нè води низ дејството, а која уште при првиот прочит се чини погодна за сценско поставување.Во оваа книга на чудесен начин се спојуваат ненаметливата нарација, драмската тензија, мотивираната и нијансирана психологизација на ликовите, сериозниот, пред сè, длабоко морален пристап кон човековата судбина, како и поетичноста на копнежот, мечтата, сонот и љубовта.Пишувана со еден волшебен занес и изразита креативна мисла на самиот автор, со едноставен, но богат поетски израз, оваа книга ја извлекува на виделина бајковитоста на македонскиот јазик“ – стои во образложението на Комисијата за доделување на наградата „Ванчо Николески“.Добитникот на наградата, Ефтим Клетников, ја изрази својата благодарност за доделувањето на наградата и, едновремено, го нагласи својот сериозен пристап во пишувањето литература за деца.„Посебно ми е драго што ја добив наградата која го носи името на класикот на детската литература, Ванчо Николески. Морам да признаам дека тој е еден од моите омилени писатели од детството.Детската литература никогаш не сум ја сфаќал на детски начин. Дури мислам дека тоа е еден извонредно сериозен жанр и дека е потешко да се пишува во тој жанр, отколку во она што го нарекуваме сериозна литература, бидејќи детската душа и психологија се навистина длабоки, што некогаш и не сме свесни за тоа.Детската душа е способна митски да размислува и да прима митски и космолошки слики, детската фантазија е неограничена и до неа треба да се доближуваме и да растеме, а не да ја сфаќаме како нешто отсутно.Бајката е една од насушните потреби на модерната човекова душа, заситена од прогрес, технологија, интернет, и на човекот сè повеќе ќе му биде потребна бајката како една катарза во ова технолошко, стресно и невротично време“ – изјави Ефтим Клетников.Годишните награди за 2010 година на Друштвото на писателите на Македонија ќе се доделуваат на 15 февруари во просториите на друштвото.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Музеите се огледало на минатото и на нашето културно наследство, порача министерката Костадиновска Стојчевска
Министерката за култура Бисера Костадиновска Стојчевска на сите музејски работници им го честита Меѓународниот ден на музеите – 18 Maj за кои вели дека се огледало на минатото и на нашето културно наследство.
„На 18 Mај, Меѓународниот ден на музеите ја нагласуваме нивната заштитничка улога на историјата, културата и македонскиот идентитет. Музеите се инспирација за креативност, истражување и критика, уникатни локации за интерпретација на уметноста, археологијата и науката. Со честитката до сите музејски работници ја нагласувам нивната посветеност во заштита на дејноста и придонесот за едукација на младите генерации во справувањето со комплексните општествени предизвици“, се вели во честитката.
Министерката за култура посочува дека денеска ја подигаме свеста и го насочуваме вниманието кон важноста на музејските институции со отворање на нивните врати за граѓаните.
Таа потенцира дека Министерството за култура поддржува голем број проекти на музеите во остварување на заедничката цел за достојно почитување и вреднување на културата и културното наследство.
„Музеи за едукација и истражување“ е мотото под кое денеска се одбележува Меѓународниот ден на музеите – 18 Мај, датум кој музејските институции низ светот со разновидни активности го одбележуваат од 1977 година.
На овој ден, музеите во земјава традиционално ги отворат своите врати и овозможуваат бесплатен влез за посетителите кои можат да ги видат актуелните изложби и да се запознаат со движното културно богатство.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество.
Култура
Лозано, Пајак, Сашко Коцев… денес во Градски парк како дел од кампањата „Крени глас против врсничко насилство“
Во рамки на кампањата на „Макпетрол“ за спречување на врсничкото насилство, во Градски парк денеска ќе се одржи отворен настан наменет за деца, млади, родители, баби, дедовци…
Диџеј Боно, Сашко Коцев, „Биби и Боби“, Лозано, Пајак, Весна Петрушевска со децата од нејзината актерска школа, како и други гости, ќе бидат дел од програмата на оваа забавна дружба што е дел од кампањата „Крени глас против врсничко насилство“, а за најмладите ќе има интерактивни содржини и популарни игри.
Марија Јосифовска-Спасовска, член на Управниот одбор и директор во „Макпетрол“, вели дека се пресреќни што во текот на нивната општествено одговорна активност добиле многу поддржувачи.
Почнувајќи од децата и младите, од кои добивме впечаток дека им е навистина мило што, конечно, така отворено и толку гласно, се зборува за проблем со којшто тие секојдневно се соочуваат. Секако, тука се и општините, кои ја препознаа вредноста на нашата идеја и активно се вклучија во обезбедувањето услови за учениците да се здобијат со знаења за булингот. Наставниците, стручните служби, како и родителите, исто така, застанаа зад кампањата и помогнаа фокусот на јавноста да се сврти кон врсничкото насилство. За да се реши проблемот со булингот потребна е уште работа и посветеност, но веруваме дека и со позитивната енергија од нашиот настан, ќе придонесеме да се придвижиме во вистинска насока, истакнува Јосифовска-Спасовска.
Како што информира организаторот, на кампањата „Крени глас против врсничко насилство“ досега се приклучиле 24 општини и за сите нив „Макпетрол“ обезбеди едукативни материјали и работилници предводени од психолог со долгогодишно искуство за проблемот со булингот.
Култура
Утре, бесплатен влез во музеите
„Музеи за едукација и истражување“ е мотото со кое утре ќе се одбележи Меѓународниот ден на музеите, 18 Мај, датум кој музејските институции во светот со разновидни активности го одбележуваат од 1977 година.
На овој ден музеите во земјата традиционално ги отворат своите врати и овозможуваат бесплатен влез за посетителите, кои може да ги видат актуелните изложби и да се запознаат со движното културно богатство.
Музеите, освен својот придонес како платформа за размена на идеи и знаења, имаат значајна улога во образованието и се афирматори на темите што денес силно го засегаат светот, а кои чекаат да бидат истражени и споделени.
Музејските институции ги поттикнуваат идните генерации на креативен, динамичен и интересен начин да се осврнат на комплексните општествени предизвици на денешницата, да се информираат за причините и последиците од човековото влијание врз природата и да развијат критичко размислување и лична одговорност неопходна за градење одржливо општество.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество. Денот посветен на музеите е урврден од Меѓународниот совет на музеите – ИКОМ, со седиште во Париз.