Променлива, релативна влажна и врнежлива пролет, како и нестабилно лето во Македонија предвидуваат тимот од метеоролози, синоптичари, физичари, хидролози, информатичари и други експерти од Управа за хидрометеоролошки работи  во Македонија во анализата за „Сеознските изгледи на времето во Република Македонија април/септември 2015“.

Според анализите на расположливите податоци и информации од европските и американските истражувачки центри за сезонските изгледи на времето и климата, постојат изгледи за променлива, релативно влажна и врнежлива пролет во Македонија, со температури под просечните за април, како резултат на променливото и влажно време, и во рамките на просечните за мај и јуни.Во однос на режимот на врнежите, постои веројатност за појава на зголемени врнежи во однос на просечните во мај и јуни, особено во источните и југоисточните делови од Македонија. Посебен акцент се дава на периодот во втората половина на април и почетокот на мај, кога поради зголемувањето на температурите на воздухот, топењето на снегот во планинските области, високите површински и подземни води и евентуалните нови пролетни врнежи може да предизвикаат излевања во одделни речни корита. Исто така, постои веројатност за променливи и понестабилни временски услови во претстојната летна сезона јуни/јули/август. Иако во однос на температурите не се очекуваат поголеми отстапувања, карактеристично за овој период би била зачестената појава на нестабилни атмосферски услови, кои вообичаено се проследени со појава на краткотрајни поројни врнежи, засилен ветер, грмежи, град, а во одредени ситуации овие процеси можат да бидат и многу поинтензивни и да доведат до појава на локално невреме и поплави.„Рeчиси е невозможно да се каже со сигурност какво ќе биде времето повеќе денови или месеци однапред. Долгорочните предвидувања се третираат како временски изгледи без посебна верификација и тврдење за нивната реална остварливост и прецизност, бидејќи еден широк спектар од фактори (компјутерските модели, временските системи, температурата на површината на морињата и други атмосферски состојби) се разгледуваат при изготвувањето на прогнозите“, се истакнува во анализата./крај/мф