Култура
Класичен концерт во рамките на Бит фест
Концерт на Боби Коминовски -саксофон и Билјана Димовска -пијано ќе се случи вечерва во Концертната сала на Завод и музеј Битола, со почеток во 20.30 часот
Концерт на Боби Коминовски -саксофон и Билјана Димовска -пијано ќе се случи вечерва во Концертната сала на Завод и музеј Битола, со почеток во 20.30 часот.
Коминовски дипломирал на ФМУ во класата на м-р Иван Кочаров, а од 1995 година е вработен во Средното музичко училиште во Битола како професор по кларинет и саксофон.Како педагог се истакнува со својата работа освојувајќи високи награди со своите ученици на сите републички и меѓународни натпревари. Пред шест години ги завршил магистерските студии на ФМУ отсек кларинет во класата на Стојан Димов. Во текот на школувањето освоил повеќе награди, има настапувано со Македонската филхармонија, со Оркестарот при Ф.М.У. Скопје и Битолскиот камерен оркестар. Редовен член е во жири комисијата на републичките натпревари, на меѓународниот натпревар “ Охридски бисери” како и на меѓународниот натпревар во Смедерево “ Саксофонијада”.
Билјана Димовска дипломирала и магистрирала на отсек пијано на ФМУ во класата на Тодор Светиев. Во текот на своето образование има учествувано на повеќе семинари и мастеркласи кај светски познати пијанисти меѓу кои Борис Романов, Павел Егоров, Акилес дел Вињ, Андреј Диев и др. Има настапувано на повеќе значајни манифестации во нашата земја” Денови на Македонската музика” , “Скопско лето’ , “ Пролетни вечери”, “Денови на полската култура во македонија” ,” Музички вторник’ , а во 1998 год. во склоп на Меѓународниот фестивал” Интерфест” – Битола настапи на подиум на млади.Добитник е на повеќе државни и меѓународни награди.Во текот на своето образование оценета е со највисоката оценка CUM LAUDE.Како солист има настапено со Оркестарот при Ф.М.У. Скопје како и со Македонската филхармонија.Вработена е во Музичкото училиште во Битола како професор по пијано и музички соработник каде забележува видни резултати земајќи учество со своите ученици на републички и меѓународни натпревари.Член е на жири комисијата на Републичките натпревари.
Дуото Коминовски- Димовска редовно настапуваат повеќе години, а како плод на нивното успешно концертрирање имаат реализирано заедничко CD во 2005 година. крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Повик за учество на млади поети на „Отскочна даска #3“ во рамките на 4. Скопски поетски фестивал
Скопскиот поетски фестивал, чиешто четврто издание ќе се одржи во периодот од 29 мај до 1 јуни, и годинава го организира преднастанот „Отскочна даска“ ‒ поетско читање за млади поети и поетеси.
‒ Продолжуваме со поддршката за младите поети, за тие што можеби веќе се појавиле со по некоја песна во книжевно списание, ја објавиле својата прва стихозбирка или настапиле на некое поетско читање, но и за тие што можеби и не направиле ништо од сето тоа досега, давајќи им шанса да бидат прочитани, видени и слушнати на настан подготвен само за нив! Како и минатите години, така и оваа, врз основа на испратените песни ние ќе ги избереме учесниците на „Отскочна даска #3“, а тие меѓу себе ќе го одберат најдобриот, односно, ќе изгласаат кој млад поет или поетеса ќе отскокне до официјалното отворање на четвртото издание на СПФ и ќе чита како претставник на најмладата генерација заедно со другите повозрасни и етаблирани поети, соопштија од фестивалот.
Заинтересираните учесници треба да се на возраст од 16 до 25 години и да испратат куса биографија, фотографија со висока резолуција и две свои песни во Word на мејлот [email protected] најдоцна до 13-ти мај.
Имињата на одбраните поети ќе бидат објавени на 20 мај на фејсбук и на инстаграм страниците на фестивалот, а настанот ќе се одржи во кафе-книжарницата „Буква“ на 29 мај, со почеток од 20 часот. Одбраниот млад поет/поетеса ќе чита и на официјалното отворање на СПФ во МКЦ на 30 мај.
Фестивалот е финансиски поддржан од Министерството за култура, а негови помагатели се Младинскиот културен центар – Скопје, градската библиотека „Браќа Миладиновци“ ‒ Скопје и кафе-книжарница „Буква“.
Култура
Костадиновска-Стојчевска: Танцот со својата креативност ја афирмира македонската култура
Министерката за култура, Бисера Костадиновска-Стојчевска, го честита Светскиот ден на танцот – денот кога танцот се слави како моќ на човечкиот дух, на уметничкото творештво и на значењето на танцовата сцена во обликувањето на модерната уметност.
„Министерството за култура го потврдува својот придонес кон сцената и останува партнер во афирмацијата на македонскиот танцов идентитет“, рече министерката Костадиновска-Стојчевска, додавајќи дека танцот како креативна универзална уметност ја одразува и ја промовира македонската култура која има значајна историја на танци низ чие постоење се рушеле предрасуди и ограничувања.
Костадиновска-Стојчевска изрази уверување дека заедничките проекти го унапредуваат културниот дијалог и ја носат слободата на уметноста.
Култура
Велигденски концерт на НУ „Охридско лето“ со женскиот хор „Менада“
Во организација на НУ „Охридско лето“, а по повод големиот верски празник Велигден, утре во црквата „Света Софија“ во Охрид со почеток од 20 часот ќе се одржи Велигденски концерт на православна духовна музика со женскиот хор „Менада“ од Тетово под диригенската палка на професор Ивица Зориќ.
„Со овој концерт заокружуваме програмата која веќе трета година ја реализираме надвор од традиционалната фестивалска рамка 12 јули- 20 август. Имавме прекрасни концерти преку цела година со кои ја потврдивме големината на долгогодишното опстојување на оваа најзначајна културно-сценска манифестација“, вели директорката на НУ „Охридско лето“, Наташа Поповиќ.
Женскиот хор „Менада“ , предводен од диригентот проф. д-р Ивица Зориќ е еден од најрепрезантитивните хорови од нашата земја. Со своето четиридецениско делување тој прерасна во еден од стожерите во развојот и опстојувањето на хорската уметност кај нас.
Хорот „Менада“ е основан 1981 година во Тетово и сите овие години е предводен од маестро Ивица Зориќ. На репертоарот на хорот редовно се застапени композиции од најразлични епохи и стилови од македонската и светската хорска акапела и вокално-инструментална музика. Хорот е добитник на многубројни награди и признанија во Македонија, поранешна Југославија и Европа, за што сведочат бројните настапи на фестивали, конкурси и концертни турнеи во Чешка, Полска, Шпанија, Шведска, Холандија, Данска, Португалија, Босна и Херцеговина, Хрватска, Србија, Албанија, Романија, Бугарија,Турција, Германија, Грција, Словенија, Австрија,Белгија, Косово…..
Билетите по цена од 200 денари можат да се набават во Дирекцијата на НУ „Охридско лето“.