Култура
Словенечко-македонски културни зближувања
Со пригодна свеченост во Македонската опера и балет словенечката амбасада во Македонија вечерва ќе го обележи националниот празник во чест на најголемиот словенечки поет Франце Прешерн. Манифестацијата „Денови на Франце Прешерн“ во Македонија опфаќа повеќе настани
Свеченоста во МОБ, со почеток во 19 часот, содржи настап на хорот „Цицибани“, студентите на словенечки јазик на Филолошкиот факултет „Блаже Конески“ во Скопје и музичко-сценска пиеса во изведба на хорот со кој раководи Томислав Шопов.„Почнувајќи од 1945 г. 8 февруари го славиме како државен и како културен празник на Словенија. Денот е поврзан со датумот на смртта на најзначајниот словенечки поет Франце Прешерн, кој е автор на прекрасниот „Сонетен венец“, но и на текстот на словенечката национална химна“, нагласи Ален Брајан Бергант, амбасадор на Република Словенија во Македонија.Годинава навршуваат 162 години од смртта на Прешерн. Во Словенија денешниот ден ќе биде обележен на највисоко ниво. Претседателот Данило Тирк ќе оствари средба со Словенците кои живеат во нејзините соседни држави Италија, Австрија, Унгарија и Хрватска. Претседателот на Собранието на Словенија, Павел Гантар, ќе има средба со словенечката дијаспора.Прославата на словенечкиот национален празник во Македонија ќе продолжи утре со отварање на словенечко-македонската изложба „Зближувања“ во Музејот на современата уметност во Скопје.„Словенија и Македонија имаат многу добри политички и економски односи. Со заедничката изложба на словенечка и македонска уметница се потврдува дека и на полето на културата сме многу блиски. Изложбата ‘Зближувања’ е придонес во токму во тој правец“ – изјави словенечкиот амбасадор на денешната прес-конференција.Идејата на изложбата „Зближувања“ е да се претстават два различни пристапи, две поинакви концепции на видувања кои, иако различни, сепак, зближуваат.На изложбата ќе бидат претставени по два циклуса на словенечката фотографка Метка Верњон, која живее во Женева, и на македонската уметница Наташа Димовска-Узуновска.Двете целини на Метка Верњон содржат серијата од 15 фотографии со наслов „Минувачи“ и 15 фотографии со наслов „Јапонски моменти“.„Иако сум родена во Словенија во текот на мојот живот имав можност да живеам во повеќе држави низ Европа и во Азија. Таа разновидност на пејсажите со кои бев окружена беше инспирација и за моите фотографии“, објасни Метка Верњон.Македонската фотографка Наташа Димовска – Узуновска ќе се претстави со една целина од осум фотографии со наслов „Кругови“, изработени со модерната Still Allive-техника, и со тематската целина „Магла“, каде со посебен пристап на изработка на фотографијата се добива колорит којшто остава импресија на „фото-акварел“.Двете уметници првпат заедно изложуваат во Македонија, иако нивното пријателство трае одамна. Од заедничките разговори и дружења во Женева, Швајцарија, каде во еден период двете работеа, се родила идејата за нивната изложба во Скопје. Има намери во догледно време истата да биде поставена и во Словенија.Словенечко – македонската изложба „Здружувања“ во Музејот на современата уметност во Скопје ќе биде отворена на 8 февруари во 19 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.