Со целодневна програмска активност Младинскиот културен центар од Скопје се вклучи во меѓународната манифестација „Роденден на уметноста“. На глобално ниво со бројни концерти, програми за деца, арт-перформанси и инсталации, секој 17 јануари се обележува во повеќе европски земји, вклучително и САД, Јапонија и Јужна Америка. За прв пат Младинскиот културен центар како претставник од Македонија се вклучува во манифестацијата чија цел е прослава на уметноста.„Уметноста има порака, уметноста има цел, а целта е сите да бидеме подобри, поубави и похумани. Иако моментот го забележавме уште минатата година, сепак, Македонија преку Младинскиот културен центар прв пат се вклучува во обележувањето на Роденденот на уметноста. Годинава подготвивме скромна програма како симболичен гест, но големината на моментот е што Македонија рамноправно се вклучува на европската мапа и со обележувањето на 17 јануари станува член на европското семејство кое веќе дваесет години слави во името на уметноста“, за Макфакс изјави Златко Стевковски, директор на Младинскиот културен центар во Скопје.„Роденден на уметноста“ е традиционален годишен настан, за прв пат предложен од страна на францускиот уметник Роберт Филиу во 1963 година. По смртта на Филиу, во декември 1987, се формира меѓународна организација која ја презема одговорноста за славењето на овој ден, наречена  „Western Front“. Според Филиу, уметноста не постоела пред 1.000.000 години. Но еден ден, на 17 јануари, истата се родила. Филиу предложил овој датум да се слави како национален празник со тоа што ќе се слави присутноста на уметноста во нашите секојдневни животи.Македонскиот дел од прославата на „Роденденот на уметноста“ опфаќа изложба, промоција на книга, филмска проекција и концерт. Во текот на денот во галеријата на МКЦ ќе може да се посети изложбата „Лична легенда“ на Калиопи Илиевска и „Разговор со мојата душа (моето огледало)“ на Мила Ивановска. Станува збор за дела од нивниот дипломски труд, како и дела настанати во текот на студиите на Факултетот за ликовни уметности во Скопје.Со почеток во 19 часот, ќе биде промовиран краткиот роман „Приказни за август“ од авторот Дејан Велкоски, зад чие издание стои издавачката куќа „Антолог“. Краткиот роман на Велкоски е кус приказ на љубовта, видена низ очите на еден сонувач; збирка циклизирани раскази, поврзани од отсонуваната љубовна приказна.Во 20 часот ќе биде прикажан филмот „Пејзаж 2“ (2008) во режија на Винко Модерндорфер, каде играат Марко Мандиќ, Петар Мусевски и Јанез Хочавер.Прославата на „Роденденот на уметноста“ ќе заврши со концерт во киното „Фросина“, каде ќе може да се проследи настапот на Тони Китановски заедно со Изет Кизил од Турција и Костас Теодору од Грција. Тројцата музичари прв пат ја делат сцената во 2003 година во Бон, Германија, како членови на составот на нивниот заеднички пријател Теодосиј Спасов. Самостојната соработка како трио се јави како неминовност генерирана од меѓусебната доверба, радост, страст и љубопитност кон сè што може да се нарече музичка мисла и креативна изведба на сцена. Звукот на овој состав е сублимат на индивидуалните истражувања на традиционалните музички стилови од различни краишта на светот сместен во современ импровизаторски концепт.Младинскиот културен центар упати покана до сите љубители на уметноста овој 17 јануари 2011 да се придружат во славењето на уметноста!