Култура
Четкар:Како македонски уметник добив историска музичка можност во САД
Владимир Василевски- Четкар веќе неколку години својата музичка кариера ја гради во колевката на џез и соул музиката Њујорк.
По завршувањето на неговите студии на реномираниот колеџ „Беркли“ во Бостон, одлучи џез, соул и панк музичката приказна да ја раскажува низ реномирани џез клубови во Њујорк, Бостон, Вашингтон, соработувајќи со музички имиња значајни за неговиот развој како уметник и музичар. Компонирањето, аранжирањето, џез -гитарата и гласот се неговата добитна комбинација во создавањето на музички дела кои публиката ги сака, а музичката критика ги оценува позитивно.
Неговиот втор албум „We will never end“, зад кој стои издавачката куќа „Хармониа продакшн “се продава секаде во светот низ повеќе специјализирани музички продавници како и дигитално (Итјунс, Амазон). Продажбата според информациите на Четкар оди добро во САД и Англија. Песните се наоѓаат на плејлистите на Би-Би-Си, Си-Би-Ес, Лајт FM, „Министри оф саунд“, дел се и од повеќе компилациски изданија во различни земји.
Во текот на годината освен американскиот го освојува и светскиот пазар, но летото секогаш е резервирано за настап пред македонската публика, пред која настапува со задоволство и го промовира она што во меѓувреме го сработел.„Ова лето повторно ќе го имам задоволството да се претставам пред македонската публика и тоа со големи концерти на Охридско лето (7 август во Антички театар), Бит фест (10 август на Широк сокак во Битола), а ќе имам настапи и низ другите македонски градови како Струга и Штип, каде до сега не сум имал можност да настапам. Ќе бидам придружуван од мојот европски квартет составен од Ху Вајт на клавијатури, Џонатан Харви на бас и Бено сатлер на тапани. Оваа година премиерно ќе бидат изведени моите нови музички материјали,“ вели Четкар во интервјуто за порталот на „Форум“.
Во изминатиов период Владимир Василевски Четкар имаше многу настапи во живо и ретка привилегија да свири во најпознатите џез клубови во светот од кои би ги издвоиле „Блу ноут“ во Њујорк, „Блу алеј“ во Вашингтон, „ Регатабар“ во Бостон, „Будапест џез клуб“ во Будимпешта.
„Да се биде музички уметник кој ја негува џез, соул и фанк музиката во Њујорк, светскиот центар на овие музички правци е најголемиот предизвик со кој еден музичар може да се соочи. За многу кратко време откога се преселив во Њујорк ми се случија многу значајни нешта и како македонски музички уметник добив историска можност да почнам да настапувам во некој од најпознатите музички клубови и сцени во САД. Истовремено, музичката критика во САД и светот ми даде фантастична поддршка со што дополнително ме мотивира и отвори многу врати на интернационалната музичка сцена во жанрот на џез, соул и фанк музиката“ додава Четкар
Годинава соработувал со повеќе музичари и продуценти од кои најзвучни се имињата на Димитри фром Париз и Том Мултон. Димитри е меѓу најпопуларните и најреспектирани диџеи- продуценти во светот. Па неговата покана до Четкар да гостува на негов проект, за македонскиот уметник е огромна чест.
„Искуството кое го стекнав со овие мајстори на својот занает е бесценето и секако дека позитивно влијаеше врз моето усовршување,“ додаде Четкар.
Ричи Харт, Џон Томас, Грег Хопкинс и Џеј Кенеди биле негови реномирани професори на „Беркли“, а џез музиката ја засакал слушајќи ги Џорџ Бенсон, Квинси Џонс Хенкок… „Со Бостон ме поврзуваат прекрасни мемории. Во Бостон ги завршив студиите на музичкиот колеџ „Беркли“ и таму ги направив првите професионални чекори како музичар. Њујорк од друга страна е најконкурентното и најдинамичното место во светот каде си опкружен од светскиот музички крем меѓутоа, и вистинското место каде еден уметник може да се исчеличи, докаже и промовира како себе така и својата земја,“ вели нашиот соговорник.
