Во палатата „Пезаро Папафава“ од денес е отворен македонскиот павилјон во рамките на 54-тото Уметничко Биенале во Венеција

На годинашното Биенале Република Македонија се претставува со проектите „Досие-шлепер“ на Колективот „Зеро“ и „Прескок“ на скулпторот Жарко Башески.На отворањето на павилјонот во Венеција присуствуваа Дарко Стефановски, државен секретар при Министерството за култура, Маја Крстевска, директор на Националната галерија на Македонија и комесар на претставувањето на проектот на групата „Зеро“, Горанчо Ѓорѓиевски, еден од кураторите на проектот и член на „Зеро“, уметникот Жарко Башески, автор на „Прескок“, Емил Алексиев, куратор на проектот „Прескок“ и Ирена Мишева, претседател на Советот на град Скопје.Во улога на домаќин на отворањето на македонскиот павилјон присуствуваше Амон Бајрамовски, конзул на Република Македонија во Венеција.„Со особено задоволство ја прифатив поканата да се обратам на инаугурацијата на македонскиот павилјон на 54-тото Венециско биенале, една од најпрестижните манифестации од областа на културата и уметноста. Ваквиот тип на национални презентирања на Македонија се од особено значење за промоција и афирмација на македонската уметност и култура“ – изјави Амон Бајрамовски.„Македонското претставување на оваа престижна светска манифестација од визуелната уметност е со големо значење за промоција и афирмација на македонската култура и уметност“- нагласи Бајрамовски.Комесари-носители на двата проекти кои ја претставуваат Македонија во Венеција се Националната галерија на Македонија и Центарот за култура „Марко Цепенков“ од Прилеп.„Ми претставува особена чест што Националната галерија на Македонија по петти пат е носител на македонското претставување на Венециското биенале и што како комесар на проектот на колективот „Зеро“ го претставивме проектот „Досие – шлепер“. Го делам задоволството што во Венеција го претставуваме и  проектот „Прескок“ на скулпторот Жарко Башески“, рече  нагласи Маја Крстевска, директорка на Националната галерија на Македонија.Македонскиот павилјон за отворен го прогласи Дарко Стефановски, државен секретар во Министерството за култура на РМ.„Да се изложува во Венеција, градот во кој се преплетуваат реалноста и уметничката фикција, местото каде што различните национални културни традиции комуницираат искрено и отворено, создавајќи бесценета ризница на културни вредности е неповторливо искуство за секоја земја“.„За Република Македонија културата е многу важен сегмент во нејзиното постоење и таа е еден од најважните извозни продукти на нашата држава, а особено радува фактот што македонското ликовно творештво успешно се претставува и надвор од границите на Република Македонија“ – изјави Дарко Стефановски, државен секретар во Министерството за култура.„Ја користам оваа прилика да упатам честитки до колективот „Зеро“ и скулпторот Жарко Башески, кои, убеден сум, ќе дадат свој придонес во размената на нови искуства, идеи и енергија на полето на уметноста“ – заклучи Стефановски.Во присуство на повеќе македонски граѓани кои живеат во Венеција, на отворањето на павилјонот настапи групата „Ла Колони волвокс“ со перформансот „Илуминати ти го дај ми го“. Со форма на акустичен концерт нивниот перформанс претставуваше аџилак по духовните изохипси, бидејќи отсвиреа музика која гравитира кон медитеранскиот мелопоетски контекст, како чалгија, архаична македонска акапела, јужнофранцуска и јужношпанска, односно сефардска музика.„Влијанието на колективот „Зеро“ е причината за создавањето на „Ла Колони волвокс“ и токму затоа настапивме на отворањето на македонскиот павилјон во Венеција“ – објасни Сашо Гигов – Гиш, вокален солист во групата.Официјалното отворање на 54-тото Уметничко Биенале во Венеција со наслов „Илуминации“ ќе се одржи на 4 јуни. Македонскиот павилјон на Венециското биенале во палатата „Песаро Папафава“ ќе биде отворен до 27 ноември годинава.