Култура
Саемот на книга ќе се одржи од 12 до 17 април
Меѓународниот саем на книгата ќе се одржи од 12 до 17 април во Метрополис арена, на Скопски саем
На 23-тото издание на саемот за книгата, 4.000 квадратни метри ќе бидат исполнети со издавачи преку Здружението на издавачи и книжари, Здружението на албански издавачи, изданија на голем број домашни и странски автори преку издавачите и нивните застапници од Македонија, Србија, Хрватска, Словенија, Бугарија, Албанија, Италија, Велика Британија. Во промотивниот центар во галеријата секојдневно ќе се одржуваат промоциите на новите изданија. Скопски саем, оваа година го промовира саемот на книгата под мотото “Подари книга, подари богатство”, поддржувајќи ја токму книгата како најсоодветен подарок за сите пригоди: родендени, имендени, јубилеи, празници. Со помасовно подарување книга, сите засегнати страни во процесот на подарување добиваат: оној што подарува – подарува вредна работа, оној што го добива подарокот – добива нешто што останува, нешто што облагородува, а издавачката дејност опстојува.Поттикнати од овогодинешното мото на саемската манифестација и враќање на традицијата за подарување на книга посебно кај младата популација, Скопски саем преку познати личности од различни области: актери, пејачи, водители, новинари, луѓе од светот на модата, ќе дадат поддршка за акцијата “Подари книга, подари богатство”. Токму овие личности ќе купат книга за да подарат богатство на своите најмили.Покровител на саемот за книга е Министерството за култура на Република Македонија – кое ќе биде присутно со свој автентичен штанд, со кој што нашата држава се промовираше и на саемот на книга во Франкфурт. Целокупната презентација на Министерството за култура на РМ најмногу ќе се осврне на 50 години Струшки вечери на поезијата, како и Презентирање на Националната и универзитетска библиотека „Св. Климент Охридски“. На штандот по повод јубилејот од 50 години Струшки вечери на поезијата ќе бидат изложени портрети на сите добитници на “Златен венец” како и книгите од лауреатите, а воедно и некои ретки изданија од Струшките вечери на поезијата. Поетското читање на песната Т’га за југ ќе биде изведено на 15 светски јазици, а целокупната програма ќе биде пропратена со емитување на филмско дело по повод “50 години Струшки вечери на поезијата”. Саемот ќе го отвори Министерката за култура, Елизабета Канческа-Милевска во понеделник на 11 април, во 19 часот.Влезот за посетителите е од 12 до 17 април од 10 до 20 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Фестивал на перформансот во Музејот на современата уметност
Од 3 до 6 октомври во Музејот на современата уметност – Скопје ќе се случува четиридневен Фестивал на перформансот. Влезот е слободен.
„МСУ – Скопје фестивал на перформансот 2024“ е составен од две програми. Главната програма е тридневен настан насловен „(Пост)југословенски наследства и тела: перформанс, критика и утопија” куриран од Биљана Тануровска – Ќулавковски и Славчо Димитров и се состои од проекции, предавања и перформанси.
Додатна програма е програмата на партнерите, која произлегува од резиденциите, педагошките и истражувачките активности во партнерство со фондацијата „Арт Експлора“ (Франција/Албанија) и нејзината резиденцијална програма Вила 31 во Тирана, како и соработка со алумни од Националната школа за уметност во Париз-Сержи (ENSAPC) и уметници соработници на Иницијативата за усна историја во Приштина (OHI).
Општата идеја на фестивалот е да се измислат различни начини на делување, кои ќе се занимаваат со пренесување на уметничкото наследство во проширениот контекст на историјата на модерноста, и засилување на рецепцијата на идеите и гестовите во релација со постојано еволуирачките чинови и форми, кои се во потрага по еманципација.
Фестивалот е второто поглавје од европската програма Култура.ЕУБалкан (2022-2024), чија цел е да се поттикне размена на уметници, истражувачи и културни чинители, меѓу Западниот Балкан и Европската Унија и да се промовира ширењето на нивните практики и нивните истражувања. Претставата на NAM Choreolab е претставена во соработка со ППФестивал на Локомотива и проектот Движење на неврзаните, поддржан од Креативна Европа/ Програма за европска соработка со Западен Балкан и Министерство за култура на Република Северна Македонија.
МСУ – Скопје фестивал на перформансот е настан кој се организира на годишно ниво, овозможувајќи експериментирање и споделување на уметничката пракса на резидентите и уметниците од регионот, ЕУ и меѓународните сцени. Преку партнерства со културни институции, како и организации, здруженија, школи, универзитети и истражувачки центри, фестивалот ќе се вклучи во пошироки соработки со можност за проширување на други јавни и отворени простори.
На 3 октомври фестивалот ќе биде отворен со партнерската програма.
Во 18:30 часот предвидена е презентација на партнерите од иницијативата Култура.ЕУБалкан и дискусија со Јета Реџа, директор на Иницијативата за орална историја – OHI, Приштина; Жозефин Дофин, одговорна за резиденцијалните програми на „Арт Експлора“, Париз/Тирана; Камил Кингуе, раководителка за меѓународни прашања и кариерен развој на Националната школа за уметност во Париз-Сержи (ENSAPC), Париз. Модераторка ќе биде Ивана Васева, кураторка во МСУ. Потоа следува Хакерски водич кон шумата: музејско издание, перформанс од Колектив Tree (Елизабет Баном, Кетрин Маршал, Мартијн ван Елферен), алумни на Националната школа за уметност во Париз-Сержи (ENSAPC). Од 21 часот ќе бидат прикажани куси видеа: Транс’нистрија и Абхазија отпосле од Ванѓуш Велаху, Трнарче и Како се раѓаат ѕвездите? од Олсон Ламај и Кучките за нивниот дин од Ана Еренштајн, гости на Вила 31, резиденцијална програма во Тирана која ја води фондацијата „Арт Експлора“ (Франција/Албанија).