По настапите во Македонија, ќе настапува на џез музичките фестивали во Ниш и Лондон, а според него, со секое учество на сериозен музички ивент или фестивал се отвораат нови можности и се стекнуваат со нови фанови кои секако се најбитни за долговечноста на еден музички уметник.„Во Лондон ќе дебитирам со два концерти во октомври, а во Ниш ја имам честа да настапам на затворањето на Ниш џез фестивал (15 август) кој моментно е најголемиот интернационален џез фестивал во Југоисточна Европа,“ говори Четкар за неговите настапи во интервјуто за порталот на „Форум“.
Освен што се подготвува за доаѓање во Македонија, моментно работи на неговата светска турнеја, промоцијата на азискиот пазар и на неговиот нов албум. Првите нумери „Оушн оф лав“, „Лет јурселф гоу“, „Хипнотајзд“ му ја отворија вратата на Четкар за влез на американската и светската џез сцена. Овие музички материјали Четкар ги снимаше во познатите „Легаси рекординг“ и „Катинг рум“ студија од каде што се лансираа повеќе платиниумски албуми на Мараја Кјери, Џенифер Лопез, Алиша Кис. До сега соработувал со „Џестофанк“, „Хауславерс“, „Релатив депт“ и многу други музичари, а на гостувањата во Македонија со Дамир Имери и Оливер Дуев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Костадиновска-Стојчевска: „Правината се танчи, ама не се кинит“ – нов мурал во Прилеп во рамки на “Цртај на македонски”
Министерката за култура, Бисера Костадиновска-Стојчевска, денеска на промоцијата на новиот мурал на Центарот за култура „Марко Цепенков“ во Прилеп, порача дека младите преку уметноста оддаваат почит кон личностите кои имаат непроценливо значење за нашиот идентитет, култура и историја.
− „Цртај на македонски“ со креативни уметнички идеи го заштитува и го промовира македонскиот јазик. Насликан е уште еден мурал преку кој младите уметници оддаваат почит кон личностите со непроценливо значење за нашиот идентитет, култура и историја − рече Костадиновска-Стојчевска, која додаде дека во изминатите три години младите со своите креативни идеи на автентичен начин ги популаризираат македонскиот јазик и нашата уникатна народна мудрост.
Муралот е дел од конкурсот на Министерството за култура, „Цртај на македонски“, а го изработи визуелната уметница Ивана Самандова, во организација на „Факултет за работи што не се учат – ФРУ“. Муралот, на кој е насликан цитатот „Правината се танчи, ама не се кинит“ од македонскиот културен деец, собирач на умотворби и фолклорист Марко Цепенков, е дел од поддржаниот проект на Самандова, „Јазикот коски нема, ама коски кршит“.
– Преку конкурсот „Цртај на македонски“ во изминатите три години ги поттикнавме младите на креативност. Отворивме нови можности за поддршка и презентација на нивниот талент – рече министерката за култура и додаде дека за три години преку овој конкурс се доделени пет милиони денари за реализација на над 60 дела.
„Министерството за култура останува посветено кон младите автори за чие творештво секогаш имаме посебна почит и обврска да го прикажеме на публиката“, истакна Костадиновска-Стојчевска денеска на промоцијата на новиот мурал на предната фасада на Центарот за култура „Марко Цепенков“ во Прилеп.
Култура
„Златен објектив“ за Столе Попов
Кинотеката го одбележува својот роденден, односно датумот кога во „Службен весник“ е објавен Законот за формирање на Кинотеката – на 29 април, во далечната 1974 година.
