Култура
Скандинавците најмногу трошат за културата
Скандинавците во однос на граѓаните од другите делови на Европа најмногу своето време и пари ги трошат на културата.
Според истражувањето Данците се Европејците коишто најмногу трошат на културата. Тие на посета на културни настани и други работи поврзани во културата за купување книги, филмови и други културни содржини, трошат речиси 5,5 отсто од својата заработувачка. Во кино Данците одат повеќе од која и да е друга нација во ЕУ.
Од 2006 година помалку од половината Европејци биле во кино барем еднаш.
Зад Данците следат Финците и Чесите, коишто на културата трошат 5 отсто од својата заработувачка. Европскиот просек, инаку, изнесува околу 4 проценти.
Данците се исто така и меѓу најкреативните во ЕУ заедно со Швеѓаните, Финците и Латвиците. Швеѓаните и Финците имаат најмногу уметници и писатели во земјите од ЕУ.
Меѓутоа, во овој домен предничат сепак Исланд и Норвешка коишто инаку не се членки на ЕУ, каде што во сферата на културата работат 3,2, односно 2,6 отсто од вкупната работна сила, додека просекот во ЕУ изнесува 1,7 проценти.
Најмногу студенти на уметности имаа Британците и Ирците, 6,8 односно 6,6 отсто, наспроти просекот во ЕУ од 3,8 отсто.
Од друга страна, најмалку заинтересирани за културата се Бугарите, Грците и граѓаните на Луксембург.
Постојат разлики и меѓу мажите и жените. Жените повеќе читаат од мажите. Во сите држави членки на Европската унија, уделот на жените коишто ќе прочитаат барем една книга годишно, најмалку е за десет проценти поголем од уделот на мажите.
Најмногу книги се читаат во Шведска и во Финска, а на трето место е Чешка.
На светско ниво Европа претставува центар на културата Не само што на европскиот континент се наоѓаат најмногу локации заштитени како светско културно наследство од кое и да е друго место на планетата, туку Европа и извезува 50 отсто повеќе културни продукти отколку што увезува. Се тргува најмногу со книги и слики, и најмногу со САД и со Швајцарија./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Изложба на Иван Ивановски во Кина
Во Гуангдонг Сан Та Музејот за Уметност во Гуанџоу, Народна Република Кина, на 8 ноември 2025 година, беше отворена самостојната изложба „In Between“ на македонскиот уметник Иван Ивановски.
Куратор на изложбата е Александра Ацеска, а настанот е реализиран во организација на Фликер студио, Зенг Чуан, Чен Хуе Бин (Guangdong San Ta Museum of Art), со ко-организатор Жанг Веи, а изложбата е реализирана со поддршка на Министерство за Култура и Туризам на Република Северна Македонија.

Изложбата е придружена со музиката на Андреја Салпе и Оливер Митковски (Поетроника), студиски сет специјално снимен за оваа прилика.
Фотографиите се на Даниел Коцев – Пазамат, а дизајнот на постерот е на Лиу Чен.
![]()
![]()

Култура
Македонскиот проект „Балада за лонецот и капакот“ доби 9.000 евра за развој на сценарио
Филмот „Балада за лонецот и капакот“ во режија на Вардан Тозија, а во продукција на Ивана Шекуткоска и Минимал Колектив Продукција, е меѓу избраните проекти што ќе добијат финансиска поддршка во рамки на 2025 Funding Round на SEE Cinema Network.
Официјалната најава беше објавена во рамки на 66. Меѓународен филмски фестивал во Солун (TIFF66), каде што SEE Cinema Network ги претстави добитниците на овогодинешниот развоен фонд, соопшти Агенцијата за филм.
Секој од поддржаните проекти ќе добие 9.000 евра наменети за развој на сценарио и подготовка на продукција.
Култура
Нова меѓународна награда за „Златната пеперутка“ со Биби и Боби
Проектот за долгометражен анимиран филм „Златната Пеперутка“, со омилените детски херои Биби и Боби, освои ново меѓународно признание – наградата „Млади Хоризонти“ (Young Horizons Award) на престижниот CEE Animation Forum, што се одржа од 4 до 6 ноември во Плзењ, Чешка.
На форумот беа претставени 29 проекти од 15 земји, пред повеќе од 200 претставници од европската анимациска индустрија: продуценти, режисери, телевизиски уредници и дистрибутери.
Ова е втора награда за „Златната Пеперутка“, по MIA Development Award која проектот ја доби во октомври годинава на MIA Market во Рим – еден од водечките европски филмски пазари.
„Франција ги има Астерикс и Обеликс и Мињоните, Англија ги има Валас и Громит, Русија ги има Маша и Медо, Хрватска го има Балтазар, а Белгија го има Тин-Тин. Нашата цел е децата од светот да слушнат за Македонија преку Биби и Боби“ – изјави режисерот Гоце Цветановски.
„Златната Пеперутка“ е еколошка авантура за целото семејство. Во филмот, Биби и Боби патуваат во амазонската џунгла во потрага по легендарната златна пеперутка, симбол на рамнотежа меѓу човекот и природата. Нивната мисија ги води кон митскиот град Ел Дорадо, каде ќе мора да ги здружат своите сили за да ги победат темните сили што демнат во џунглата.
Македонски продуценти на проектот се Македонска Крепост, Светот на Биби и Тун Моушн Студиос, а филмот ќе се реализира во копродукција со Аргентина, Шпанија, Колумбија и Бразил.