Од 4 до 6 октомври ќе се случува главната програма: (Пост)југословенски наследства и тела: перформанс, критика и утопија. Куратори на тродневните настани се Биљана Тануровска – Ќулавковски и Славчо Димитров.
На 4 октомври од 18:30 предвиден е перформанс на Христина Иваноска/Документ што недостасува: За методологијата (текст, глас, и тело) (2014). Потоа предавање на Јована Караулиќ/Изведување на државата: Културолошки перформанси на југославизмот. Во 20:45 часот, проекција на филм од Марта Попивода „Југославија, како идеологијата го придвижуваше нашето колективно тело“ (2013)/ Србија, Франција, Германија. За крај на фестивалската вечер – видео инсталација на Попивода, во соработка со Ана Вујановиќ/ Површини кои значат: Денот на младоста 1988 (2022).
На 5ти октомври од 19 часот, перформанси на Клелија Живковиќ/ Кој те научи да се чувствуваш добро? (2024); на Милица Ракиќ и Владимир Бјеличиќ/ Истражна постапка: Досието на една Југословенка (2024) и на Оља Грубиќ/ ИКЕБАНА (2018).
Од 20.30 часот предвидено е перформативно предавање на Дражен Драгојевиќ/ Како што се партизаните со не.
На последната фестивалска вечер на 6 октомври во 18 часот закажано е предавање на Јасмина Заложник/ Заземање простор. Нови пракси на перформативната уметност во Југославија. И за крај перформанс на НАМ КореоЛаб: Соња Преград, Ана Дубљевиќ, Викторија Илиоска, Дражен Драгојевиќ/ Како што се римува со не, Не не се повторува. Но се римува. (2024).
Култура
Аплаузи и овации за познатиот актер и комичар Драган Маринковиќ – Маца во Крива Паланка
Со громогласен аплауз и на нозе беше поздравен еден од омилените актери и комичари во регионот Драган Маринковиќ-Маца, кој синоќа настапи со претставата „Каква ти е сопругата – таков си и ти“, во продукција на „Златен заб“ на Меѓународниот театарски фестивал „Свети Јоаким Осоговски“ во Крива Паланка.
Публиката во салата на НУ Центар за култура Крива Паланка беше воодушевена од оригиналната актерска игра на познатиот и харизматичен Маца, се смееше на неговите шеговити реплики за вечната тема за бракот и машко-женските односи, но поттикна и размислување за смислата на животот.
Маца поентираше со пораката дека годините не смеат да се потрошат залудно, за да немаш со кого да се вратиш назад или со кого да продолжиш напред, нагласувајќи дека во животот не постои ништо важно, освен љубовта.
Тој ја поздрави кривопаланечката публика и изрази големо задоволство од гостувањето на театарскиот фестивал и престојот во Крива Паланка.
„Првпат сум во Крива Паланка, знам дека сте Град на културата, а со години слушам дека овде гостуваат многу мои колеги- актери, музички ѕвезди и уметници и постојано се прашував: „Боже колкава е таа Крива Паланка?“ Целосен респект што ја сакате уметноста и што уживате во неа. Ви посакувам уште многу фестивали“, порача Маринковиќ.
Вечерва, на шестата фестивалска вечер на МТФ„ Св. Јоаким Осоговски“ настапува Народниот театар„Стерија“ од збратимениот град Вршац, Србија, со претставата „Симпатија и антипатија“.
Култура
Во КИЦ групна изложба „Резонанца” по повод наградата „Борко Лазески“
Во Културно-информативниот центар во Скопје, најавено е отворање на изложбата на графики и слики од Јана Николовска, Антоанета Малинковиќ и Дорина Тенева насловена „Резонанца“
Групната излжба “Резонанца”, по повод наградата “Борко Лазески” ги обединува визуелните истранувања низ различните медиуми на авторките, ги претставува нивните лични, интроспективни тематики кои имаат за цел да го доведат гледачот во контемплативна состоjба.
Јана Николовска е родена во Битола 2000 година. Завршила средно уметничко училиште во Cкопjе во ДCУЛУД “Лазар Личеноски”, насока сликарство. Дипломирала на факултетот за ликовни уметности во Cкопjе во 2023 година насока сликарство во класата на проф. Антони Мазневски, а моментално е во тек со магистерски студии.
Антоанета Малиновиḱ е родена во Cкопjе 2000 година. Завршила средно училиште во гимназиjа Јосип Броз Tито, а го студира сликарството и дипломира во 2023 година на Факултетот за ликовни уметности во Cкопjе. Истата година таа станува член на Друштвото на ликовни уметници – ДЛУМ и учевствува на групни излонби.
Дорина Tенева е родена во Cкопjе 2001 година. Завршила средно уметничко училиште ДCУЛУД –“Лазар Личеноски” по насока сликарство. Продолнува да го студира сликарството на Факултетот за ликовни уметности во Cкопjе под менторство на проф. м-р. Антони Мазневски, а дипломира во 2023 година. Истата година станува член на Друштвото на ликовни уметници – ДЛУМ и учевствува на групни излонби.
Изложбата ќе биде отворена до 20.10.2024 година.