И, иако Кинотеката формално започнува да работи со полн капацитет и со полна организациска структура дури две години потоа, во 1976 година, кога ги добива своите први канцеларии и депо и започнува да собира архивски материјали, формирајќи ги првите аудиовизуелни збирки и организирајќи ги првите кинотечни филмски проекции – сепак го одбележува како свој роденден 29 април секоја година.
Последниве две децении, по тој повод и околу тој датум – Кинотеката го објавува годишните добитници на сега веќе традиционалното признание „Златен објектив“, кое Кинотеката им го доделува на филмски автори и работници, кои преку својот професионален ангажман придонеле во создавањето, развојот, промовирањето и популаризацијата на македонската кинематографија. Досегашни добитници на ова признание, досега биле: режисерите Бранко Гапо, Трајче Попов и Кирил Ценевски, актерот и режисер Коле Ангелов, аниматорите Дарко Марковиќ и Тонкица Митровска, монтажерите Димитар Грбевски, Олга Луковска-Дончиќ и Спасе Тасевски, директорите на фотографија Драган Салковски, Љубе Петковски и Благоја Дрнков, продуцентот Панта Мижимаков, филсмките критичари Илинденка Петрушева и Благоја Куновски Доре, композиторот Љупчо Константинов, костимографите Елена Дончева и Зорица Тодорова-Младеновиќ, тон-мајсторот Глигор Паковски, сликарот Коле Манев и филмскиот работник Коста Крпач.
Оваа година, пак, „Златниот објектив“, по одлука на Управниот одбор на Кинотеката, ќе му биде доделен на Столе Стојан Попов – режисер, сценарист, продуцент и автор, кој во голема мера ја задолжил националната кинематографија – како со својот наградуван филмски опус, така и со својот педагошки и менаџерски ангажман на полето на филмската уметност и филмското образование:
Столе Попов е роден 1950 година во Скопје, а во 1973 година дипломира на Академијата за театар, филм и телевизија во Белград. Снима уште како студент, а со првите документарни филмови како филмски професионалец – ОГАН (1974) и АВСТРАЛИЈА, АВСТРАЛИЈА (1977), тој веќе се етаблира како талентиран филмски творец со препознатлив стилски и естетски сензибилитет. Од 1978 година, се вработува во „Вардар филм“ – и веќе следната, 1979 година, со ДАЕ, документарецот за ромското население во Скопје – станува прв македонски автор кој е номиниран за престижниот американски „Оскар“, тогаш како претставник не само на македонскта, туку и на југословенската кинематографија во тоа време. Потоа, снима бројни рекламни филмови – за Алкалоид, ГП Маврово и ХЕК Југохром, а првиот негов игран филм – ЦРВЕНИОТ КОЊ, го реализира во 1981 година. По тоа следуваат долгометражните филмови СРЕЌНА НОВА ‘49 (1986), ТЕТОВИРАЊЕ (1991), ЏИПСКИ МЕЏИК (1997) и ДО БАЛЧАК (2014), поголем број негови менторски и продуцентски проекти, како и неговиот професорски ангажман на Факултетот за драмски уметности во Скопје. Член е на Европската филмска академија, а еден период беше и директор на државната продуцентска куќа „Вардар филм“ во тоа време.
Во 2011 година – неговите филмови (три документарни и четири играни дела) беа дигитално реставрирани и објавени во форма на ДВД-издание – што воедно беше и првиот проект за дигитална реставрација реализиран од страна на Кинотеката.
