Култура
Кировски нов претседател на СМУМ
Виолинистот м-р Љубиша Кировски е избран за нов претседател на Сојузот на музичките уметници на Македонија (СМУМ) за следниот мандатен период од четири години
На редовната изборна седница на Собранието на СМУМ е избрано новото раководство на Сојузот. Членови на Управниот одбор станаа Марија Вршкова, Весна Гиновска-Илкова, Катерина Гелебешева-Костадиновска, Никола Паскалов, Тодор Светиев и Васил Атанасов. За Претседател на Собранието на СМУМ е избран м-р Валери Стефановски.По повод изборот на функцијата, Љубиша Кировски до медиумите испрати изјава со следнава содржина:„Како претседател на СМУМ, ќе се залагам да се врати интегритетот и достоинството на македонските уметници. Заедно со членовите на Управниот одбор ќе го издигнеме СМУМ на многу повисоко ниво и ќе се залагаме за оформување на концертна агенција во рамките на СМУМ, која е од интегрално значење за сите нас. Ќе инсистирам за поголема вклученост на нашите членови во сите институции, како членови на Управните одбори на Македонската филхармонија и Опера, на фестивалот ’Охридско лето’ како и во сите комисии за доделување на државните награди и признанија“.Како што се напоменува меѓу другото во писмената изјава на Кировски тој смета „.. дека на програмите на Македонската филхармонија македонските солисти се застапени со многу мал број концери на годишно ниво и ќе побараме конечно да се направи национална програма според која половина од концертите ќе бидат со македонски солисти. Исто така на нашиот најголем фестивал ’Охридско лето“ ќе го очекуваме истото, односно ќе побараме одреден број концерти со наши солисти“.Според Кировски едно од многу важните прашања кои ги засегаат македонсктие уметниците е валоризацијата на нашиот труд. „За жал, досега бевме ставени на маргините со жално ниски хонорари, а сведоци сме на енормно високи хонорари и огромно одлевање на средства за странските уметници“ се вели во изјавата во којашто новиот директор на сојузот на музичари најавува враќање на достоинството на македонските музичари.Виолинистот Љубиша Кировски дипломирал и магистрирал на ФМУ во Скопје, бил концерт-мајстор во Македонската опера и Македонската филхармонија. Сега е вонреден професор на ФМУ во Скопје и водач на гудачкиот квартет „Гајдов“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.