Култура
Премиера на претставата „Така било пишано“
Претставата „Така било пишано“ (праизведба) во режија на Синиша Ефтимов и драмски текст на Сашко Насев премиерно ќе биде прикажана на 24 декември во МНТ. Претпремиерата е закажана за ден претходно, а првата реприза ќе биде на 25 декември
„Со „Така било пишано“ ќе го завршиме месецот со три премиери. Многумина не веруваа, но ете докажавме дека можеме. Успеавме публиката да ја вратиме во МНТ така што во овој месец имаме 17 претстави, три премиери, 15 детски претстави, две хуманитарни претстави и вкупниот број на продадени билети изнесува 8.118. Докажавме дека овој театар е жив, а не мртов како што многумина мислеа. Евтимов докажа дека е еден од најдобрите режисери, а оваа претстава крие една длабока вистина во себе,“ изјави Дејан Лилиќ, директор на МНТ.„Чест е да режирам претстава на еден од најголемите драмски автори. Се чувствувам како Жозе Мурињо во Реал Мадрид,“ изјави режисерот на претставата Синиша Евтимов.„Современ концепт за современ театар, во претставата играат пет лика, а централното дејствие се одвива околу Марија која ја толкува Арна Шијак. Урбана и драматична трилерска приказна во која актерите играат феноменално.“ изјави меѓудругото Сашко Насев.„Да се биде дел од луцидниот свет на Сашко Насев е голем залак. Со секое препрочитување на текстот откривате нови слоеви за кои не знаете дали да ги задржите сите или за сметка на речитоста на еден да се откажете од неколку, така што самиот процес на работа беше многу возбудлив и креативен. Претставата е наменета за секој човек што не го загубил човечкото во себе,“ изјави Арна Шијак.Музиката во претставата е на PMG колектив, Бернајс пропаганда и The John.Играат Оливер Митковски во улога на Јован, Јордан Симонов во улога на Павле, Сенко Велинов во улога на Петар, Арна Шијак во улога на Марија, Софија Насевска како девојката и Драган Спасов Дац како Ангел.По „Немој ти мене Фауст“ и „Темпирана опера“ ова е трета премиера во месец декември што се случи во МНТ. За наредната година Лилиќ најави голем број проекти кои ќе ги претстави идниот месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.