Речиси сите негови филмови – и документарните и играните – се наградувани на бројни регионални и на светски фестивали, а некои од нив – како на пример ТЕТОВИРАЊЕ и СРЕЌНА НОВА ’49 – се здобиваат и со култен статус кај различни генерации од тогашната домашна македонска и југословенска публика, и тој статус само се зголемува и продлабочува со минувањето на времето…! Тоа е и еден од најголемите и вистински показатели за неговата авторска оригиналност и специфична филмска естетика и квалитет – заедно со неговата филмска оставштина и залог помеѓу поновите генерации на филмски автори и промислувачи на филмот кои дошле и доаѓаат по него – поттикнати, окуражени и инспирирани од неговиот длабок естетски и специфичен филмски опус, и од неговиот високо значаен стилски авторски белег кој тој го остава во македонската кинематографија…
По повод Денот на Кинотеката – на 29. Април, 2024 година – сите кинотечни печатени и електронски изданија на Кинотеката досега: значајниот број издадени книги од областите на кинотечната и филмска наука, историја и уметност, сите изданија на кинотечното списание КИНОПИС и сите ДВД-изданија на Кинотеката – ќе се продаваат со „роденденски“ попуст од 50%, во просториите на Кинотеката.
Свеченото доделување на „Златниот објектив“ на нашиот голем доајен на филмската уметност – Столе Попов – ќе се одржи кон крајот на мај оваа година, во просториите на Кинотеката.
Култура
УКИМ донесе Одлука за основање на Фондација „Горан Стефановски“
Универзитетот „Св. Кирил и Методиј“ во Скопје донесе Одлука за основање на Фондација „Горан Стефановски“. Одлуката, на предлог на Ректорската управа, денеска, во очи на роденденот на овој великан на македонската драма – 27 април, ја донесе Сенатот на УКИМ, по што ќе започне постапката за носење на основачките акти и избор на органите на Фондацијата.
Фондацијата се основа на иницијатива на Факултетот за драмски уметности – Скопје, каде што Стефановски долги години ги предаваше драмските занаети, пред да го продолжи својот животен пат во Велика Британија. Во органите на Фондацијата, освен претставниците на академската заедница и на семејството на Стефановски, ќе партиципира и Драмскиот театар од Скопје, на чија сцена драмите на овој автор ги доживеаја најголемите успеси.
Цели на Фондацијата ќе бидат заштита и негување на оставината на делото на нашиот најголем современ драмски автор Горан Стефановски, како трајна културна вредност, публикување на објавени и необјавени негови трудови, во печатен и електронски формат, подобрување на достапноста на неговото творештво на сите светски јазици, градење на културата – посета на театар и однос кон драмските уметности кај новите генерации, но и проекти за промоција и поттикнување на македонското драмско творештво воопшто.
Фондацијата ќе обезбеди стипендирање на образованието во сите степени на талентирани ученици и студенти во областа на драмските уметности, поддршка и унапредување на талентираните ученици, студенти и млади кои аматерски се занимаваат со филм и театар. Исто така, таа ќе го поттикнува и поддржува неформалното образование за создавање драми, ќе организира едукативни дебати, работилници и семинари, уметнички и научни конференции, како и хуманитарни проекти од сценскоизведувачка и аудиовизуелна природа за поддршка на ранливи категории.
Великанот на македонската драмска уметност, Горан Стефановски, почина пред пет години во Кентбери, Англија, на 66-годишна возраст. Автор е на култните драми: „Диво месо“, „Лет во место“, „Јане Задрогаз“, „Дупло дно“, „Тетовирани души“, „Демонот од Дебар маало“ и многу други. Беше еден од креаторите на популарната ТВ-серија „Бушава азбука“ и на повеќе филмски сценарија. Завршил Филолошки факултет во Скопје – англиски јазик и книжевност. Студирал драматургија на театарската академија на Универзитетот во Белград, каде што и магистрирал на тема: „Сценските напатствија како основа на драматургијата на Семјуел Бекет“. Работеше во драмската редакција на Телевизија Скопје, а потоа како асистент на Филолошкиот факултет „Блаже Конески“ во Скопје. Во 1986 година ја основал Катедрата за театарска и филмска драматургија и бил професор по драматургија на Факултетот за драмски уметности во Скопје.
Добитник е на наградите: „Стале Попов“, „11 Октомври“, „Војдан Чернодрински“, „Стериина награда“. Стефановски беше и дописен член на МАНУ.