Култура
Отворање на „Астерфест“ во Струмица
Седмото издание на интернационалниот филмски фестивал „Астерфест“ денеска свечено ќе биде отворено во Струмица.
Седмото издание на интернационалниот филмски фестивал „Астерфест“ денеска свечено ќе биде отворено во Струмица.Годинава фестивалот се одржува под мото „Струмица, отвореност, креација“ во традиционалниот термин од 27 до 31 мај.Програмата на фестивалот ќе почне со посета на Тимоти Бајфорд, добитник на Специјално признание на „Астерфест“ и „Тивериополска филмска алијанса“, на основното училиште „Видое Подгорец“, при што ќе оствари средба со најмладите љубители на филмот.Чинот на свеченото отворање на фестивалот ќе се одржи во НУЦК „Антон Панов“ во 19.30 часот. Предвидено е свечено обраќање да имаат министерката за култура Елизабета Канческа-Милевска и Зоран Заев, градоначалник на Струмица.На свеченоста ќе бидат доделени почесните признанија на Лаила Пакалнина од Латвија, Тимоти Бајфорд од Англија и Салаетин Билал од Македонија.Филмската програма ќе почне со фестивалска премиера на македонскиот краток игран филм „Жарче“ на режисерот Томислав Алексов. Во филмот учествуваат актерите Тони Михајловски, Весна Димитровска, Салаетин Билал, Тијана Источки и Никола Колев. Продукцијата е на „Наше маало“, а реализирана е по сценарио на Огнен и Велко Неделковски.По премиерата на „Жарче“ ќе следуваат проекциите на анимираниот филм „Излегуваш“ на Макс Либих од Австрија, добитник на награда на фестивалот „Дијагонале“ во Грац, како и креативност документарец „Геринговото жезло“ на Пиа Андел од Финска, во кој се користени архивски снимки од Втората светска војна кои биле забранети повеќе од 65 години.Од 22 часот се до полноќ ќе се одвива филмскиот маратон со проекции на седум ексклузивни филмови: „Пат на Туарег во еден правец“, „Под жицата“, „Еден чекор“, „Татковина“, „Патот на Марија“, „Тусилаго“ и „Десет години“.Фестивалската програма продолжува во сабота во 11 часот со „Астер и Тивериополските филмски беседи“ во манастирот во Вељуса, посветени на лауреатите Пакалнина, Бајфорд и Билал./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.