Култура
„Бела ноќ“ в сабота со хип хоп и ролеријада
Хипхопијада, диско ролеријада, бројни концерти, перформанси, изложби и филмови ќе го одбележат шестото издание на манифестацијата „Бела ноќ“ што ќе се одржи в сабота на повеќе локации во Скопје
Осум културни установи како и повеќе локации во центарот на главниот град ќе бидат домаќини на уметници од Холандија, Германија, Грција, Италија, Австрија и други европски земји.Настаните ќе се одвиваат по обележана патека почнувајќи од Музеј на Град Скопје низ центарот до Старата чаршија што ќе заврши во Музејот на Македонија.Паралелно во кината „Милениум“ и „Фросина“ од 18 до 6 часот наутро ќе се одржува филмски маратон. Зоолошката градина ќе биде слободна за влез за сите скопјани, а спортскиот дел ќе се одржи во градскиот парк и на одбојкарското игралиште на градската плажа.Како најексклузивни настани организаторите ги најавуваат хипхопијадата и диско ролеријадата.Златко Стевковски, директор на МКЦ, кој е еден од организаторите вели дека манифестацијата што секоја година се одржува на крајот на месец септември е закажана во овој термин за да се избегне преклопување на термините со овогодинешното издание на МОТ. „Оваа година „Белата ноќ“ ќе значи еден наплив на луѓе кои се занимаваат со уметност. Поканивме гости кои што ќе ни ги претстават своите дела од цела Европа. Она што сакавме оваа година да го донесеме е да ги приближиме оние што ја креираат таа уметност до граѓаните и до љубителите на уметноста“, велат организаторите.Град Скопје и оваа година ја финансира манифестацијата и учествува во креирањето на програмата заедно со МКЦ.„Се надевам дека ќе биде убаво времето и уште еднаш по шести пат градот ќе биде осветлен и ноќта ќе ја замениме со ден“, рече Тања Балаќ од Град Скопје на денешната прес-конференција.Настаните ќе се одржат почнувајќи од 20 часот во Музејот на Град Скопје, МКЦ, улица Македонија, Универзална сала, Библиотека Браќа Миладиновци, КИЦ и Музеј на Македонија.Во Јавна соба ќе настапи ликовниот уметник од Холандија, Нена Фишер.„Имам две видео инсталации, едната е анимирана а другата е експериментална документарна. Првата е интересна по тоа што е анимирана и е одраз во огледало. Анимирана со објекти кои говорат за сонот, за градот кој е урбан, кој е модерен“, објаснува Фишер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.