Култура
Чешкиот филм „Кавасаки рози“ најдобар на Синедејс
Чешкиот филм „Кавасаки рози“ на режисерот Јан Хребејк е најдоброто остварување Деветиот Фестивал на европскиот филм Синедејс што во четврток навечер беше затворен во киното „Милениум“ со проекција на годинашниот лауреат на Берлинале „Мед“ на Семих Капланоглу
Одлуката ја донесе жирито под претседателство на Сањин Пејковиќ, режисер и професор на Академијата во Гетеборг, и членовите Николас Гастер, продуцент и Влатко Галевски, филмски критичар од Македонија.Според образложението на жирито, победникот која ја доби наградата Златна ѕвезда „на ефектен начин ја покажува комплексноста на односите меѓу индивидуата и колективот во репресивните системи и покажува дека секоја донесена одлука во животот носи и евентуални последици“.Златната ѕвезда ја прими чешкиот амбасадор Јозеф Браун. Во контекст на содржината на филмот приказна за еминентен научник, поранешен дисидент кој во минатото и помогнал на тајната полиција да дискредитира негов пријател поради што тој емигрирал, амбасадорот Браун рече дека авторите ја тематизираат вината и губењето на колективната меморија.Најмногу награди на фестивалот доби романската кинематографија – Златно сонце за најдобар филм во програмата Балкан-линк му беше доделена на „Пред се Фелиција“, а филмот „Кога ми се свирка, свиркам“ доби Сребрена ѕвезда за најдобра режија (на Флорин Сербан) и Специјална плакета за главната машка улога (Силвио) која ја игра Џорџ Пистирану.Евроамабасадорот Ерван Фуере, кој ја додели наградата Златно сонце за најдобар балкански филм, ја поздрави идејата на организаторот на Синедејс Младинскиот културен центар – да воведе посебна програма и награда за филмовите од Балканот бидејќи, како што рече, културата и културната соработка се обединувачка сила.Со Сина ѕвезда за најдобро сценарио беше награден францускиот „Тивки гласови“ по сценарио и режија на Леа Фехнер. Неа ја прими францускиот амбасадор Жан-Клод Шлумберже, кој истакна дека е задоволен што наградата му припаднала на младиот француски сценарист Фехнер, кој бил на многу фестивали и номиниран во Венеција.Специјални плакети на Деветиот Синедејс добија и актерката Нада Ѓуревска за улогата на Сафа во босанската драма „Јасмина“ на режисерот Неџат Беговиќ и унгарскиот кинематографер Андријас Наги за филмот „Библиотека Паскал“ на режисерот Хајду Заболкс. Фестивалот му додели и плакета на директорот на фотографија Ненад Бороевиќ во филмот „Мисија Лондон“ на Димитар Митев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Музеите се огледало на минатото и на нашето културно наследство, порача министерката Костадиновска Стојчевска
Министерката за култура Бисера Костадиновска Стојчевска на сите музејски работници им го честита Меѓународниот ден на музеите – 18 Maj за кои вели дека се огледало на минатото и на нашето културно наследство.
„На 18 Mај, Меѓународниот ден на музеите ја нагласуваме нивната заштитничка улога на историјата, културата и македонскиот идентитет. Музеите се инспирација за креативност, истражување и критика, уникатни локации за интерпретација на уметноста, археологијата и науката. Со честитката до сите музејски работници ја нагласувам нивната посветеност во заштита на дејноста и придонесот за едукација на младите генерации во справувањето со комплексните општествени предизвици“, се вели во честитката.
Министерката за култура посочува дека денеска ја подигаме свеста и го насочуваме вниманието кон важноста на музејските институции со отворање на нивните врати за граѓаните.
Таа потенцира дека Министерството за култура поддржува голем број проекти на музеите во остварување на заедничката цел за достојно почитување и вреднување на културата и културното наследство.
„Музеи за едукација и истражување“ е мотото под кое денеска се одбележува Меѓународниот ден на музеите – 18 Мај, датум кој музејските институции низ светот со разновидни активности го одбележуваат од 1977 година.
На овој ден, музеите во земјава традиционално ги отворат своите врати и овозможуваат бесплатен влез за посетителите кои можат да ги видат актуелните изложби и да се запознаат со движното културно богатство.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество.
Култура
Лозано, Пајак, Сашко Коцев… денес во Градски парк како дел од кампањата „Крени глас против врсничко насилство“
Во рамки на кампањата на „Макпетрол“ за спречување на врсничкото насилство, во Градски парк денеска ќе се одржи отворен настан наменет за деца, млади, родители, баби, дедовци…
Диџеј Боно, Сашко Коцев, „Биби и Боби“, Лозано, Пајак, Весна Петрушевска со децата од нејзината актерска школа, како и други гости, ќе бидат дел од програмата на оваа забавна дружба што е дел од кампањата „Крени глас против врсничко насилство“, а за најмладите ќе има интерактивни содржини и популарни игри.
Марија Јосифовска-Спасовска, член на Управниот одбор и директор во „Макпетрол“, вели дека се пресреќни што во текот на нивната општествено одговорна активност добиле многу поддржувачи.
Почнувајќи од децата и младите, од кои добивме впечаток дека им е навистина мило што, конечно, така отворено и толку гласно, се зборува за проблем со којшто тие секојдневно се соочуваат. Секако, тука се и општините, кои ја препознаа вредноста на нашата идеја и активно се вклучија во обезбедувањето услови за учениците да се здобијат со знаења за булингот. Наставниците, стручните служби, како и родителите, исто така, застанаа зад кампањата и помогнаа фокусот на јавноста да се сврти кон врсничкото насилство. За да се реши проблемот со булингот потребна е уште работа и посветеност, но веруваме дека и со позитивната енергија од нашиот настан, ќе придонесеме да се придвижиме во вистинска насока, истакнува Јосифовска-Спасовска.
Како што информира организаторот, на кампањата „Крени глас против врсничко насилство“ досега се приклучиле 24 општини и за сите нив „Макпетрол“ обезбеди едукативни материјали и работилници предводени од психолог со долгогодишно искуство за проблемот со булингот.
Култура
Утре, бесплатен влез во музеите
„Музеи за едукација и истражување“ е мотото со кое утре ќе се одбележи Меѓународниот ден на музеите, 18 Мај, датум кој музејските институции во светот со разновидни активности го одбележуваат од 1977 година.
На овој ден музеите во земјата традиционално ги отворат своите врати и овозможуваат бесплатен влез за посетителите, кои може да ги видат актуелните изложби и да се запознаат со движното културно богатство.
Музеите, освен својот придонес како платформа за размена на идеи и знаења, имаат значајна улога во образованието и се афирматори на темите што денес силно го засегаат светот, а кои чекаат да бидат истражени и споделени.
Музејските институции ги поттикнуваат идните генерации на креативен, динамичен и интересен начин да се осврнат на комплексните општествени предизвици на денешницата, да се информираат за причините и последиците од човековото влијание врз природата и да развијат критичко размислување и лична одговорност неопходна за градење одржливо општество.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество. Денот посветен на музеите е урврден од Меѓународниот совет на музеите – ИКОМ, со седиште во Париз.